Samuele ya Zole

10 Na nima, ntotila ya bantu ya Amoni+ fwaka, mpi mwana na yandi Anuni kumaka ntotila na kisika na yandi.+ 2 Ebuna Davidi tubaka nde: “Mono ta monisila Anuni mwana ya Nahashi zola ya kwikama sambu tata na yandi monisilaka mono zola ya kwikama.” Yo yina Davidi tindaka bansadi na yandi sambu bo kwenda kulembika yandi sambu na lufwa ya tata na yandi. Kansi ntangu bansadi ya Davidi kumaka na insi ya bantu ya Amoni, 3 bamfumu ya bantu ya Amoni tubilaka Anuni mfumu na bo nde: “Keti nge ke yindula nde Davidi ke pesa tata na nge lukumu na mutindu yandi me tinda bantu sambu na kulembika nge? Keti Davidi me tindila nge ve bansadi na yandi sambu na kutala mbanza mbote-mbote, kutala yo na mayele mpi kubwisa yo?” 4 Yo yina Anuni bakaka bansadi ya Davidi mpi zengaka bo mandefo lweka mosi+ mpi yandi zengaka bilele na bo na kati-kati na nsi ya luketo* na bo, ebuna yandi songaka bo na kuvutuka. 5 Ntangu bo songaka yo Davidi, na mbala mosi yandi tindaka bantu na kukutana ti bo, sambu bo pesaka bantu yina nsoni mingi kibeni; ebuna ntotila songaka bo nde: “Beno bikala na Yeriko+ tii kuna mandefo na beno ta yela diaka, ebuna beno kwisa kuvutuka.”

6 Na nima, bantu ya Amoni monaka nde bo kumaka kima ya nsudi ya mbi sambu na Davidi, yo yina bantu ya Amoni tindaka bantu sambu na kudefa bantu ya Siria ya Bete-rehobi+ mpi bantu ya Siria ya Soba,+ basoda 20 000 ya ke tambulaka na makulu; ntotila ya Maaka+ ti bantu 1 000; mpi na Ishetobi* bantu 12 000.+ 7 Ntangu Davidi waka diambu yai, yandi tindaka Yoabi ti basoda yonso, mpi basoda na yandi ya kuluta ngolo.+ 8 Bantu ya Amoni basikaka mpi yilamaka sambu na bitumba na munoko ya kielo ya mbanza, kansi bantu ya Siria ya Soba ti ya Rehobi kumosi ti Ishetobi* mpi Maaka vandaka bo mosi na nseke.

9 Ntangu Yoabi monaka nde bo vandaka kunwanisa yandi na ntwala mpi na nima, yandi solaka ndambu ya basoda ya kuluta mbote ya Izraele mpi tulaka bo na ndonga ya bitumba sambu bo kutana ti bantu ya Siria.+ 10 Yandi tulaka bantu yina bikalaka na nsi ya kiyeka* ya mpangi na yandi Abishai,+ sambu na kutula bo na ndonga ya bitumba sambu bo kutana ti bantu ya Amoni.+ 11 Ebuna yandi tubaka nde: “Kana bantu ya Siria kuluta mono na ngolo, nge fwete kwisa kusadisa mono; kansi kana bantu ya Amoni kuluta nge na ngolo, mono ta kwisa kusadisa nge. 12 Beto fwete vanda ngolo mpi kikesa+ sambu na bantu na beto mpi sambu na bambanza ya Nzambi na beto, ebuna Yehowa ta sala mambu yina kele mbote na meso na yandi.”+

13 Ebuna Yoabi ti bantu na yandi pusanaka sambu na kunwana ti bantu ya Siria, mpi bo tinaka na ntwala na yandi.+ 14 Ntangu bantu ya Amoni monaka nde bantu ya Siria me tina, bo tinaka Abishai mpi bo kotaka na mbanza. Na nima ya bitumba yai ti bantu ya Amoni, Yoabi kwisaka na Yeruzalemi.

15 Ntangu bantu ya Siria monaka nde Izraele me bedisa bo, bo vukanaka kisika mosi.+ 16 Yo yina Adadezere+ tindaka bantu na kubinga bantu ya Siria yina vandaka na ntoto yina kele pene-pene ya Nzadi,*+ ebuna bo kwisaka na Helami, mpi Shobaki mfumu ya basoda ya Adadezere vandaka kutwadisa bo.

17 Ntangu bo songaka Davidi mambu yina, na mbala mosi yandi vukisaka Izraele ya mvimba mpi sabukaka Yordani mpi kwisaka na Helami. Ebuna bantu ya Siria yilamaka sambu na bitumba sambu na kukutana ti Davidi, mpi bo nwanaka ti yandi.+ 18 Kansi bantu ya Siria tinaka Izraele; ebuna Davidi fwaka bantu 700 ya ke nataka bapusu-pusu ti bantub 40 000 ya Siria ya ke tambusaka bampunda, mpi yandi bulaka Shobaki mfumu ya basoda na bo, yandi fwaka pana.+ 19 Ntangu bantotila yonso, bansadi ya Adadezere, monaka nde Izraele me bedisa bo, bo salaka ngemba ti Izraele kukonda kusukinina mpi bo kumaka bantu na bo;+ bantu ya Siria vandaka na boma ya kusadisa diaka bantu ya Amoni.