Bansangu ya Zole

17 Ebuna mwana na yandi Yehoshafati+ kumaka ntotila na kisika na yandi, mpi yandi kumisaka kiyeka na yandi ngolo na Izraele. 2 Yandi tulaka basoda na bambanza yonso ya ngolo ya Yuda mpi yandi tulaka bimvuka ya basoda na insi ya Yuda mpi na bambanza ya Efrayimi yina tata na yandi Aza botulaka.+ 3 Yehowa landaka kuvanda ti Yehoshafati sambu yandi tambulaka na banzila ya ntama ya nkaka na yandi Davidi+ mpi yandi sosaka ve Babaale. 4 Sambu yandi sosaka Nzambi ya tata na yandi+ mpi landaka* nsiku na yandi, kansi yandi landaka ve bifu ya Izraele.+ 5 Yehowa kumisaka kimfumu ngolo na maboko na yandi;+ Yuda ya mvimba landaka kupesa Yehoshafati makabu, mpi yandi vandaka ti bimvwama mpi nkembo mingi.+ 6 Ntima na yandi kumaka kikesa na banzila ya Yehowa, mpi yandi katulaka nkutu bisika ya kunanguka+ mpi banti ya santu*+ na Yuda.

7 Na mvula ya tatu ya luyalu na yandi, yandi tindaka bantu sambu na kubinga bamfumu yai: Bene-ayile, Obadia, Zekaria, Netanele, mpi Mikaya, sambu bo longa na bambanza ya Yuda. 8 Balevi yai vandaka ti bo: Shemaya, Netania, Zebadia, Asaele, Shemiramoti, Yehonatani, Adoniya, Tobiya, ti Tobi-adoniya, mpi banganga-nzambi Elishama ti Yehorami vandaka ti bo.+ 9 Bo yantikaka kulonga na Yuda, mpi bo nataka mukanda ya Nsiku ya Yehowa,+ ebuna bo kwendaka na bambanza yonso ya Yuda mpi vandaka kulonga bantu.

10 Ebuna boma ya Yehowa simbaka bimfumu yonso ya bansi yina vandaka na nziunga ya Yuda, mpi bo nwanisaka ve Yehoshafati. 11 Bantu ya Filistia natilaka Yehoshafati makabu ti mbongo bonso kitadi. Ba-arabi natilaka yandi mameme ya babakala 7 700 mpi bankombo ya babakala 7 700 yina bo bakaka na bitwisi na bo.

12 Yehoshafati vandaka kukuma kaka ngolo,+ mpi yandi landaka kutunga bisika ya ngolo+ mpi bambanza ya kubumba bima+ na Yuda. 13 Yandi salaka bisalu ya nene na bambanza ya Yuda, mpi yandi vandaka na basoda ya ngolo na Yeruzalemi. 14 Bo vukisaka bo na bimvuka na kutadila banzo ya batata na bo: na Yuda, bamfumu ya mafunda: mfumu Adnah, mpi basoda ya ngolo 300 000 vandaka ti yandi.+ 15 Mfumu Yehohanani vandaka na nsi ya lutwadisu na yandi, mpi bantu 280 000 vandaka ti yandi. 16 Mfumu Amasiah mwana ya Zikri vandaka mpi na nsi ya lutwadisu na yandi; Amasiah kudipesaka na luzolo yonso sambu na kisalu ya Yehowa, mpi basoda ya ngolo 200 000 vandaka ti yandi. 17 Mpi na Benyamini,+ Eliada, soda mosi ya ngolo, mpi bantu 200 000 yina vandaka ti minduki ya batolo-tolo mpi bitaninu vandaka ti yandi.+ 18 Mpi Yehozabadi vandaka na nsi ya lutwadisu na yandi, mpi bantu 180 000 yina vandaka ti binwaninu sambu na bitumba vandaka ti yandi. 19 Bantu yai vandaka kusadila ntotila, katula bantu yina ntotila tulaka na bambanza ya ngolo na Yuda ya mvimba.+