Ezekiele

4 “Ebuna nge, mwana ya muntu, baka briki mosi mpi tula yo na ntwala na nge. Sala mbanza mosi na zulu na yo—Yeruzalemi. 2 Ziunga yo,+ tunga kibaka sambu na kunwanisa yo,+ sala mwa-ngumba ya ntoto na nziunga na yo,+ tula bacamp na nziunga na yo, mpi ziunga yo ti bima ya kubukila bakielo ya nene.+ 3 Baka kikalungu ya kibende mpi tula yo bonso kibaka ya kibende na kati-kati na nge ti mbanza. Na nima, tula luse na nge na mpila nde yo talana ti mbanza, ebuna bo ta ziunga yo; nge fwete botula yo. Yai kele kidimbu sambu na nzo ya Izraele.+

4 “Ebuna nge fwete lala na ndambu ya diboko na nge ya kimama mpi kunata makambu ya nzo ya Izraele na zulu na nge.*+ Nge ta nata makambu na bo bilumbu yonso yina nge ta lala na ndambu ya diboko na nge. 5 Mono ta tudila nge bilumbu 390, yina me fwanana ti bamvula ya makambu na bo,+ ebuna nge ta nata makambu ya nzo ya Izraele. 6 Nge fwete lungisa yo.

“Ebuna sambu na mbala ya zole nge ta lala na ntoto, na ndambu ya diboko na nge ya kitata, mpi nge ta nata makambu ya nzo ya Yuda+ bilumbu 40. Kilumbu mosi sambu na mvula mosi, kilumbu mosi sambu na mvula mosi, yo kele kima ya mono me pesa nge. 7 Mpi nge ta balula luse na nge na ndambu yina bo me ziunga Yeruzalemi+ ti diboko na nge ya kukonda kufika, ebuna nge fwete bikula mambu ya mbi sambu na yo.

8 “Tala! Mono ta kanga nge bansinga na mpila nde nge baluka ve na ndambu mosi ya diboko na nge sambu na kulala na ndambu ya nkaka ya diboko na nge tii kuna nge ta lungisa bilumbu ya kuziunga na nge.

9 “Nge fwete baka ble, orze, madesu ya nene, madesu ya fioti, mpondo, ti ble ya mutindu ya nkaka,* mpi kutula yo na kati ya dilonga mosi mpi kusala yo mampa sambu na nge mosi. Nge ta dia yo bilumbu yonso yina nge ta lala na ndambu ya diboko na nge, bilumbu 390.+ 10 Nge ta tesa mpi ta dia bashekele* 20 ya madia konso kilumbu. Nge ta dia yo na bantangu ya sikisiki.

11 “Nge ta nwa masa yina bo ta tesila nge, ndambu mosi na kati ya bandambu sambanu ya hini.* Nge ta nwa yo na bantangu ya sikisiki.

12 “Nge ta dia yo mutindu nge ke diaka dimpa ya kele bonso dimbuma ya bo me sala ti orze; nge ta yoka yo na meso na bo, mpi nge ta sadila tufi ya kuyuma ya bantu bonso kima ya kupedisila tiya.” 13 Yehowa tubaka diaka nde: “Yai kele mutindu bantu ya Izraele ta dia dimpa na bo—ya mvindu—na kati ya makanda kisika yina mono ta panza bo.”+

14 Ebuna mono tubaka nde: “Yina ve, Yehowa Mfumu ya Kuluta Nene! Katuka kileke na mono tii bubu yai, mono me* kudikumisaka ve mvindu na kudia musuni ya mbisi mosi ya bo me mona ya kufwa to ya mbisi mosi ya bo me pasula-pasula,+ mpi ata musuni mosi ve ya mvindu* me kotaka na munoko na mono.”+

15 Yo yina, yandi tubilaka mono nde: “Yo kele mbote, mono ta pesa nge nswa ya kusadila tufi ya bangombe na kisika ya tufi ya bantu, mpi nge ta yoka dimpa na nge na zulu na yo.” 16 Ebuna, yandi tubilaka mono nde: “Mwana ya muntu, tala, mono ke zenga kima ya ke pesaka nge madia* na Yeruzalemi,+ mpi na mpasi ya ngolo bo ta dia dimpa na bo ya bo ta tesila bo,+ mpi na boma ya ngolo bo ta nwa masa na bo ya bo ta tesila bo.+ 17 Diambu yai ta salama sambu ntangu bo ta konda dimpa mpi masa, bo ta talana ti kuyituka mpi bo ta konda sambu na kifu na bo.