Yeremia
12 Nge kele muntu ya lunungu, O Yehowa,+ ntangu mono ke tubila nge diambu na mono,
Ntangu mono ke tubila mambu ya kusambisa ti nge.
Kansi sambu na nki bantu ya mbi ke nunga na banzila na bo,+
Mpi sambu na nki bayekudi ke kudiyangisa ve?
2 Nge muntu kunaka bo, mpi bo me basisaka misisa.
Bo me yelaka mpi me butaka bambuma.
Bo ke tubila nge ntangu yonso, kansi nge kele ntama ti bangindu na bo ya kati kibeni.*+
3 Kansi nge me zaba mono mbote, O Yehowa,+ nge ke monaka mono;
Nge me tala ntima na mono mpi nge me mona nde yo kele na bumosi ti nge.+
Tula bo na lweka bonso mameme ya bo fwete fwa,
Mpi tula bo na kingenga sambu na kilumbu ya kufwa bo.
4 Tii nki ntangu insi fwete yuma
Mpi matiti ya konso kilanga fwete kawuka?+
Sambu na mambi ya bantu yina ke zinga na kati na yo,
Bo me fwa bambisi mpi bandeke.
Sambu bo me tuba nde: “Yandi ke mona ve mambu yina ta bwila beto.”
5 Kana nge ke lemba ntangu nge ke baka ntinu ti bantu ya makulu,
Inki mutindu nge lenda baka ntinu ti bampunda?+
Ata kana nge ke kudiwa na lutaninu na insi ya ngemba,
Nge ta sala nki na kati ya tu-bamfinda ya me kangama-kangamaka ya kele na lweka ya Yordani?
6 Sambu ata bampangi na nge mosi, bantu ya nzo ya tata na nge,
Me sadila nge mambu kukonda kwikama.+
Bo ke boka na ndinga ya ngolo sambu na kufunda nge.
Kundima bo ve,
Ata kana bo ke tubila nge mambu ya mbote.
7 “Mono me bikisaka nzo na mono;+ mono me yambu- laka dikabu na mono.+
Mono me pesaka muntu ya mono ke zolaka mingi* na maboko ya bambeni na yandi.+
8 Sambu na mono, dikabu na mono me kuma bonso ntambu na kati ya mfinda.
Yandi me nganina mono.
Yo yina mono me kuma kumenga yandi.
9 Sambu na mono, dikabu na mono kele bonso ndeke ya mikubu mingi* yina ke diaka misuni;
Bandeke ya nkaka ya ke diaka misuni me ziunga yo mpi me nwanisa yo.+
Beno kwisa, beno vukana, beno yonso bambisi ya mfinda,
Beno kwisa kudia.+
Bo me kumisa kitini na mono ya ntoto ya kitoko, ntoto-makanga ya me konda bantu.
11 Yo me kuma ntoto ya mpamba.
Ntoto ya mvimba me kuma mayumbu,
Kansi muntu mosi ve ke tudila yo dikebi.+
12 Bantu yina ke bebisaka me kwisa na banzila yonso ya kubeba na ntoto-makanga,
Sambu mbele ya bitumba ya Yehowa ke fwa bantu katuka na nsuka mosi ya ntoto tii na nsuka ya nkaka.+
Ngemba kele ve sambu na konso muntu.*
13 Bo me kuna ble, kansi bo me katula bansende.+
Bo me kudilembisa, kansi bo me baka kima ve.
Bo ta wila bima na bo nsoni
Sambu na makasi ya ngolo ya Yehowa.”
14 Yai mambu yina Yehowa ke tubila bankweno na mono yonso ya mbi, yina ke simba dikabu yina mono pesaka muntu na mono Izraele:+ “Tala, mono ke tumuna bo na insi na bo,+ mpi mono ta tumuna nzo ya Yuda na kati na bo. 15 Kansi na nima ya kutumuna bo, mono ta wila bo diaka mawa mpi mono ta vutula konso muntu na ntoto na yandi yina yandi bakaka bonso dikabu.”
16 “Mpi kana bo longuka kibeni banzila ya bantu na mono mpi bo zenga kieleka na zina na mono nde, ‘Ya kieleka mutindu Yehowa kele na luzingu!’ kaka mutindu bo longaka bantu na mono na kuzenga kieleka na zina ya Baale, bo ta tunga bo na kati ya bantu na mono. 17 Kansi kana bo buya kulemfuka, mono ta tumuna mpi dikanda yina, mono ta tumuna yo mpi ta fwa yo,” Yehowa muntu me tuba.+