Kusonga ya Yoane

18 Na nima, mono monaka wanzio ya nkaka ke kulumuka katuka na zulu, yandi vandaka ti kiyeka ya nene, mpi nkembo na yandi pesaka nsemo na ntoto. 2 Yandi bokaka nde: “Yandi me bwa! Babilone ya Nene me bwa,+ mpi yandi me kuma kisika yina bademo ke zingaka, mpi kisika yina bampeve yonso ya mvindu* mpi bandeke yonso ya mvindu mpi ya bo ke mengaka ke bumbanaka!+ 3 Sambu na vinu ya nzala ya ngolo* ya pite* na yandi, makanda yonso lawukaka,+ mpi bantotila ya ntoto salaka pite ti yandi,+ mpi bantu ya mumbongo ya ntoto kumaka bamvwama na ngolo ya bima mingi ya ntalu yina yandi ke wila ve nsoni.”

4 Mono waka ndinga ya nkaka ke katuka na zulu mpi ke tuba nde: “Bantu na mono,+ beno basika na kati na yandi kana beno ke zola ve kuvukana na masumu na yandi, mpi kana beno ke zola ve kubaka ndambu ya bampasi na yandi.+ 5 Sambu masumu na yandi me kuma mingi kibeni mpi yo me tombuka tii na zulu,+ mpi Nzambi me yibuka bisalu na yandi ya kukonda lunungu.*+ 6 Beno futa yandi mutindu yandi sadilaka bankaka mambu,+ ee, beno futa yandi mbala zole mambu yina yandi salaka;+ na dikopa+ yina yandi vukisaka vinu, beno vukisila yandi makabu zole.+ 7 Na kiteso yina yandi kudikumisaka mpi zingaka ti bima mingi ya ntalu yina yandi vandaka kuwila ve nsoni, na kiteso yo yina beno pesa yandi mpasi mpi mawa. Sambu yandi ke landa kutuba na ntima na yandi nde: ‘Mono me vanda bonso ntotila-nkento, mono kele ve mufwidi, mpi mono ta wa ve mawa ata fioti.’+ 8 Yo yina bampasi na yandi ta kwisa na kilumbu mosi: lufwa, mawa, mpi nzala, mpi bo ta yoka yandi ya mvimba na tiya,+ sambu Yehowa* Nzambi, muntu yina me sambisa yandi, kele ngolo.+

9 “Mpi bantotila ya ntoto yina salaka pite* ti yandi mpi zingaka ti yandi ti bima mingi ya ntalu yina yandi vandaka kuwila ve nsoni ta dila mpi ta kudibula na mawa sambu na yandi, ntangu bo ta mona midinga ya kuzika na yandi. 10 Bo ta telama ntama sambu bo ta vanda na boma sambu na mpasi na yandi ebuna bo ta tuba nde: ‘Mawa kibeni, mawa kibeni, nge mbanza ya nene,+ nge Babilone mbanza ya ngolo, sambu na ngunga mosi mpamba lusambisu na nge me kwisa!’

11 “Diaka, bantu ya mumbongo ya ntoto ke dila mpi ke wa mawa sambu na yandi, sambu muntu ya kusumba bima na bo yonso kele diaka ve, 12 bima yonso ya wolo, ya arza, ya matadi ya ntalu, ya mayaka, ya lino ya kitoko, ya bilele ya mbwaki-ble, ya bilele ya swa, mpi ya bilele ya mbwaki ya ngolo; mpi bima yonso ya bo me salaka na mabaya ya nsudi ya kitoko, bima yonso ya bo me salaka na meno ya nzioko, na mabaya ya ntalu, na kwivre, na kibende mpi na matadi ya marbre; 13 diaka, sinamome, bima ya kulambila ya nsudi ya kitoko ya India, ndumbu, mafuta ya nsudi ya kitoko, ndumbu ya mpembe, vinu, mafuta ya olive, fufu ya kitoko, ble, bangombe, mameme, bampunda, bapusu-pusu yina bampunda ke bendaka, bampika, mpi luzingu* ya bantu. 14 Ee, mbuma ya kitoko yina nge* zolaka me tina nge, mpi madia ya kitoko ti bima na nge ya kitoko me vila, mpi bo ta mona yo diaka ve.

15 “Bantu ya mumbongo yina tekaka bima yai, yina kumaka bamvwama na nzila na yandi, ta telama ntama sambu bo ta vanda na boma sambu na mpasi na yandi, bo ta dila, bo ta wa mawa, 16 mpi bo ta tuba nde: ‘Mawa kibeni, mawa kibeni, mbanza ya nene, yina me lwata lino ya kitoko mpi bilele ya mbwaki-ble mpi ya mbwaki ya ngolo, mpi yina me lwata bima ya ntalu mingi ya kitoko ti bima ya wolo mpi matadi ya ntalu mpi mayaka,+ 17 sambu na ngunga mosi bo me bebisa kimvwama ya mingi ya mutindu yai!’

“Ebuna bakapitene yonso ya maswa, bantu yonso ya ke salaka nzietelo na maswa, bantu yonso ya ke salaka na maswa, mpi bantu yonso yina ke salaka na nzadi-mungwa sambu na kuzwa bima ya kuzingila, telamaka ntama 18 mpi bo bokaka ntangu bo vandaka kutala midinga ya kuzika na yandi mpi tubaka nde: ‘Ata mbanza mosi ve me fwanana ti mbanza yai ya nene!’ 19 Bo losaka putulu na ba-ntu na bo mpi bo bokaka, bo dilaka, bo waka mawa, mpi bo tubaka nde: ‘Mawa kibeni, mawa kibeni, mbanza ya nene, yina na kati na yo bantu yonso yina vandaka ti bamaswa na nzadi-mungwa kumaka bamvwama sambu na kimvwama na yandi, mpamba ve na ngunga mosi bo me bebisa bima na yandi yonso!’+

20 “O zulu,+ wa kiese sambu na yandi, mpi beno basantu+ ti bantumwa mpi bambikudi, beno wa kiese, sambu Nzambi me pesa yandi ndola sambu na mambote na beno!”+

21 Mpi wanzio mosi ya ngolo tombulaka ditadi mosi ya kele bonso ditadi ya nene ya bo ke nikilaka bambuma, yandi losaka yo na nzadi-mungwa, mpi tubaka nde: “Yai mutindu bo ta losa Babilone mbanza ya nene na mbala mosi, mpi bo ta mona yandi diaka ve.+ 22 Mungungu ya miyimbi-bankunga yina ke yimbaka ti bakidare, ya bantu yina ke bulaka miziki, ya bantu yina ke bulaka musembu, mpi ya bantu yina ke bulaka mpungi, bo ta wa yo diaka ve na kati na nge. Mpi bo ta mona diaka ve na kati na nge ata muntu mosi ya ke salaka bisalu ya maboko ya konso mutindu yina, mpi bo ta wa diaka ve na kati na nge makelele ya ditadi ya nene ya bo ke nikilaka bambuma. 23 Ata nsemo mosi ya mwinda ta pela diaka ve na kati na nge, mpi bo ta wa diaka ve na kati na nge ata ndinga mosi ya bakala yina ke kwela to ya nkento yina ke kwela. Sambu bantu na nge ya mumbongo vandaka bantu ya lukumu ya ntoto, sambu nge kusaka makanda yonso na bisalu na nge ya bampeve ya mbi.+ 24 Ya kieleka, na kati na yandi bo monaka menga ya bambikudi mpi ya basantu+ mpi ya bantu yonso yina bo me fwaka na ntoto.”+