Yeremia

35 Yai mambu ya katukaka na Yehowa yina kwisilaka Yeremia na bilumbu ya Yehoyakimi+ mwana ya Yoziasi, ntotila ya Yuda: 2 “Kwenda na nzo ya bantu ya dikanda ya Rekabi,+ solula ti bo, mpi nata bo na nzo ya Yehowa, na suku mosi na kati ya basuku ya kudila madia;* ebuna pesa bo vinu bo nwa.”

3 Yo yina, mono nataka Yaazania mwana ya Yeremia mwana ya Abasinia, bampangi na yandi, bana na yandi yonso, mpi nzo ya mvimba ya bantu ya dikanda ya Rekabi 4 na nzo ya Yehowa. Mono nataka bo na suku ya kudila madia ya bana ya Hanane mwana ya Yigdalia, muntu ya Nzambi ya kieleka, yina vandaka pene-pene ya suku ya kudila madia ya bamfumu, yina vandaka na zulu ya suku ya kudila madia ya Maaseya mwana ya Shalumi, nkengidi ya kielo. 5 Na nima, mono tulaka makopa mpi makopa ya nene ya kufuluka ti vinu na ntwala ya bantu ya nzo ya dikanda ya Rekabi mpi mono tubilaka bo nde: “Beno nwa vinu.”

6 Kansi bo tubaka nde: “Beto ta nwa ve vinu, sambu Yehonadabi*+ mwana ya Rekabi, nkaka na beto, pesaka beto nsiku yai, ‘Yo vanda beno to bana na beno, beno fwete nwa ve vinu. 7 Mpi beno fwete tunga ve nzo, kukuna ve mbuma, mpi kukuna ve to kusumba ve kilanga ya vinu. Kansi, beno fwete zinga ntangu yonso na batenta, sambu beno zinga ntangu mingi na insi yina beno ke zinga bonso banzenza.’ 8 Yo yina, beto ke landaka kulemfukila ndinga ya Yehonadabi mwana ya nkaka na beto Rekabi na mambu yonso yina yandi songaka beto, na mutindu beto ke nwaka ve vinu ata fioti—beto, bankento na beto, bana na beto ya babakala, mpi bana na beto ya bankento. 9 Beto ke tungaka ve banzo sambu na kuzinga na kati na yo, mpi beto kele ve ti bilanga ya vinu, to bilanga, to mbuma. 10 Beto ke landaka kuzinga na batenta mpi kulemfuka na mambu yonso yina nkaka na beto Yehonadabi* songaka beto. 11 Kansi, ntangu Nebukadenezare* ntotila ya Babilone tombukaka sambu na kunwanisa insi yai,+ beto tubaka nde, ‘Beno kwisa, beto kwenda na Yeruzalemi sambu na kutina basoda ya bantu ya Kaldea mpi ya bantu ya Siria, mpi ntangu yai beto ke zinga na Yeruzalemi.’”

12 Ebuna ndinga ya Yehowa kwisilaka Yeremia nde: 13 “Yehowa ya makesa, Nzambi ya Izraele, ke tuba nde, ‘Kwenda kusonga bantu ya Yuda mpi bantu ya Yeruzalemi nde: “Keti bo vandaka ve kulongisila beno mbala na mbala na kuzitisa bangogo na mono?”+ Yehowa muntu me tuba. 14 “Yehonadabi mwana ya Rekabi songaka bana na yandi na kunwa ve vinu, mpi bo ke zitisaka bangogo na yandi na mutindu bo ke nwaka ve vinu tii bubu yai, mpi na mutindu yina bo ke zitisaka nsiku ya nkaka na bo.+ Kansi, mono me tubilaka beno mbala na mbala,* ata mpidina beno me lemfukilaka mono ve.+ 15 Mpi mono landaka kutindila beno bansadi na mono yonso bambikudi, mono vandaka kutinda bo mbala na mbala*+ sambu na kutuba nde, ‘Pardo, beno vutuka, konso muntu kuyambula banzila na yandi ya mbi,+ mpi beno sala mambu ya mbote! Beno landa ve banzambi ya nkaka mpi beno sadila bo ve. Ebuna beno ta landa kuzinga na insi yina mono pesaka beno mpi ba-nkaka na beno.’+ Kansi beno tulaka ve dikutu mpi beno wilaka mono ve. 16 Bana ya Yehonadabi mwana ya Rekabi me zitisaka nsiku yina nkaka na bo pesaka bo,+ kansi bantu yai me wilaka mono ve.”’”

17 “Yo yina, Yehowa, Nzambi ya makesa, Nzambi ya Izraele, ke tuba nde: ‘Tala, mono ke natila Yuda mpi bantu yonso ya Yeruzalemi bampasi yonso yina mono kebisaka bo sambu na yo,+ sambu mono tubilaka bo, kansi bo vandaka kuwa ve, mpi mono landaka kubinga bo, kansi bo vandaka kundima ve.’”+

18 Ebuna Yeremia tubilaka bantu ya nzo ya dikanda ya Rekabi nde: “Yehowa ya makesa, Nzambi ya Izraele, ke tuba nde, ‘Sambu beno me zitisaka nsiku ya nkaka na beno Yehonadabi mpi beno ke landa kuzitisa bansiku na yandi yonso, na mutindu beno ke sala kibeni mambu yina yandi songaka beno, 19 Yehowa ya makesa, Nzambi ya Izraele, ke tuba nde: “Ntangu yonso yo ta vandaka ti mwana ya Yehonadabi* mwana ya Rekabi sambu na kusala na ntwala na mono.”’”