Yeremia

41 Na ngonda ya nsambwadi, Ismaele+ mwana ya Netania mwana ya Elishama, yina vandaka na dibuta ya kimfumu* mpi na kati ya bantu ya mfunu ya ntotila, kwisaka ti bantu kumi ya nkaka na Mispa+ kisika Gedalia mwana ya Ahikami vandaka. Ntangu bo vandaka kudia kumosi na Mispa, 2 Ismaele mwana ya Netania mpi bantu kumi yina vandaka ti yandi telamaka mpi fwaka Gedalia mwana ya Ahikami mwana ya Shafani na mbele ya bitumba. Yandi fwaka muntu yina ntotila ya Babilone pesaka kisalu ya kutala insi. 3 Ismaele fwaka mpi Bayuda yonso yina vandaka ti Gedalia na Mispa; yandi fwaka mpi basoda ya Kaldea yina vandaka pana.

4 Na kilumbu ya zole na nima ya lufwa ya Gedalia, na ntwala nde ata muntu mosi kuzaba yo, 5 bantu 80 yina katukaka na Shekemi,+ na Shilo,+ mpi na Samaria+ kwisaka. Mandefo na bo vandaka ya kuzenga, bilele na bo vandaka ya kupasuka-pasuka, bo me kudizenga-zenga,+ mpi bo vandaka ti makabu ya mbuma mpi ndumbu ya mpembe+ na maboko na bo sambu na kunata yo na nzo ya Yehowa. 6 Ebuna Ismaele mwana ya Netania basikaka na Mispa sambu na kukwenda kukutana ti bo, yandi vandaka kudila ntangu yandi ke tambula. Ntangu yandi kutanaka ti bo, yandi tubilaka bo nde: “Beno kwisa na Gedalia mwana ya Ahikami.” 7 Kansi ntangu bo kotaka na mbanza, Ismaele mwana ya Netania ti bantu na yandi fwaka bo mpi losaka bo na dibulu ya masa.

8 Kansi na kati ya bantu yina, bantu kumi tubilaka Ismaele nde: “Kufwa beto ve, sambu beto me bumba ble, orze, mafuta, mpi bwiki na nseke.” Yo yina yandi fwaka bo ve kumosi ti bampangi na bo. 9 Ebuna Ismaele losaka bamvumbi yonso ya bantu yina yandi fwaka na dibulu mosi ya nene ya masa, dibulu yina ntotila Aza salaka ntangu Basha ntotila ya Izraele+ vandaka kupesa yandi boma. Yo kele dibulu yina Ismaele mwana ya Netania fulusaka ti bantu yina yandi fwaka.

10 Ismaele kangaka bantu yonso yina bikalaka na Mispa,+ ti bana ya ntotila ya bankento mpi bantu yonso yina bikalaka na Mispa, bayina Nebuzaradani mfumu ya bantu yina ke kengilaka ntotila pesaka na maboko ya Gedalia+ mwana ya Ahikami. Ismaele mwana ya Netania kangaka bo mpi sabukaka sambu na kukwenda na ndambu ya bantu ya Amoni.+

11 Ntangu Yohanani+ mwana ya Karea mpi bamfumu yonso ya basoda yina vandaka ti yandi waka mambu yonso ya mbi yina Ismaele mwana ya Netania salaka, 12 bo bakaka bantu yonso mpi bo kwendaka kunwana ti Ismaele mwana ya Netania, mpi bo monaka yandi pene-pene ya bamasa ya nene* ya Gibeoni.

13 Bantu yonso yina vandaka ti Ismaele waka kiese ntangu bo monaka Yohanani mwana ya Karea mpi bamfumu yonso ya basoda ti yandi. 14 Ebuna bantu yonso yina Ismaele kangaka katuka na Mispa+ balukaka mpi vutukaka ti Yohanani mwana ya Karea. 15 Kansi Ismaele mwana ya Netania mpi bantu na yandi nana tinaka Yohanani mpi kwendaka na bantu ya Amoni.

16 Yohanani mwana ya Karea mpi bamfumu yonso ya basoda yina vandaka ti yandi bakaka bantu yina bikalaka na Mispa, bayina bo gulusaka na maboko ya Ismaele mwana ya Netania na nima ya ntangu yina yandi fwaka Gedalia+ mwana ya Ahikami. Bo vutulaka babakala, basoda, bankento, bana, mpi bakapita ya nzo ya ntotila katuka na Gibeoni. 17 Ebuna bo kwendaka mpi zingaka na kisika ya kulala yina vandaka na Kimami pene-pene ya Betelemi,+ ti lukanu ya kukwenda na Ezipte+ 18 sambu na bantu ya Kaldea. Bo kumaka kuwa bo boma, sambu Ismaele mwana ya Netania fwaka Gedalia mwana ya Ahikami, yina ntotila ya Babilone pesaka kisalu ya kutala insi.+