2 Na nima, Davidi katulaka mpu ya kimfumu ya Malkami na ntu na yo, mpi yandi monaka nde kilo na yo vandaka talanta* mosi ya wolo, mpi yo vandaka ti matadi ya ntalu; ebuna bo tulaka yo na ntu ya Davidi. Yandi bakaka mpi bima mingi kibeni yina bo botulaka na mbanza yina.+ 3 Ebuna yandi basisaka bantu yina vandaka na kati na yo mpi tulaka bo na kisalu+ ya kupasula matadi mpi ya kusadila bisadilu ya makasi ya bibende mpi masoka. Yai mambu yina Davidi salaka na bambanza yonso ya bantu ya Amoni. Nsuka-nsuka, Davidi mpi basoda yonso vutukaka na Yeruzalemi.