23 Bika bo pesa beto bana-bangombe ya babakala zole, mpi bo sola mwana-ngombe mosi, bo zenga yo bitini-bitini, mpi bo tula yo na zulu ya bankuni, kansi bo fwete tula yo ve tiya. Mono ta yidika mwana-ngombe yina ya nkaka, mpi mono ta tula yo na zulu ya bankuni, kansi mono ta tula yo ve tiya. 24 Ebuna beno fwete binga zina ya nzambi na beno,+ mpi mono ta binga zina ya Yehowa. Nzambi yina ta tinda tiya sambu na kupesa mvutu ta monisa nde yandi kele Nzambi ya kieleka.”+ Ebuna bantu yonso vutulaka nde: “Mambu ya nge me tuba kele mbote.”