-
Nkunga 53:Bangogo ya Kele na Zulu-6Biblia—Mbalula ya Nsi-Ntoto ya Mpa
-
-
Na ntwadisi; na mutindu ya kuyimba ya Mahalati.* Maskile.* Ya Davidi.
53 Zoba* ke tuba na ntima na yandi nde:
“Yehowa kele ve.”+
Bisalu na bo ya kukonda lunungu kele ya kubeba mpi ya nzanzi;
Muntu mosi ve ke sala mambu ya mbote.+
2 Kansi Nzambi ke talaka bana ya bantu katuka na zulu+
Sambu na kumona kana kele ti muntu yina kele ti mayele ya kubakisa mambu mbote-mbote, kana kele ti muntu yina ke sosa Yehowa.+
3 Bo yonso me vilaka nzila;
Bo yonso me bebaka kiteso mosi.
Muntu mosi ve ke sala mambu ya mbote,
Ata muntu mosi ve.+
4 Keti muntu mosi na kati ya bantu yina ke salaka mambu ya mbi ke bakisa?
Bo ke dia bantu na mono bonso nde bo ke dia mampa.
Bo ke binga ve Yehowa.+
5 Kansi bo ta fuluka ti boma ya ngolo kibeni,
Boma ya ngolo yina bo me waka ntete ve,*
Sambu Nzambi ta panza mikwa ya bantu yina ke nwanisa nge.*
Nge ta pesa bo nsoni, sambu Yehowa me losa bo.
6 O, bika luguluku ya Izraele kukatuka na Sioni mpi kukwisa!+
Ntangu Yehowa ta vutula bantu na yandi yina bo nataka na kimpika,
Bika Yakobi kuyangalala, bika Izraele kuwa kiese.
-
-
Baroma 3:10-12Biblia—Mbalula ya Nsi-Ntoto ya Mpa
-
-
10 mutindu bo me sonikaka nde: “Kele ve ti muntu ya lunungu, ata muntu mosi ve;+ 11 kele ve ata ti muntu mosi yina kele ti mayele ya kubakisa mambu mbote-mbote; kele ve ata ti muntu mosi yina ke sosaka Nzambi. 12 Bantu yonso me vilaka nzila, bo yonso me kumaka bantu ya mpamba; kele ve ata ti muntu mosi ya ke monisaka ntima ya mbote, ata muntu mosi ve.”+
-