Kusonga ya Yoane

10 Mono monaka wanzio ya nkaka ya ngolo ke kulumuka katuka na zulu, yandi me lwata dituti; nkongolo vandaka na zulu ya ntu na yandi, luse na yandi vandaka bonso ntangu,+ makulu na yandi vandaka bonso makunzi ya tiya, 2 mpi yandi vandaka ti rulo mosi ya fioti ya kukanguka na maboko. Yandi tulaka dikulu na yandi ya kitata na nzadi-mungwa, mpi dikulu na yandi ya kimama na ntoto, 3 mpi yandi tubaka na ndinga ya ngolo bonso ntangu ntambu ke nganaka.+ Mpi ntangu yandi tubaka na ndinga ya ngolo, banzasi nsambwadi+ tubaka.

4 Ebuna ntangu banzasi nsambwadi tubaka, mono zolaka kusonika, kansi mono waka ndinga mosi na zulu+ ke tuba nde: “Bumba mambu yina banzasi nsambwadi me tuba, mpi kusonika yo ve.” 5 Wanzio yina mono monaka me telama na nzadi-mungwa mpi na ntoto tombulaka diboko na yandi ya kitata na zulu, 6 mpi yandi diaka ndefi na zina ya Muntu yina ke zingaka mvula na mvula,+ yina gangaka zulu ti bima yina kele na kati na yo mpi ntoto ti bima yina kele na kati na yo mpi nzadi-mungwa ti bima yina kele na kati na yo nde:+ “Yandi ta sukinina diaka ve ata fioti. 7 Kansi na bilumbu yina wanzio ya nsambwadi+ ta kuma pene-pene ya kubula mpungi,+ kinsweki ya santu+ yina Nzambi zabisaka bonso nsangu ya mbote na bampika na yandi bambikudi+ ta lungana kibeni.”

8 Mono waka ndinga ya ke katuka na zulu,+ ke tubila mono diaka nde: “Kwenda, baka rulo ya kukanguka yina kele na maboko ya wanzio yina me telama na nzadi-mungwa mpi na ntoto.”+ 9 Mono kwendaka na wanzio yina mpi mono songaka yandi na kupesa mono rulo yina ya fioti. Yandi tubilaka mono nde: “Baka yo mpi dia yo,+ mpi yo ta kumisa divumu na nge ndudi, kansi na munoko na nge yo ta vanda sukadi bonso bwiki.” 10 Mono bakaka rulo yina ya fioti na maboko ya wanzio mpi mono diaka yo;+ na munoko na mono yo vandaka sukadi bonso bwiki,+ kansi ntangu mono diaka yo, divumu na mono kumaka ndudi. 11 Mpi bo tubilaka mono nde: “Nge fwete bikula diaka mambu ya ke tadila bantu, makanda, bandinga, mpi bantotila mingi.”