Ya Ntete na Bakorinto

9 Am Keti mono kele ve na kimpwanza? Keti mono kele ve ntumwa? Keti mono monaka ve Mfumu na beto Yezu?+ Keti beno kele ve kisalu na mono na Mfumu? 2 Ata sambu na bantu ya nkaka mono kele ve ntumwa, ya kieleka mono kele ntumwa sambu na beno! Sambu beno kele nzikisa yina ke ndimisa kintumwa na mono na Mfumu.

3 Mambu ya mono ke tuba na bantu yina ke sambisa mono yo yai: 4 Keti beto kele ve ti nswa* ya kudia mpi kunwa? 5 Keti beto kele ve ti nswa ya kukwenda ti nkento yina beto me kwelaka mpi yina ke kwikilaka,*+ mutindu bantumwa ya nkaka, bampangi ya Mfumu,+ mpi Sefasi*+ ke salaka? 6 To keti Barnabasi+ ti mono mpamba bantu kele ve ti nswa ya kuyambula kusala kisalu sambu na kuzingila? 7 Inki soda me kudifutaka ntete yandi mosi? Nani ke kunaka kilanga ya vinu mpi ke diaka ve mbuma na yo?+ To nani ke gungulaka mameme ebuna yandi ke nwaka ve ndambu ya miliki ya ke katukaka na bambisi yina?

8 Am Keti mono ke tuba mambu yai na kutadila mabanza ya bantu? To keti Nsiku mpi ke tubaka ve mambu yai? 9 Sambu bo me sonikaka na Nsiku ya Moize nde: “Nge fwete kanga ve munoko ya ngombe ntangu yo ke niata mbuma sambu na kukatula yo bampusu.”+ Keti Nzambi ke kudibanza sambu na bangombe? 10 To keti yandi ke tuba yo sambu na beto? Ya kieleka, bo sonikaka yo sambu na beto, sambu muntu yina ke bundulaka mpi muntu yina ke tutaka bambuma sambu na kukatula yo bampusu fwete sala yo ti kivuvu ya kubaka dikabu na yandi.

11 Kana beto kunaka bima ya kimpeve na kati na beno, keti yo kele mbi kana beto baka lusadisu ya kinsuni na maboko na beno?+ 12 Kana bantu ya nkaka kele ti nswa ya kubaka lusadisu na beno, keti beto kele ve ti nswa yina kuluta bo? Ata mpidina, beto me sadilaka ve nswa* yai,+ kansi beto ke kanga ntima na mambu yonso sambu beto kanga ve ata fioti nsangu ya mbote ya Kristu nzila.+ 13 Keti beno me zaba ve nde bantu yina ke salaka bisalu ya santu ke diaka bima ya tempelo, mpi nde bantu yina ke salaka konso ntangu na mesa-kimenga ke bakaka dikabu na mesa-kimenga?+ 14 Mutindu mosi mpi, Mfumu tubaka nde bantu yina ke zabisaka nsangu ya mbote fwete zinga na nzila ya nsangu ya mbote.+

15 Kansi mono me sadilaka ve ata ngidika mosi na kati ya bangidika yai.+ Ya kieleka, mono me sonika ve mambu yai sambu beno sadila mono mambu yai, sambu kuluta mbote mono fwa na kisika ya kubika nde muntu mosi kukatula bikuma ya mono kele na yo ya kudikumisa!+ 16 Ntangu yai, mono kele ve ti kikuma ya kudikumisa kana mono ke zabisa nsangu ya mbote, sambu yo kele kisalu yina mono fwete sala. Ya kieleka, mawa na mono kana mono zabisa ve nsangu ya mbote!+ 17 Kana mono sala yo na luzolo yonso, mono kele ti matabisi; kansi ata mono sala yo ve na luzolo na mono, mono kele kaka ti kisalu ya kikapita yina bo me pesaka mono.+ 18 Ebuna matabisi na mono kele inki? Yo kele nde ntangu mono ke zabisa nsangu ya mbote, mono pesa nsangu ya mbote ya ofele, sambu mono sadila ve na mutindu ya mbi banswa* yina mono kele na yo na nsangu ya mbote.

19 Sambu ata mono kele na kimpwanza na meso ya bantu yonso, mono me kudikumisaka mpika ya bantu yonso, sambu mono benda bantu mingi. 20 Na Bayuda mono kumaka bonso Muyuda sambu mono benda Bayuda;+ na bantu yina kele na nsi ya nsiku mono kumaka bonso muntu yina kele na nsi ya nsiku, ata mono mosi kele ve na nsi ya nsiku, sambu mono benda bantu yina kele na nsi ya nsiku.+ 21 Na bantu yina me konda nsiku mono kumaka bonso muntu ya me konda nsiku, ata mono kele ve kukonda nsiku na meso ya Nzambi kansi mono kele na nsi ya nsiku na meso ya Kristu,+ sambu mono benda bantu yina me konda nsiku. 22 Na bantu yina kele ngolo ve mono kumaka ngolo ve, sambu mono benda bantu yina kele ngolo ve.+ Mono me kumaka bima yonso sambu na bantu ya mitindu yonso, sambu mono gulusa bankaka na mitindu yonso. 23 Kansi mono ke sala mambu yonso sambu na nsangu ya mbote, sambu na kuzabisa yo na bantu ya nkaka.+

24 Keti beno me zaba ve nde bantu yina ke bakaka ntinu na nsaka ya kubaka ntinu ke bakaka ntinu bo yonso, kansi muntu mosi mpamba ke bakaka lufutu? Beno baka ntinu sambu beno nunga yo.+ 25 Konso muntu yina ke salaka nsaka ya kutesana ke kudiyalaka na mambu yonso. Ya kieleka, bo ke salaka yo sambu na kubaka mpu ya kimfumu yina ke fwaka,+ kansi beto ke salaka yo sambu na kubaka mpu ya kimfumu yina ke fwaka ve.+ 26 Yo yina, mutindu mono ke baka ntinu kele ve kukonda kikuma;+ mutindu mono ke bula makofi kele ve sambu yo bula mupepe; 27 kansi mono ke bulaka* nitu na mono+ mpi mono ke nataka yo bonso mpika, sambu na nima ya kulonga bantu ya nkaka, mono kuma ve mono mosi na konso mutindu yina muntu yina Nzambi ke ndima ve.