Yeremia

40 Ndinga yina katukaka na Yehowa mpi kwisilaka Yeremia na nima ya ntangu yina Nebuzaradani+ mfumu ya bantu yina ke taninaka ntotila bikaka yandi na kukwenda katuka na Rama.+ Yandi bakaka Yeremia pana ya kukanga na minioti; Yeremia vandaka na kati ya bantu yonso ya Yeruzalemi mpi ya Yuda yina bo vandaka kunata na Babilone. 2 Na nima, mfumu ya bantu yina ke taninaka ntotila bakaka Yeremia mpi tubilaka yandi nde: “Yehowa Nzambi na nge tubilaka na ntwala mpasi yai ya me bwila kisika yai, 3 mpi Yehowa me sala yo kaka mutindu yandi tubaka, sambu beno salaka disumu na ntwala ya Yehowa mpi beno lemfukaka ve na ndinga na yandi. Yo yina mambu yai me bwila beno.+ 4 Bubu yai mono ke katula minioti yina vandaka na maboko na nge. Kana nge me mona nde yo kele mbote na kukwenda ti mono na Babilone, kwisa, mpi mono ta keba nge. Kansi kana nge ke zola ve kukwenda ti mono na Babilone, kukwisa ve. Tala! Insi ya mvimba kele na ntwala na nge. Kwenda konso kisika yina nge me zola.”+

5 Ntangu Yeremia vandaka me baluka ntete ve, Nebuzaradani tubaka nde: “Vutuka na Gedalia+ mwana ya Ahikami+ mwana ya Shafani,+ yina ntotila ya Babilone pesaka kisalu ya kutala bambanza ya Yuda, mpi zinga ti yandi na kati ya bantu; to kwenda konso kisika yina nge me zola.”

Mfumu ya bantu yina ke taninaka ntotila pesaka yandi ndambu ya madia mpi dikabu, ebuna yandi songaka Yeremia na kukwenda. 6 Yo yina Yeremia kwendaka na Mispa+ kisika Gedalia mwana ya Ahikami vandaka mpi zingaka ti yandi na kati ya bantu yina bikalaka na insi.

7 Na nima bamfumu yonso ya basoda yina vandaka na nseke ti bantu na bo waka nde ntotila ya Babilone me pesa Gedalia mwana ya Ahikami kisalu ya kutala insi mpi nde yandi me pesa yandi kisalu ya kutala babakala, bankento, mpi bana na kati ya bansukami ya insi yina bo nataka ve na kimpika na Babilone.+ 8 Yo yina bo kwisaka na Mispa+ kisika Gedalia vandaka. Bantu yango bo yai: Ismaele+ mwana ya Netania, Yohanani+ ti Yonatani bana ya Karea, Seraya mwana ya Tanumeti, bana ya Efai muntu ya Netofa, mpi Yezania+ mwana ya muntu ya Maakati, ti bantu na bo. 9 Gedalia mwana ya Ahikami mwana ya Shafani diaka ndefi na ntwala na bo ti ya bantu na bo mpi tubaka nde: “Beno wa boma ve na kusadila bantu ya Kaldea. Beno zinga na insi yai mpi beno sadila ntotila ya Babilone, ebuna mambu ta kwendila mbote sambu na beno.+ 10 Kansi mono, mono ta bikala na Mispa sambu na kuvanda mumonisi na beno na* bantu ya Kaldea yina ke kwisa na beto. Kansi beno fwete vukisa vinu, bambuma ya nsungi ya mvula, mpi mafuta, ebuna beno fwete tula yo na mabungu ya kubumbila bima mpi beno zinga na bambanza yina beno me baka.”+

11 Ebuna Bayuda yonso yina vandaka na Moabi, na Amoni mpi na Edomi, ti bayina vandaka na bansi yonso ya nkaka, waka mpi nde ntotila ya Babilone me bika bantu ya nkaka sambu bo zinga na Yuda mpi nde yandi me pesa Gedalia mwana ya Ahikami mwana ya Shafani kisalu ya kutala bo. 12 Yo yina Bayuda yonso yantikaka kuvutuka katuka na bisika yonso yina bo panzanaka, ebuna bo kotaka na ntoto ya Yuda, na Mispa kisika Gedalia vandaka. Mpi bo vukisaka vinu mpi bambuma mingi kibeni ya nsungi ya mvula.

13 Yohanani mwana ya Karea mpi bamfumu yonso ya basoda yina vandaka na nseke kwisaka na Mispa kisika Gedalia vandaka. 14 Bo tubilaka yandi nde: “Keti nge me zaba ve nde Baalisi, ntotila ya bantu ya Amoni,+ me tinda Ismaele mwana ya Netania sambu na kufwa nge?”*+ Kansi Gedalia mwana ya Ahikami ndimaka bo ve.

15 Ebuna Yohanani mwana ya Karea tubilaka Gedalia na kinsweki na Mispa nde: “Mono ke zola kukwenda kufwa Ismaele mwana ya Netania, mpi muntu mosi ve ta zaba. Sambu na nki yandi fwete fwa nge,* mpi sambu na nki bantu yonso ya Yuda yina me vukana kisika nge kele fwete panzana mpi bantu ya Yuda yina me bikala fwete fwa?” 16 Kansi Gedalia+ mwana ya Ahikami tubilaka Yohanani mwana ya Karea nde: “Kusala mutindu yina ve, sambu mambu yina nge ke tuba sambu na Ismaele kele luvunu.”