Yeremia
16 Ndinga ya Yehowa kwisilaka mono diaka nde: 2 “Nge fwete kwela ve nkento, mpi nge fwete buta ve bana ya babakala ti ya bankento na kisika yai. 3 Sambu yai mambu yina Yehowa ke tuba sambu na bana ya babakala ti ya bankento yina ke butuka awa, sambu na bamama na bo yina ke buta bo, mpi sambu na batata na bo yina ke buta bo na insi yai: 4 ‘Bo ta fwa na maladi yina ke fwaka bantu,+ kansi muntu mosi ve ta dila bo mpi ta zika bo; bo ta kuma bonso nsasa na zulu ya ntoto.+ Bo ta fwa na mbele ya bitumba mpi na nzala;+ bamvumbi na bo ta vanda madia sambu na bandeke ya zulu mpi sambu na bambisi ya ntoto.’
5 Sambu Yehowa ke tuba nde,
‘Kukota ve na nzo yina bo ke sala nkinsi ya mafwa,
Mpi kukwenda ve sambu na kudila to kuwila bo mawa.’+
‘Sambu mono me katula ngemba na mono na bantu yai,’ Yehowa muntu me tuba,
‘Mono me katula mpi zola ya kwikama mpi mawa na mono.+
6 Bantu ya mfunu mpi bantu ya kukonda mfunu ta fwa na insi yai.
Bo ta zika bo ve,
Muntu mosi ve ta dila bo,
Mpi muntu mosi ve ta kudizenga to ta kulula nsuki sambu na bo.*
7 Muntu mosi ve ta pesa madia na bantu yina kele na mafwa,
Sambu na kupesa bo kikesa na mafwa na bo;
Mpi muntu mosi ve ta pesa bo dikopa ya kulembika
Sambu bo nwa yo sambu na lufwa ya tata to ya mama na bo.
8 Mpi kukota ve na nzo yina bo ke sala nkinsi
Sambu na kuvanda ti bo sambu na kudia mpi kunwa.’
9 “Sambu Yehowa ya makesa, Nzambi ya Izraele, ke tuba nde, ‘Awa na kisika yai, na bilumbu na beno mpi na meso na beno, mono ta sukisa makelele ya kuyangalala mpi ya kiese, ndinga ya bakala yina ke kwela mpi ndinga ya nkento yina ke kwela.’+
10 “Ntangu nge ta zabisa bantu yina mambu yai yonso, bo ta yula nge nde, ‘Sambu na nki Yehowa me tuba na kupesa beto mpasi yai yonso ya ngolo? Inki kifu mpi nki disumu beto me sala na ntwala ya Yehowa Nzambi na beto?’+ 11 Nge fwete vutudila bo nde, ‘“Sambu ba-nkaka na beno yambulaka mono,”+ Yehowa muntu me tuba, “mpi bo vandaka kaka kulanda banzambi ya nkaka, kusadila bo, mpi kufukimina bo.+ Kansi bo yambulaka mono, mpi bo zitisaka ve nsiku na mono.+ 12 Beno me sala mambu ya mbi kuluta ba-nkaka na beno,+ mpi konso muntu ke landa ntima na yandi ya mbi na ntu-ngolo yonso na kisika ya kulemfukila mono.+ 13 Yo yina mono ta losa beno na nganda ya insi yai mpi ta nata beno na insi yina beno ti ba-nkaka na beno me zabaka ve,+ mpi kuna beno ta sadila kibeni banzambi ya nkaka mpimpa ti mwini,+ sambu mono ta monisila beno ve ntima ya mbote.”’
14 “‘Kansi, bilumbu ke kwisa,’ Yehowa muntu me tuba, ‘ntangu bo ta tuba diaka ve nde: “Ya kieleka mutindu Yehowa kele na luzingu, yandi muntu yina basisaka bantu ya Izraele na insi ya Ezipte!”+ 15 kansi bo ta tuba nde: “Ya kieleka mutindu Yehowa kele na luzingu, yandi muntu yina basisaka bantu ya Izraele na insi ya nordi mpi na bansi yonso yina yandi panzaka bo!” mpi mono ta vutula bo na insi na bo, yina mono pesaka ba-nkaka na bo.’+
16 ‘Tala mono ke tinda bantu sambu bo sosa balobi-mbisi mingi,’ Yehowa muntu me tuba,
‘Mpi bo ta loba bo.
Na nima mono ta tinda bantu sambu bo sosa bantu mingi ya ke zombaka,
Ebuna bo ta zomba bo na konso ngumba ya nene mpi na konso ngumba ya fioti
Mpi na bampwasa ya matadi ya nene.
17 Sambu meso na mono ke mona mambu yonso ya bo ke sala.*
Yo kele ve ya kubumbana na ntwala na mono,
Mpi kifu na bo kele ve ya kubumbana na meso na mono.
18 Ya ntete, mono ta pesa bo lufutu ya mvimba sambu na kifu na bo mpi disumu na bo,+
Sambu bo me kumisa insi na mono mvindu ti bifwanisu ya kukonda luzingu* ya biteki na bo ya nzanzi
Mpi bo me fulusa dikabu na mono ti bima na bo ya nzanzi.’”+
19 O Yehowa, ngolo na mono mpi kisika na mono ya ngolo ya lutaninu,
Kisika na mono ya kutina na kilumbu ya mpasi,+
Makanda ta kwisa na nge katuka na nsuka ya ntoto,
Mpi bo ta tuba nde: “Ba-nkaka na beto bakaka luvunu ya nene bonso dikabu,
Kima ya mpamba mpi bima ya kukonda mfunu yina kele ve na mambote.”+
20 Keti muntu lenda kudisadila banzambi
Ntangu bo kele ve kibeni banzambi?+
21 “Yo yina mono ta sala nde bo zaba,
Na ntangu yina mono ta sala nde bo zaba ngolo na mono mpi kikesa na mono,
Mpi bo ta zaba kibeni nde zina na mono kele Yehowa.”