Bansangu ya Ntete

29 Ebuna ntotila Davidi tubilaka dibundu ya mvimba nde: “Mwana na mono Salomo, muntu yina Nzambi me sola,+ kele leke mpi yandi me zaba mambu mingi ve,*+ mpi kisalu kele mingi, sambu yo kele ve tempelo* ya muntu, kansi ya Yehowa Nzambi.+ 2 Mono me sala ngolo kibeni sambu na kuyidika bima sambu na nzo ya Nzambi na mono; mono me pesa wolo sambu na kisalu ya wolo, arza sambu na kisalu ya arza, kwivre sambu na kisalu ya kwivre, bibende sambu na kisalu ya bibende,+ mabaya+ sambu na kisalu ya mabaya, matadi ya oniksi, mpi matadi yina bo ta tula ti poto-poto, matadi ya fioti-fioti ya mikubu sambu na kusadila bifwanisu, mpi matadi ya ntalu ya mutindu na mutindu, mpi matadi mingi kibeni ya albatre. 3 Diaka, sambu mono ke wa kiese sambu na nzo ya Nzambi na mono,+ kele mpi ti wolo mpi arza ya me katuka na bima na mono mosi ya ntalu+ yina mono ke pesa sambu na nzo ya Nzambi na mono, na zulu ya bima yina mono me yidika sambu na nzo ya santu, 4 mpi batalanta* ya wolo 3 000 ya Ofire+ mpi batalanta 7 000 ya arza ya bunkete, sambu na kupakula bibaka ya banzo yina, 5 wolo sambu na kisalu ya wolo mpi arza sambu na kisalu ya arza, mpi sambu na kisalu yonso yina bantu ya bisalu ya maboko fwete sala. Ntangu yai, nani kele ti luzolo ya mbote sambu yandi kwisa bubu yai na ntwala ti dikabu na maboko sambu na Yehowa?”+

6 Yo yina, bamfumu ya banzo ya batata, bamfumu ya makanda ya Izraele, bamfumu ya mafunda mpi ya bankama,+ mpi bamfumu ya mumbongo ya ntotila+ kwisaka na ntwala na luzolo na bo mosi. 7 Mpi bo pesaka bima yai sambu na kisalu ya nzo ya Nzambi ya kieleka: batalanta 5 000 ya wolo, badariki* 10 000, batalanta 10 000 ya arza, batalanta 18 000 ya kwivre, mpi batalanta 100 000 ya bibende. 8 Konso muntu yina vandaka ti matadi ya ntalu pesaka yo na kisika ya kubumba bimvwama ya nzo ya Yehowa, yina Yehiele+ mwana ya Gershoni+ vandaka kutala. 9 Bantu vandaka na kiese na kupesa makabu yai ya luzolo ya mbote, sambu bo pesaka makabu ya luzolo ya mbote na Yehowa na ntima ya mvimba,+ mpi ntotila Davidi waka kiese mingi.

10 Na nima Davidi kumisaka Yehowa na meso ya dibundu ya mvimba. Yandi tubaka nde: “O Yehowa Nzambi ya tata na beto Izraele, bika nde bo kumisa nge mvula na mvula.* 11 O Yehowa, bunene,+ ngolo,+ kitoko, lukumu, mpi nkembo kele ya nge,+ sambu bima yonso ya kele na zulu mpi na ntoto kele ya nge.+ Kimfumu kele ya nge, O Yehowa.+ Nge kele Muntu yina me kudinangula bonso mfumu na zulu ya yonso. 12 Bimvwama mpi nkembo ke katukaka na nge,+ mpi nge ke yalaka bima yonso;+ kiyeka+ mpi ngolo+ kele na diboko na nge, mpi diboko na nge lenda kumisa bantu yonso bantu ya nene+ mpi lenda pesa bo ngolo.+ 13 Ebuna ntangu yai, Nzambi na beto, beto ke pesa nge matondo mpi ke kumisa zina na nge ya kitoko.

14 “Kansi mono kele nani mpi bantu na mono kele banani, sambu beto pesa nge makabu ya luzolo ya mbote bonso yai? Sambu bima yonso ke katukaka na nge, mpi beto me pesa nge bima yina me katuka na diboko na nge mosi. 15 Sambu beto kele banzenza na ntwala na nge mpi bantu yina me katukaka na insi ya nkaka, kaka bonso ba-nkaka na beto yonso.+ Sambu bilumbu na beto na ntoto kele bonso kivudi+—kukonda kivuvu. 16 O Yehowa Nzambi na beto, kimvwama yai yonso ya beto me yidika sambu na kutungila nge nzo sambu na zina na nge ya santu me katuka na diboko na nge mosi, mpi yonso kele ya nge. 17 O Nzambi na mono, mono me zaba mbote nde nge ke talaka ntima+ mpi nde nge ke waka kiese na kwikama.*+ Na kusungama* ya ntima na mono, mono me pesa bima yai yonso na luzolo yonso, mpi mono kele na kiese mingi ya kumona bantu na nge yina kele awa ke pesa nge makabu ya luzolo ya mbote. 18 O Yehowa, Nzambi ya Abrahami, ya Izaki, mpi ya Izraele, ba-nkaka na beto, sala nde banzala yai mpi mabanza yai kuvanda na bantima ya bantu na nge kimakulu, mpi twadisa bantima na bo na nge.+ 19 Mpi pesa mwana na mono Salomo ntima+ ya mvimba,* sambu yandi zitisa bantuma na nge,+ bangibusa na nge, ti bansiku na nge, mpi yandi sala mambu yai yonso, mpi yandi tunga tempelo* yina mono me yidika bima sambu na yo.”+

20 Ebuna Davidi tubilaka dibundu ya mvimba nde: “Beno kumisa Yehowa Nzambi na beno ntangu yai.” Mpi dibundu ya mvimba kumisaka Yehowa Nzambi ya ba-nkaka na bo, fukamaka, mpi bwaka luse na ntoto na ntwala ya Yehowa mpi ya ntotila. 21 Bo landaka kupesa Yehowa bimenga mpi kupesa Yehowa makabu ya kuyoka+ na kilumbu yina landaka, bana-bangombe ya babakala 1 000, mameme ya babakala 1 000, bana-mameme ya babakala 1 000, mpi makabu na bo ya malafu;+ bo pesaka bimenga mingi kibeni sambu na Izraele ya mvimba.+ 22 Kilumbu yina, bo landaka kudia mpi kunwa na ntwala ya Yehowa ti kiese mingi,+ mpi sambu na mbala ya zole bo tulaka Salomo mwana ya Davidi ntotila mpi bo tulaka yandi mafuta na ntwala ya Yehowa bonso ntwadisi;+ bo tulaka mpi Zadoki nganga-nzambi.+ 23 Salomo vandaka na kiti ya kimfumu ya Yehowa+ bonso ntotila na kisika ya tata na yandi Davidi, yandi vandaka kununga, mpi bantu yonso ya Izraele vandaka kulemfukila yandi. 24 Bamfumu yonso,+ basoda ya ngolo,+ mpi bana yonso ya ntotila Davidi+ kuditulaka na nsi ya kiyeka ya ntotila Salomo. 25 Mpi Yehowa kumisaka Salomo nene mingi kibeni na meso ya Izraele ya mvimba mpi pesaka yandi lukumu ya kimfumu na kiteso yina ntotila mosi ve ya Izraele me vandaka ntete ti yo na ntwala na yandi.+

26 Davidi mwana ya Yese yalaka Izraele ya mvimba, 27 mpi ntangu* yina yandi yalaka Izraele vandaka bamvula 40. Na Ebroni yandi yalaka bamvula 7,+ mpi na Yeruzalemi yandi yalaka bamvula 33.+ 28 Yandi fwaka na nima ya kuzinga luzingu mosi ya mbote mpi ya nda,+ ti kimvwama, mpi nkembo; ebuna mwana na yandi Salomo kumaka ntotila na kisika na yandi.+ 29 Sambu na disolo ya luzingu ya ntotila Davidi, katuka na luyantiku tii na nsuka, bo me sonikaka yo na masonama ya Samuele, muntu ya ke monaka mambu, ya mbikudi Natani,+ mpi ya Gadi,+ muntu ya ke monaka bambona-meso, 30 kumosi ti kimfumu na yandi yonso, ti ngolo na yandi, mpi ti mambu yina salamaka na ntangu na yandi, na Izraele, mpi na bimfumu yonso ya nziunga.