Bansangu ya Zole

5 Salomo manisaka kisalu yonso yina yo lombaka nde yandi sala sambu na nzo ya Yehowa.+ Na nima, yandi bakaka bima yina tata na yandi Davidi kumisaka santu+ mpi yandi kotisaka yo na nzo yina, ebuna yandi tulaka arza, wolo, mpi bima yonso na bisika ya kubumba bimvwama ya nzo ya Nzambi ya kieleka.+ 2 Na ntangu yina, Salomo vukisaka bankuluntu ya Izraele, bamfumu yonso ya makanda, bamfumu ya banzo ya batata ya Izraele. Bo kwisaka na Yeruzalemi sambu na kubaka sanduku ya kuwakana ya Yehowa na Mbanza ya Davidi,+ disongidila, Sioni,+ mpi kutombuka ti yo. 3 Bantu yonso ya Izraele vukanaka na ntwala ya ntotila na nkinsi* yina bo ke salaka na ngonda ya nsambwadi.+

4 Yo yina bankuluntu yonso ya Izraele kwisaka, mpi Balevi tombulaka Sanduku.+ 5 Bo tombukaka ti Sanduku, tenta ya lukutakanu,+ mpi bisadilu yonso ya santu yina vandaka na tenta. Banganga-nzambi mpi Balevi* tombukaka ti yo. 6 Ntotila Salomo mpi kimvuka ya mvimba ya bantu ya Izraele yina yandi bingaka sambu na kukutana ti yandi vandaka na ntwala ya Sanduku. Bo vandaka kutambika+ mameme ti bangombe mingi kibeni yo yina bo lendaka ve kuzaba ntalu na yo to kutanga yo. 7 Ebuna banganga-nzambi nataka sanduku ya kuwakana ya Yehowa na kisika na yo, na suku ya kati kibeni ya nzo, Kisika ya Kuluta Santu, na nsi ya mapapu ya basherube.+ 8 Mapapu ya basherube vandaka ya kutandula na zulu ya kisika yina Sanduku vandaka, yo yina basherube fikaka Sanduku mpi banti na yo,+ na zulu. 9 Banti yina vandaka nda mingi yo yina bansongi na yo vandaka kumonana na Kisika ya Santu na ntwala ya suku ya kati kibeni, kansi yo vandaka kumonana ve na nganda. Mpi yo kele kuna tii bubu yai. 10 Kima mosi ve vandaka na kati ya Sanduku katula kaka matadi zole yina Moize tulaka kuna na Orebi,+ ntangu Yehowa salaka kuwakana+ ti bantu ya Izraele ntangu bo vandaka kubasika na Ezipte.+

11 Ntangu banganga-nzambi basikaka na kisika ya santu (sambu banganga-nzambi yonso yina vandaka pana kudikumisaka santu,+ kukonda kutadila bimvuka na bo),+ 12 Balevi yonso yina vandaka miyimbi-bankunga+ mpi vandaka na kimvuka ya Asafi,+ ya Emani,+ ya Yedutuni,+ mpi ya bana na bo ti ya bampangi na bo vandaka me lwata bilele ya kitoko; bo vandaka ti basembale, bima ya kubudila miziki ya kele ti bansinga, mpi bakidare; bo vandaka ya kutelama na ndambu ya esti ya mesa-kimenga, mpi banganga-nzambi 120 yina vandaka kumosi ti bo vandaka kubula bampungi.+ 13 Ntangu bantu yina ke bulaka bampungi ti miyimbi-bankunga vandaka kukumisa mpi kupesa Yehowa matondo na bumosi, mpi ntangu makelele ya bampungi, ya basembale, mpi ya bima ya nkaka ya kubudila miziki tombukaka na zulu ntangu bo vandaka kukumisa Yehowa, “sambu yandi kele mbote; zola na yandi ya kwikama ke zingaka kimakulu,”+ nzo, disongidila nzo ya Yehowa, fulukaka na dituti.+ 14 Banganga-nzambi vandaka ve na mpila ya kulanda kusala kisalu na bo sambu na dituti yina, sambu nkembo ya Yehowa fulukaka na nzo ya Nzambi ya kieleka.+