Kutanga
23 Ebuna Balami tubilaka Balaki nde: “Tunga bamesa-kimenga+ nsambwadi na kisika yai, mpi yidikila mono bangombe ya babakala nsambwadi ti mameme ya babakala nsambwadi.” 2 Na mbala mosi Balaki salaka kaka mutindu Balami tubaka. Ebuna Balaki ti Balami tambikaka ngombe mosi ya bakala ti dimeme mosi ya bakala na konso mesa-kimenga.+ 3 Ebuna Balami tubilaka Balaki nde: “Bikala awa pene-pene ya dikabu na nge ya kuyoka, mpi mono ta kwenda. Mbala ya nkaka Yehowa ta solula ti mono. Konso diambu yina yandi ta songa mono, mono ta zabisa nge.” Ebuna yandi kwendaka na nsongi ya ngumba mosi ya fioti.
4 Ebuna Nzambi solulaka ti Balami;+ mpi Balami tubilaka yandi nde: “Mono me tunga bamesa-kimenga nsambwadi na bandonga, mpi mono me pesa ngombe mosi ya bakala ti dimeme mosi ya bakala na konso mesa-kimenga.” 5 Yehowa tulaka mambu yai na munoko ya Balami:+ “Vutuka na Balaki, mpi yai mambu ya nge fwete tuba.” 6 Yo yina yandi vutukaka mpi monaka nde Balaki ti bamfumu yonso ya Moabi vandaka ya kutelama pene-pene ya dikabu na yandi ya kuyoka. 7 Ebuna yandi tubaka kingana yai:+
“Balaki ntotila ya Moabi nataka mono tuka Arami,+
Tuka bangumba ya esti:
‘Kwisa kusingila mono Yakobi.
Ee, kwisa kutungulula Izraele.’+
8 Inki mutindu mono lenda singa bantu yina Nzambi me singa ve?
Mpi nki mutindu mono lenda tungulula bantu yina Yehowa me tungulula ve?+
9 Tuka na nsongi ya matadi, mono ke mona bo,
Mpi tuka bangumba ya fioti, mono ke mona bo.
10 Nani lenda tanga bambuma ya zelo ya Yakobi+
To nkutu kutanga ndambu mosi na kati ya bandambu iya ya Izraele?
Bika mono* fwa lufwa ya muntu ya mbote,
Mpi bika nsuka na mono kuvanda bonso nsuka na bo.”
11 Ebuna Balaki tubilaka Balami nde: “Inki nge me sala mono? Mono nataka nge sambu nge singa bambeni na mono, kansi tala nge me sakumuna bo.”+ 12 Yandi vutulaka nde: “Keti mono fwete tuba ve mambu yonso yina Yehowa ke tula na munoko na mono?”+
13 Balaki tubilaka yandi nde: “Pardo, kwisa ti mono na kisika ya nkaka, kisika nge lenda mona bo. Nge ta mona kaka ndambu na bo; nge ta mona bo yonso ve. Singila mono+ bo kuna.” 14 Yo yina, yandi nataka Balami na kilanga ya Sofimi, na nsongi ya Pisga,+ yandi tungaka bamesa-kimenga nsambwadi mpi tambikaka ngombe mosi ya bakala ti dimeme mosi ya bakala na konso mesa-kimenga.+ 15 Yo yina, Balami tubilaka Balaki nde: “Bikala awa pene-pene ya dikabu na nge ya kuyoka na ntangu mono ke solula ti yandi kuna.” 16 Ebuna Yehowa solulaka ti Balami mpi tulaka bangogo yai na munoko na yandi:+ “Vutuka na Balaki, mpi yai mambu ya nge fwete tuba.” 17 Yo yina yandi kwisaka kisika Balaki vandaka mpi monaka nde yandi vandaka kuvingila pene-pene ya dikabu na yandi ya kuyoka, mpi bamfumu ya Moabi vandaka ti yandi. Balaki yulaka yandi nde: “Yehowa me tuba inki?” 18 Na nima yandi tubaka kingana yai:+
“Balaki, telama, mpi widikila.
Wa mono, O mwana ya Sipore.
19 Nzambi kele ve muntu ya mpamba yina ke tubaka luvunu,+
Kana yandi tuba diambu mosi, keti yandi ta sala yo ve?
Kana yandi tuba, keti yandi ta lungisa+ yo ve?
20 Tala! Bo nataka mono sambu mono sakumuna;
21 Yandi ke pesaka ve nzila nde bo sadila mazi sambu na kusala Yakobi mbi,
Mpi yandi ke pesaka ve nzila nde ata diambu mosi ya mpasi kuyangisa Izraele.
Yehowa Nzambi na yandi kele ti bo,+
Mpi bo ke kumisa yandi mingi kibeni bonso ntotila na kati na bo.
22 Nzambi ke basisa bo na Ezipte.+
Yandi kele bonso bibongo ya mpakasa sambu na bo.+
23 Sambu kele ve ti bidimbu ya mambu ya mbi sambu na Yakobi,+
Mpi kele ve ti kisalu ya kuzabisa na ntwala mambu ya mbi yina ta bwa sambu na Izraele.+
Na ntangu yai bo lenda tuba sambu na Yakobi mpi Izraele nde:
‘Tala mambu yina Nzambi me sala!’
24 Tala bantu yina ta telama bonso ntambu,
Mpi bonso ntambu, yo ta telama yo mosi.+
Yo ta lala ve tii kuna yo ta dia mbisi yina yo me kanga
Mpi ta nwa menga ya bantu yina bo me fwa.”
25 Ebuna Balaki tubilaka Balami nde: “Kana nge lenda singa yandi ve, nge fwete sakumuna yandi mpi ve.” 26 Balami vutudilaka Balaki nde: “Keti mono tubilaka nge ve nde, ‘Mono ta sala mambu yonso yina Yehowa ke tuba’?”+
27 Balaki tubilaka Balami nde: “Pardo kwisa mpi bika mono nata nge na kisika ya nkaka diaka. Mbala ya nkaka yo ta vanda mbote na meso ya Nzambi ya kieleka nde nge singila mono yandi kuna.”+ 28 Yo yina Balaki nataka Balami na nsongi ya Peore, yina ke tala na ndambu ya Yeshimoni.*+ 29 Ebuna Balami tubilaka Balaki nde: “Tunga bamesa-kimenga nsambwadi na kisika yai, mpi yidikila mono+ bangombe ya babakala nsambwadi ti mameme ya babakala nsambwadi.” 30 Balaki salaka kaka mutindu Balami tubaka, mpi yandi tambikaka ngombe mosi ya bakala ti dimeme mosi ya bakala na konso mesa-kimenga.