Yeremia
14 Yai ndinga ya Yehowa yina kwisilaka Yeremia na yina me tala bansungi ya kuyuma:+
2 Yuda ke dila,+ mpi bakielo na yo me beba.
Yo me bwa na ntoto, yo me lemba ngolo,
Mpi bidilu ke tombuka katuka na Yeruzalemi.
3 Bamfumu na bo ke tinda bansadi na bo* sambu na kusosa masa.
Bo ke kwenda na mabulu ya masa, kansi bo ke mona ve masa.
Bo ke vutuka ti mabungu ya mpamba.
Bo kele na nsoni mpi bo me lemba nitu,
Mpi bo ke fika ba-ntu.
4 Sambu ntoto me pasuka,
Sambu mvula kele ve na insi yai,+
Bantu ya ke salaka bilanga me lemba nitu mpi bo me fika ba-ntu.
5 Ata mbambi yina kele na nseke me yambula mwana yina yo me katuka kubuta
Sambu matiti kele ve.
6 Bampunda ya mfinda me telama na bangumba ya fioti ya me konda banti.
Yo ke fulumuna bonso bambwa ya nseke;
Meso na bo me lemba sambu matiti kele ve.+
7 Ata bifu na beto ke funda beto,
O Yehowa, sala diambu sambu na zina na nge.+
Sambu mambu na beto ya kukonda kwikama kele mingi,+
Mpi beto me sala masumu na ntwala na nge.
8 O kivuvu ya Izraele, Muntu ke gulusaka yandi+ na bantangu ya mpasi,
Sambu na nki nge kele bonso munzenza na insi yai,
Bonso muntu ya ke sala nzietelo yina ke telamaka kaka sambu na kulala?
9 Sambu na nki nge kele bonso muntu yina ke yituka,
Bonso muntu ya ngolo yina lenda gulusa ve?
Kuyambula beto ve.
10 Yai mambu yina Yehowa ke tuba sambu na bantu yai: “Bo ke zolaka kuyungana;+ bo me yalaka ve makulu na bo.+ Yo yina Yehowa kele ve na kiese sambu na bo.+ Ntangu yai, yandi ta yibuka kifu na bo mpi yandi ta sambisa bo sambu na masumu na bo.”+
11 Na nima Yehowa tubilaka mono nde: “Kusamba ve sambu mambu ya mbote kukumina bantu yai.+ 12 Ntangu bo ke buya madia, mono ke wa ve mambu ya bo ke lomba,+ mpi ntangu bo ke pesa makabu ya mvimba ya kuyoka mpi makabu ya mbuma, mono ke wa ve kiese na yo,+ sambu mono ta fwa bo+ na mbele ya bitumba, na nzala, mpi na kipupa.”*
13 Yo yina mono tubaka nde: “O Yehowa Mfumu ya Kuluta Nene! Bambikudi ke tubila bo nde, ‘Beno ta mona ve mbele ya bitumba, mpi nzala ta kwisila beno ve, kansi mono ta pesa beno ngemba ya kieleka na kisika yai.’”+
14 Ebuna Yehowa tubilaka mono nde: “Bambikudi ke bikula mambu ya luvunu na zina na mono.+ Mono me tinda bo ve, mono me songa bo ve, mpi mono me tubila bo ve.+ Mambu yina bo ke tubila beno kele mbona-meso ya luvunu, mambu ya kukonda mfunu ya bo ke zabisa na ntwala, mpi luvunu ya ntima na bo.+ 15 Yo yina yai mambu yina Yehowa ke tubila bambikudi yina ke bikula na zina na mono, ata mono tindaka bo ve, mpi yina ke tuba nde mbele ya bitumba mpi nzala ta kwisa ve na insi yai: ‘Bambikudi yina ta fwa+ na mbele ya bitumba mpi na nzala. 16 Bantu yina bo ke bikudila, bo ta losa bo na babala-bala ya Yeruzalemi sambu na nzala mpi mbele ya bitumba, muntu ya kuzika bo ta vanda ve+—bo, bankento na bo, bana na bo ya babakala, mpi bana na bo ya bankento—sambu mono ta pesa bo mpasi yina bo fwete baka.’+
17 “Nge fwete songa bo mambu yai,
‘Bika meso na mono kukulumusa mansanga mpimpa ti mwini, bika yo mana ve,+
Sambu bo me bedisa mpi me monisa mwana-nkento ya mwense ya bantu na mono mpasi,+
Ti mputa ya ngolo kibeni.
18 Kana mono kwenda na bilanga mpi mono tala,
Mono ke mona bantu yina bo me fwa na mbele ya bitumba!+
Mpi kana mono kota na mbanza,
Mono ke mona bimbefo yina bantu ke bela sambu na nzala!+
Sambu mbikudi ti nganga-nzambi me kwenda na insi mosi ya bo me zaba ve.’”+
19 Keti nge me losa Yuda kimakulu, to keti nge* me menga Sioni?+
Sambu na nki nge me bula beto, na mpila nde beto lenda beluka ve?+
Beto vandaka kuvingila ngemba, kansi kima mosi ve ya mbote kwisaka,
Beto vandaka kuvingila ntangu ya kubeluka, kansi boma ya ngolo kele!+
20 Beto ke ndima mbi na beto, O Yehowa,
Mpi kifu ya ba-nkaka na beto,
Sambu beto me sala masumu na ntwala na nge.+
21 Sambu na zina na nge, kubuya beto ve;+
Kuvweza ve kiti na nge ya kimfumu ya nkembo.
Yibuka, mpi kufwa ve kuwakana na nge ti beto.+
22 Keti ata kiteki mosi ya kukonda mfunu ya makanda lenda nokisa mvula,
To keti ata zulu yo mosi lenda tinda bamvula ya ngolo?
Keti nge kele ve kaka nge Mosi, O Yehowa Nzambi na beto?+
Mpi beto ke tudila nge kivuvu,
Sambu nge mpamba muntu salaka bima yai yonso.