Ezekiele

18 Ebuna ndinga ya Yehowa kwisilaka mono diaka nde: 2 “Kingana yai ya beno ke vutukila na insi ya Izraele ke tendula inki, ‘Batata me dia bambuma ya vinu ya ngani, kansi meno ya bana me kuma ngani’?+

3 “‘Ya kieleka mutindu mono kele na luzingu,’ Yehowa Mfumu ya Kuluta Nene muntu me tuba, ‘beno ta landa ve kuvutukila mambu yai na Izraele. 4 Tala! Mioyo* yonso—kele ya mono. Yo vanda moyo ya tata to moyo ya mwana—yo kele ya mono. Moyo* yina me sala disumu kele moyo yina ta fwa.

5 “‘Yindula nde muntu mosi kele muntu ya lunungu mpi yandi ke salaka mambu ya lunungu mpi ya mbote. 6 Yandi ke diaka ve bimenga ya bo ke pesaka na biteki na zulu ya bangumba;+ yandi ke tulaka ve ntima na biteki ya nzanzi* ya nzo ya Izraele; yandi ke bebisaka ve nkento ya nkweno na yandi+ mpi ke vukisaka ve nitu ti nkento na nsungi yina nkento ke mona menga;+ 7 yandi ke niokulaka ve ata muntu mosi,+ kansi yandi ke vutulaka kima yina muntu ya mfuka me simbisa yandi sambu na mfuka;+ yandi ke yibaka ata muntu mosi ve,+ kansi yandi ke pesaka madia na yandi mosi na muntu yina kele na nzala+ mpi ke fikaka muntu yina kele kinkonga lele;+ 8 yandi ke lombaka ve luta to ke defisaka ve sambu na kubaka mbongo mingi na zulu,+ kansi yandi ke buyaka kusala mambu ya kukonda lunungu;+ yandi ke sambisaka mambu na lunungu na kati ya muntu mosi ti muntu ya nkaka;+ 9 mpi yandi ke landaka kuzitisa bansiku na mono ti bankanu na mono sambu na kusala mambu na kwikama. Muntu ya mutindu yai kele muntu ya lunungu mpi yandi ta bikala kibeni na luzingu,’+ Yehowa Mfumu ya Kuluta Nene muntu me tuba.

10 “‘Kansi, yindula nde yandi me buta mwana yina kele muyibi,+ muntu ya ke fwaka bantu,*+ to muntu ya ke salaka diambu mosi na kati ya mambu yai ya nkaka 11 (ata tata me salaka ve ata diambu mosi na kati ya mambu yai)—yandi ke diaka bimenga ya bo ke pesaka na biteki na zulu ya bangumba, yandi ke bebisaka nkento ya nkweno na yandi, 12 yandi ke niokulaka muntu ya mpasi mpi nsukami,+ yandi ke bakaka bima na nzila ya muyibi, yandi ke vutulaka ve kima yina bo simbisaka yandi sambu na mfuka, yandi ke tulaka kivuvu na biteki ya nzanzi,+ yandi ke salaka mambu ya mbi,+ 13 yandi ke defisaka sambu na kubaka mbongo mingi na zulu mpi ke lombaka luta+—mwana yina ta bikala ve na luzingu. Sambu na mambu yai yonso ya nzanzi ya yandi me salaka, bo ta fwa yandi kibeni. Menga na yandi ta vanda na zulu na yandi.

14 “‘Kansi yindula nde tata mosi kele ti mwana yina me mona masumu yonso yina tata na yandi me salaka, kansi ata yandi me mona yo, yandi ke sala ve mambu ya mutindu yina. 15 Yandi ke diaka ve bimenga ya bo ke pesaka na biteki na zulu ya bangumba; yandi ke sambilaka ve biteki ya nzanzi ya nzo ya Izraele; yandi ke bebisaka ve nkento ya nkweno na yandi; 16 yandi ke niokulaka ve ata muntu mosi; yandi ke kangaka ve kima yina bo simbisaka yandi sambu na mfuka; yandi ke bakaka ata kima mosi ve na nzila ya muyibi; yandi ke pesaka madia na yandi mosi na muntu yina kele na nzala mpi ke fikaka muntu yina kele kinkonga lele; 17 yandi ke buyaka kuniokula nsukami; yandi ke defisaka ve sambu na kubaka mbongo mingi na zulu mpi ke lombaka ve luta; yandi ke zitisaka bankanu na mono ti bansiku na mono. Muntu ya mutindu yai ta fwa ve sambu na kifu ya tata na yandi. Yandi ta bikala kibeni na luzingu. 18 Kansi, sambu tata na yandi kusaka, yibaka mpangi na yandi, mpi salaka mambu ya mbi na kati ya bantu na yandi, yandi ta fwa sambu na kifu na yandi.

19 “‘Kansi beno ta tuba nde: “Sambu na nki mwana me nata ve makambu sambu na kifu ya tata na yandi?” Sambu mwana me sala mambu ya lunungu mpi ya kusungama, yandi me tanina bansiku na mono yonso mpi me zitisa yo, yandi ta bikala kibeni na luzingu.+ 20 Moyo* yina me sala disumu kele moyo yina ta fwa.+ Mwana ta nata ve makambu sambu na kifu ya tata na yandi, mpi tata ta nata ve makambu sambu na kifu ya mwana na yandi. Bo ta sambisa muntu ya lunungu na kutadila lunungu na yandi mosi, mpi bo ta sambisa muntu ya mbi na kutadila mbi na yandi mosi.+

21 “‘Ntangu yai, kana muntu ya mbi kuyambula masumu yonso yina yandi me salaka ebuna yandi zitisa bansiku na mono mpi yandi sala mambu ya lunungu ti ya mbote, yandi ta landa kuzinga. Yandi ta fwa ve.+ 22 Bo ta tangila yandi* ve ata diambu mosi ya mbi yina yandi me salaka.+ Yandi ta bikala na luzingu sambu yandi ke sala mambu yina kele ya lunungu.’+

23 “‘Keti mono ke waka kibeni kiese na lufwa ya muntu ya mbi?’+ Yehowa Mfumu ya Kuluta Nene muntu me tuba. ‘Keti mono ke zolaka ve mingi kuluta nde yandi yambula banzila na yandi ebuna yandi bikala na luzingu?’+

24 “‘Kansi kana muntu ya lunungu kuyambula lunungu na yandi mpi kusala mambu ya mbi,* ebuna yandi sala mambu yonso ya nzanzi yina muntu ya mbi ke salaka, keti yandi ta zinga? Bo ta yibuka ve ata diambu mosi ya lunungu yina yandi salaka.+ Yandi ta fwa sambu na kukonda kwikama na yandi mpi sambu na disumu yina yandi me sala.+

25 “‘Kansi beno ta tuba nde: “Mambu ya Yehowa ke salaka kele ya kukonda lunungu.”+ O nzo ya Izraele, mono ke bondila nge, wa! Keti yo kele mambu ya mono ke salaka me konda lunungu?+ Keti yo kele ve mambu ya beno ke salaka me konda lunungu?+

26 “‘Kana muntu ya lunungu kuyambula lunungu na yandi mpi kusala mambu ya mbi ebuna yandi fwa sambu na yo, yandi ta fwa sambu na mambu na yandi mosi ya mbi.

27 “‘Kana muntu ya mbi kuyambula mambu ya mbi yina yandi me salaka ebuna yandi yantika kusala mambu ya lunungu mpi ya kusungama, yandi ta gulusa luzingu* na yandi mosi.+ 28 Kana yandi bakisa mpi yandi yambula mambu yonso ya mbi yina yandi me salaka, yandi ta landa kuzinga. Yandi ta fwa ve.

29 “‘Kansi nzo ya Izraele ta tuba nde: “Mambu ya Yehowa ke salaka kele ya kukonda lunungu.” O nzo ya Izraele,+ keti yo kele kibeni mambu ya mono ke salaka me konda lunungu? Keti yo kele ve mambu ya beno ke salaka me konda lunungu?’

30 “‘Yo yina, O nzo ya Izraele, mono ta sambisa konso muntu na kati na beno na kutadila mambu yina yandi ke salaka,’+ Yehowa Mfumu ya Kuluta Nene muntu me tuba. ‘Beno yambula, ee, beno yambula kibeni mambu na beno yonso ya mbi, mpidina yo ta vanda ve kima ya ke budisa sakuba yina ta natila beno makambu. 31 Beno yambula mambu yonso ya mbi yina beno me salaka+ mpi beno baka* ntima ya mpa mpi mpeve ya mpa,+ sambu na nki beno fwete fwa,+ O nzo ya Izraele?’

32 “‘Mono ke waka ve kiese na lufwa ya konso muntu yina,’+ Yehowa Mfumu ya Kuluta Nene muntu me tuba. ‘Yo yina, beno kwisa kuvutuka mpi beno zinga.’”+