Kubasika

19 Na ngonda ya tatu na nima ya ntangu yina bantu ya Izraele basikaka na insi ya Ezipte, na kilumbu yina kibeni, bo kwisaka kukuma na ntoto-makanga ya Sinai. 2 Bo katukaka na Refidimi,+ kumaka na ntoto-makanga ya Sinai, mpi bo salaka camp na ntoto-makanga. Izraele salaka camp pana na ntwala ya ngumba.+

3 Ebuna Moize tombukaka na Nzambi ya kieleka, mpi Yehowa bingaka yandi tuka na ngumba,+ mpi tubaka nde: “Nge ta tubila nzo ya Yakobi mpi ta songa bantu ya Izraele nde, 4 ‘Beno me mona beno mosi mambu yina mono salaka bantu ya Ezipte,+ sambu na kubaka beno na mapapu ya bango-zulu mpi kunata beno tii na mono.+ 5 Ebuna kana beno lemfukila kibeni ndinga na mono mpi beno zitisa kuwakana na mono, beno ta kuma kibeni kima na mono ya mfunu mingi* na kati ya bantu yonso,+ sambu ntoto ya mvimba kele ya mono.+ 6 Beno ta kuma sambu na mono kimfumu ya banganga-nzambi mpi dikanda ya santu.’+ Yai mambu yina nge ta tubila bantu ya Izraele.”

7 Yo yina Moize kwendaka mpi bingaka bankuluntu ya bantu mpi zabisaka bo mambu yai yonso yina Yehowa songaka yandi.+ 8 Na nima, bantu yonso vutulaka na ndinga mosi nde: “Beto me ndima kusala mambu yonso yina Yehowa me tuba.”+ Na mbala mosi Moize nataka mvutu ya bantu na Yehowa. 9 Mpi Yehowa tubilaka Moize nde: “Tala! Mono ke kwisa na nge na dituti ya ndombe, sambu bantu kuwa ntangu mono ta solula ti nge, sambu bo kwikila mpi na nge ntangu yonso.” Na nima Moize zabisaka Yehowa mambu yina bantu tubaka.

10 Ebuna Yehowa tubilaka Moize nde: “Kwenda na bantu, santisa bo bubu yai ti mbasi, mpi bo fwete yobisa bilele na bo. 11 Bo fwete vanda ya kuyilama sambu na kilumbu ya tatu, sambu na kilumbu ya tatu Yehowa ta kwisa kukulumuka na Ngumba ya Sinai na meso ya bantu yonso. 12 Nge fwete tudila bantu bandilu na nziunga na yo mpi kusonga bo nde, ‘Beno keba, beno tombuka ve na ngumba mpi beno simba ve ndilu na yo. Konso muntu yina ta simba ngumba bo ta fwa yandi kibeni. 13 Ata diboko mosi ve ta simba yandi, kansi bo ta losila yandi matadi to ta tobula yandi.* Yo vanda mbisi to muntu, yandi ta zinga ve.’+ Kansi kana bo wa makelele ya kibongo ya dimeme ya bakala,+ bo lenda tombuka na ngumba.”

14 Ebuna Moize katukaka na ngumba mpi kulumukaka kisika bantu vandaka, mpi yandi yantikaka kusantisa bantu, mpi bo yobisaka bilele na bo.+ 15 Yandi tubilaka bantu nde: “Beno vanda ya kuyilama sambu na kilumbu ya tatu. Beno vukisa ve nitu ti bankento.”*

16 Na suka ya kilumbu ya tatu, makelele ya mvula mpi nsemo ya nzasi vandaka, mpi dituti mosi ya nene+ vandaka na zulu ya ngumba ti makelele ya ngolo kibeni ya kibongo, ebuna bantu yonso na camp yantikaka kutekita.+ 17 Ebuna Moize basisaka bantu na nganda ya camp sambu na kukutana ti Nzambi ya kieleka, mpi bo kwendaka kutelama na nsi ya ngumba. 18 Ngumba ya Sinai fulukaka na midinga, sambu Yehowa kulumukaka na zulu na yo na kati ya tiya;+ mpi midinga na yo vandaka kutombuka bonso midinga ya fulu, mpi ngumba ya mvimba vandaka kunikana ngolo.+ 19 Ntangu makelele ya kibongo vandaka kukuma kaka ngolo, Moize tubaka, ebuna ndinga ya Nzambi ya kieleka pesaka yandi mvutu.

20 Yehowa kwisaka kukulumuka na Ngumba ya Sinai, na nsongi ya ngumba. Ebuna Yehowa bingaka Moize na nsongi ya ngumba, mpi Moize tombukaka.+ 21 Ebuna Yehowa tubilaka Moize nde: “Kulumuka mpi kebisa bantu sambu bo meka ve kusabuka bandilu sambu na kukwisa kutala Yehowa, kana ve bantu mingi na kati na bo ta fwa. 22 Bika nde banganga-nzambi yina ke pusanaka mbala na mbala pene-pene ya Yehowa kudisantisa, sambu Yehowa kufwa bo ve.”+ 23 Ebuna Moize tubaka na Yehowa nde: “Bantu lenda tombuka ve na Ngumba ya Sinai sambu nge kebisaka beto tuka ntama nde, ‘Tula bandilu na nziunga ya ngumba mpi santisa yo.’”+ 24 Kansi, Yehowa tubilaka yandi nde: “Kwenda, kulumuka, mpi kwisa kutombuka diaka, nge ti Aroni, kansi kubika ve nde banganga-nzambi mpi bantu kusabuka bandilu sambu na kutombuka na Yehowa, na mpila nde yandi fwa bo ve.”+ 25 Yo yina, Moize kulumukaka kisika bantu vandaka mpi songaka bo mambu yina.