Bansangu ya Zole

20 Na nima, bantu ya Moabi+ ti bantu ya Amoni,+ kumosi ti bantu ya nkaka ya Amonimi,* kwisaka kunwanisa Yehoshafati. 2 Yo yina bo songaka Yehoshafati nde: “Kimvuka mosi ya nene ya bantu me kwisa kunwanisa nge, bo me katuka na ndambu ya nzadi-mungwa,* na Edomi,+ mpi bo kele kuna na Azazoni-tamare, disongidila, Ene-gedi.”+ 3 Ebuna Yehoshafati waka boma, mpi yandi bakaka lukanu ya* kusosa Yehowa.+ Yo yina, yandi songaka bantu yonso ya Yuda na kubuya madia. 4 Na nima bantu ya Yuda vukanaka sambu na kuyula Yehowa;+ bo katukaka na bambanza yonso ya Yuda sambu na kukwisa kuyula Yehowa.

5 Ebuna Yehoshafati telamaka na kati ya dibundu ya Yuda mpi ya Yeruzalemi, na nzo ya Yehowa na ntwala ya kibansala ya mpa, 6 mpi yandi tubaka nde:

“O Yehowa Nzambi ya ba-nkaka na beto, keti nge kele ve Nzambi na zulu;+ keti nge ke yalaka ve bimfumu yonso ya makanda?+ Ngolo mpi kikesa kele na diboko na nge, mpi muntu mosi ve lenda telama na ntwala na nge.+ 7 O Nzambi na beto, keti nge kulaka ve bantu ya insi yai na ntwala ya bantu na nge Izraele mpi nge pesaka yo bonso dikabu ya mvula na mvula na bana* ya nduku na nge Abrahami?+ 8 Bo kumaka kuzinga kuna, mpi bo tungilaka nge kisika ya santu kuna sambu na zina na nge,+ bo tubaka nde, 9 ‘Kana mpasi kubwila beto, yo vanda na nzila ya mbele ya bitumba, ya lusambisu ya mbi, ya kipupa, to ya nzala, bika beto telama na ntwala ya nzo yai mpi na ntwala na nge (sambu zina na nge kele na nzo yai)+ mpi beto binga nge sambu nge sadisa beto na bampasi na beto, mpi bika nde nge wa mpi nge gulusa beto.’+ 10 Ntangu yai, tala bantu ya Amoni, ya Moabi, mpi ya ntoto ya bangumba ya Seire,+ yina nge pesaka ve bantu ya Izraele nzila ya kukota na insi na bo ntangu bo vandaka kubasika na insi ya Ezipte. Bo balukaka na ndambu ya nkaka mpi bo manisaka bo ve.+ 11 Ntangu yai bo ke futa beto na mutindu bo ke kwisa kukula beto na ntoto na nge yina nge pesaka beto bonso dikabu.+ 12 O Nzambi na beto, keti nge ta pesa bo ve ndola?+ Sambu beto kele ve na ngolo na ntwala ya kimvuka yai ya nene ya bantu ya ke kwisa kunwanisa beto; mpi beto me zaba ve mambu ya beto fwete sala,+ kansi meso na beto ke tala kaka nge.”+

13 Na ntangu yina, bantu yonso ya Yuda telamaka na ntwala ya Yehowa, kumosi ti bana na bo ya fioti, bankento na bo, mpi bana na bo.*

14 Ebuna na kati-kati ya dibundu, mpeve ya Yehowa kwisilaka Yahaziele, mwana ya Zekaria mwana ya Benaya mwana ya Yeyele mwana ya Matania, Mulevi na kati ya bana ya Asafi. 15 Yandi tubaka nde: “Beno tula dikebi, beno bantu yonso ya Yuda, bantu ya Yeruzalemi, mpi ntotila Yehoshafati! Yehowa ke tubila beno nde, ‘Beno wa boma ve mpi beno tekita ve sambu na kimvuka yai ya nene ya bantu, sambu bitumba kele ve ya beno kansi ya Nzambi.+ 16 Mbasi beno kulumuka sambu na kunwana ti bo. Bo ta vanda bo ke kwisa kutombuka na kisika ya kulutila na Sisi, mpi beno ta mona bo na nsuka ya muwanda na ntwala ya ntoto-makanga ya Yeruele. 17 Beno ta vanda ve na mfunu ya kunwana bitumba yai. Beno telama pana, beno nikana ve,+ mpi beno mona mutindu Yehowa ke gulusa beno.*+ O Yuda mpi Yeruzalemi, beno wa boma ve mpi beno tekita ve.+ Mbasi beno kwenda kunwana ti bo, mpi Yehowa ta vanda ti beno.’”+

18 Na mbala mosi Yehoshafati fukamaka luse na ntoto, ebuna bantu yonso ya Yuda mpi bantu ya Yeruzalemi fukamaka luse na ntoto na ntwala ya Yehowa sambu na kusambila Yehowa. 19 Na nima, Balevi yina vandaka bana ya Kohati+ mpi bana ya Kora telamaka sambu na kukumisa Yehowa Nzambi ya Izraele na ndinga ya ngolo kibeni.+

20 Bo telamaka na suka-suka mpi bo kwendaka na ntoto-makanga ya Tekoa.+ Ntangu bo vandaka kukwenda, Yehoshafati telamaka mpi tubaka nde: “Beno wa mono, O beno bantu ya Yuda mpi beno bantu ya Yeruzalemi! Beto kwikila na Yehowa Nzambi na beno sambu beno kuka kubikala ngolo.* Beno kwikila na bambikudi na yandi,+ ebuna beno ta nunga.”

21 Na nima ya kusolula ti bantu, yandi solaka bantu sambu na kuyimbila+ Yehowa mpi kukumisa yandi ti bilele ya santu ntangu bo vandaka kukwenda na ntwala ya bantu yina vandaka ti binwaninu; bo vandaka kutuba nde: “Beno pesa Yehowa matondo, sambu zola na yandi ya kwikama ke zingaka kimakulu.”+

22 Ntangu bo yantikaka kuyimba na kiese bankunga ya kukumisa Nzambi, Yehowa tulaka bantu bo bumbana sambu na kunwanisa bantu ya Amoni, ya Moabi, mpi ya ntoto ya bangumba ya Seire yina vandaka kukota na ngolo na Yuda, ebuna bantu yina fwisanaka.+ 23 Bantu ya Amoni mpi bantu ya Moabi balukilaka bantu ya ntoto ya bangumba ya Seire+ sambu na kufwa bo mpi kumanisa bo; mpi ntangu bo manisaka kufwa bantu ya Seire, bo sadisaka na kufwisana.+

24 Kansi ntangu bantu ya Yuda kumaka na nzo-zulu ya nkengi ya ntoto-makanga+ mpi bo talaka na ndambu ya kimvuka yina ya bantu, bo monaka bamvumbi na bo me lala kuna na ntoto;+ muntu mosi ve bikalaka na luzingu. 25 Yo yina, Yehoshafati ti bantu na yandi kwisaka sambu na kubaka bima ya bantu yina, mpi na kati na yo bo monaka bima mingi, bilele mingi, mpi bima mingi ya ntalu, yina bo katulaka bo mpi bo bakaka yo sambu na bo mosi tii kuna bo vandaka diaka ve na mpila ya kunata yo.+ Bo salaka bilumbu tatu na kunata bima yina bo bakaka, sambu yo vandaka mingi. 26 Na kilumbu ya iya bo vukanaka na Muwanda* ya Beraka, sambu kuna bo kumisaka* Yehowa. Yo yina bo pesaka kisika yina zina Muwanda ya Beraka*+—tii bubu yai.

27 Ebuna bantu yonso ya Yuda ti ya Yeruzalemi, mpi Yehoshafati na ntwala na bo, vutukaka na Yeruzalemi na kiese, sambu Yehowa sadisaka bo na kununga bambeni na bo.+ 28 Bo kwisaka na Yeruzalemi ti bima ya kubudila miziki ya kele ti bansinga, bakidare,+ mpi bampungi,+ ebuna bo kwendaka na nzo ya Yehowa.+ 29 Mpi boma ya Nzambi simbaka bimfumu yonso ya bansi yina ntangu bo waka nde Yehowa nwanaka ti bambeni ya Izraele.+ 30 Ebuna kimfumu ya Yehoshafati vandaka na ngemba, mpi Nzambi na yandi landaka kupesa yandi ngemba na bandambu yonso.+

31 Yehoshafati landaka kuyala Yuda. Yandi vandaka ti bamvula 35 ntangu yandi kumaka ntotila, mpi yandi yalaka bamvula 25 na Yeruzalemi. Zina ya mama na yandi Azuba, mwana ya Shili.+ 32 Yandi landaka kutambula na nzila ya tata na yandi Aza.+ Yandi yambulaka yo ve, mpi yandi salaka mambu ya mbote na meso ya Yehowa.+ 33 Kansi bo katulaka+ ve bisika ya kunanguka, mpi bantu yidikaka ntete ve ntima na bo sambu na Nzambi ya ba-nkaka na bo.+

34 Sambu na mambu ya nkaka ya Yehoshafati salaka, katuka na luyantiku tii na nsuka, bo me sonikaka yo na masonama ya Yehu+ mwana ya Hanani,+ yina bo kotisaka na Mukanda ya Bantotila ya Izraele. 35 Na nima, Yehoshafati ntotila ya Yuda salaka kuwakana ti Ahazia ntotila ya Izraele, yina vandaka kusala mambu ya mbi.+ 36 Yo yina, yandi wakanaka na kutunga bamaswa sambu na kukwenda na Tarsisi,+ mpi bo tungaka bamaswa na Esioni-gebere.+ 37 Kansi, Eliezere mwana ya Dodavahu ya Maresha tubilaka Yehoshafati mambu ya mbikudulu nde: “Sambu nge me sala kuwakana ti Ahazia, Yehowa ta fwa bisalu na nge.”+ Yo yina, bamaswa yina fwaka,+ mpi yo kukaka ve kukwenda na Tarsisi.