Ezekiele

22 Ndinga ya Yehowa kwisilaka mono diaka nde: 2 “Kansi nge, mwana ya muntu, keti nge me yilama sambu na kusambisa* mbanza ya kele ti mfuka ya menga+ mpi kuzabisa yandi mambu na yandi yonso ya nzanzi?+ 3 Nge fwete tuba nde, ‘Yehowa Mfumu ya Kuluta Nene me tuba nde: “O mbanza yina ke tiamunaka menga+ na kati na yandi, yina ntangu na yandi me kwisa,+ mbanza yina ke salaka biteki ya nzanzi* sambu na kudibebisa,+ 4 menga yina nge me tiamuna me kumisa nge muntu ya me sala mbi,+ mpi biteki na nge ya nzanzi me kumisa nge mvindu.+ Nge me sala nde nsuka ya bilumbu na nge kukwisa nswalu, mpi nsuka ya bamvula na nge me lunga. Yo yina mono ta kumisa nge kima ya nsoni na meso ya makanda mpi kima yina bansi yonso ta sekaka.+ 5 Bansi yina kele pene-pene mpi yina kele ntama ti nge ta seka nge,+ nge muntu yina zina na nge kele mvindu mpi nge muntu yina me fuluka ti mavwanga. 6 Tala! Konso mfumu ya Izraele yina kele na kati na nge ke sadila kiyeka na yandi sambu na kutiamuna menga.+ 7 Na kati na nge, bantu ke vweza batata na bo ti bamama na bo.+ Bo ke kusa munzenza, mpi bo ke niokula mwana ya me konda tata* mpi mufwidi ya nkento.”’”+

8 “‘Nge ke mona mpamba bisika na mono ya santu, mpi nge ke vweza bisabatu na mono.+ 9 Na kati na nge, kele ti bantu yina ke kusilaka bantu makambu ya ke vandaka ti lukanu ya kutiamuna menga.+ Na kati na nge, bo ke dia bimenga na zulu ya bangumba mpi bo ke sala mambu ya nsoni na kati na nge.+ 10 Na kati na nge, bo ke pesa ve mbeto ya tata na bo lukumu,*+ mpi bo ke vukisa nitu ti nkento yina kele mvindu ntangu yandi me mona menga.+ 11 Na kati na nge, bakala mosi ke sala mambu ya nzanzi ti nkento ya nkweno na yandi,+ ya nkaka ke bebisa nkento ya mwana na yandi mosi ya bakala ti mambu ya nsoni,+ mpi ya nkaka ke vukisa nitu ti mpangi na yandi ya nkento, mwana ya tata na yandi mosi.+ 12 Na kati na nge, bo ke baka avoka sambu na kutiamuna menga.+ Nge ke defisa sambu na kubaka luta+ to sambu na kubaka mbongo mingi na zulu,* mpi nge ke yiba mbongo ya bankweno na nge.+ Ee, nge me vila mono kibeni,’ Yehowa Mfumu ya Kuluta Nene muntu me tuba.

13 “‘Tala! Mono ke bula maboko na mono ti kuvweza sambu na luta ya nge me baka na banzila ya luvunu mpi sambu na mambu ya me tala kutiamuna menga yina kele na kati na nge. 14 Keti nge* ta vanda kaka kikesa mpi keti maboko na nge ta vanda kaka ngolo na bilumbu yina mono ta pesa nge ndola?+ Mono mosi, Yehowa, muntu me tuba, mpi mono ta sala yo. 15 Mono ta panza nge na kati ya makanda mpi na kati ya bansi,+ mpi mono ta sukisa mambu na nge ya mvindu.+ 16 Bo ta pesa nge nsoni na ntwala ya makanda, ebuna nge ta zaba nde mono kele Yehowa.’”+

17 Ndinga ya Yehowa kwisilaka mono diaka nde: 18 “Mwana ya muntu, nzo ya Izraele me kuma mvindu ya mpamba sambu na mono. Bo yonso kele kwivre, eteni, kibende, mpi plomb na kati ya fulu ya tiya. Bo me kuma mvindu ya arza.+

19 “Yo yina, Yehowa Mfumu ya Kuluta Nene me tuba nde: ‘Sambu beno yonso me kuma bonso mvindu ya mpamba,+ mono ke vukisa beno kisika mosi na kati ya Yeruzalemi. 20 Mutindu bo ke tulaka arza, kwivre, kibende, plomb mpi eteni na kati ya fulu ya tiya sambu na kupupula tiya na zulu na yo mpi kukumisa yo masa, mutindu mosi mpi mono ta vukisa beno kisika mosi na makasi na mono ti na nganzi na mono, ebuna mono ta pupula na zulu na beno mpi ta sala nde beno kuma masa-masa.+ 21 Mono ta vukisa beno kisika mosi mpi ta pupula tiya ya nganzi na mono+ na zulu na beno, ebuna beno ta kuma masa na kati na yandi.+ 22 Mutindu arza ke kumaka masa-masa na kati ya fulu ya tiya, nge ta kuma mpi masa-masa na kati na yandi; ebuna beno ta zaba nde mono, Yehowa, mono me wila beno makasi.’”

23 Ndinga ya Yehowa kwisilaka mono diaka nde: 24 “Mwana ya muntu, tubila yandi nde, ‘Nge kele insi yina bo ta tula ve bunkete mpi yina mvula ta noka ve na zulu na yo na kilumbu ya makasi. 25 Bambikudi na yandi me kana kusala mbi na kati na yandi,+ bonso ntambu ya ke ngana na ntangu yo ke zenga-zenga mbisi yina yo me kanga.+ Bo ke dia bantu.* Bo ke botula kimvwama mpi bima ya ntalu. Bo me kumisa bankento mingi mifwidi na kati na yandi. 26 Banganga-nzambi na yandi me fwa nsiku+ na mono mpi bo ke landa kuvweza bisika na mono ya santu.+ Bo ke sala ve luswaswanu na kati ya kima yina kele ya santu mpi kima yina kele ya bantu yonso,+ bo ke zabisa ve bantu mambu yina kele ya mvindu mpi mambu yina kele ya bunkete,+ mpi bo ke buya kuzitisa bisabatu na mono, mpi bo ke vweza mono na kati na bo. 27 Bamfumu yina kele na kati na yandi kele bonso bibulu yina ke zenga-zenga bambisi yina yo me kanga; bo ke tiamuna menga mpi ke fwa bantu* sambu na kubaka luta na banzila ya luvunu.+ 28 Kansi bambikudi na yandi me pakula mpemba na zulu ya mambu ya bo ke sala. Bo ke mona bambona-meso ya luvunu mpi ke zabisa na ntwala mambu yina ta bwa kansi yo kele ya luvunu,+ mpi bo ke tuba nde: “Yehowa Mfumu ya Kuluta Nene muntu me tuba,” kansi Yehowa yandi mosi me tuba kima ve. 29 Bantu ya insi me kusa mpi me yiba,+ bo me niokula muntu ya mpasi ti nsukami, bo me kusa munzenza mpi me zenga ve makambu na yandi na lunungu.’

30 “‘Mono vandaka kusosa muntu mosi na kati na bo yina lendaka kuyidika kibaka ya matadi to kutelama na ntwala na mono na dibulu yina kele na kibaka sambu na mambote ya insi, mpidina bo ta fwa yo ve,+ kansi mono monaka ve ata muntu mosi. 31 Yo yina mono ta monisila bo makasi na mono mpi ta manisa bo ti tiya ya nganzi na mono. Mono ta sala nde bo buka mbuma ya banzila na bo,’ Yehowa Mfumu ya Kuluta Nene muntu me tuba.”