Yeremia
18 Yai mambu yina katukaka na Yehowa mpi kwisilaka Yeremia: 2 “Telama, kwenda na nzo ya muwumbi,+ mpi mono ta solula ti nge kuna.”
3 Yo yina mono kwendaka na nzo ya muwumbi, mpi yandi vandaka kusala dibungu. 4 Kansi dibungu yina muwumbi vandaka kusala ti ntoto ya tuma bebaka na maboko na yandi. Yo yina, yandi salaka dibungu ya nkaka ti ntoto yina ya tuma, kaka mutindu yandi monaka nde yo me fwana.*
5 Ebuna ndinga ya Yehowa kwisilaka mono nde: 6 “‘O nzo ya Izraele, keti mono lenda sala beno ve kaka mutindu muwumbi yai salaka?’ Yehowa muntu me tuba. ‘O nzo ya Izraele,+ beno kele na maboko na mono mutindu ntoto ya tuma ke vandaka na maboko ya muwumbi. 7 Konso ntangu yina mono ke tuba sambu na dikanda to kimfumu mosi+ sambu na kutumuna yo, kubwisa yo, mpi kufwa yo, 8 ebuna dikanda yina kuyambula mambu na yo ya mbi yina mono tubilaka, mono ta soba mpi mabanza na mono* sambu na mpasi yina mono kanaka kunatila yo.+ 9 Kansi konso ntangu yina mono ke tuba sambu na dikanda to kimfumu mosi sambu na kutunga yo mpi kukuna yo, 10 ebuna yo sala mambu ya mbi na meso na mono mpi yo lemfukila ve ndinga na mono, mono ta soba mabanza na mono* sambu na mambu ya mbote yina mono kanaka kusadila yo.’
11 “Ntangu yai pardo, tubila bantu ya Yuda mpi bantu ya Yeruzalemi nde, ‘Yehowa me tuba nde: “Tala, mono ke yidikila beno mpasi mpi ke yindudila beno ngindu ya mbi. Pardo, beno yambula banzila na beno ya mbi, mpi beno tomisa banzila na beno ti bisalu na beno.”’”+
12 Kansi bo tubaka nde: “Ikele ve!+ Sambu beto ta landa bangindu na beto mosi, mpi konso muntu ta sala mambu na kulanda ntu-ngolo ya ntima na yandi ya mbi.”+
13 Yo yina, Yehowa ke tuba nde:
“Pardo, beno yula na kati ya makanda.
Nani me waka ntete diambu ya mutindu yai?
Mwense ya Izraele me sala diambu ya ke pesa boma mingi kibeni.+
14 Keti mvula ya mpembe* ya Libani ke vilaka na matadi na bangumba na yo?
To keti masa ya madidi yina ke katukaka ntama mpi ke kulumukaka ta yuma?
15 Kansi bantu na mono me vilaka mono.+
Sambu bo ke pesa bimenga* na kima ya kukonda mfunu,+
Mpi bo ke budisa bantu sakuba na banzila na bo, banzila ya ntama,+
Sambu na kutambula na banzila yina kele ve ya kuyidika,*
16 Sambu na kukumisa insi na bo kima ya ke pesa boma+
Mpi kima ya kubudila mwita kimakulu.+
Konso muntu ya nsuka yina ke luta pene-pene na yo ta yituka na boma mpi ta nikisa ntu.+
17 Bonso mupepe ya esti, mono ta panza bo na ntwala ya mbeni.
Na kilumbu ya mpasi na bo,+ mono ta songa bo mukongo na mono, kansi luse na mono ve.”
18 Mpi bo tubaka nde: “Beno kwisa, beto sadila Yeremia komplo,+ sambu nsiku* ta vila ve na banganga-nzambi na beto, ndongisila ta vila ve na bantu ya mayele, mpi ndinga ta vila ve na bambikudi. Beno kwisa, beto tubila yandi mambu ya mbi,* mpi beto tula ve dikebi na mambu ya yandi ke tuba.”
19 Tudila mono dikebi, O Yehowa,
Mpi wa mambu yina bambeni na mono ke tuba.
20 Keti bo fwete vutula mbi sambu na mambote?
Sambu bo me timuna dibulu sambu na luzingu* na mono.+
Yibuka mutindu mono telamaka na ntwala na nge sambu na kutuba mambu ya mbote sambu na bo,
Sambu nge wila bo diaka ve makasi.
21 Yo yina, bika bana na bo kufwa na nzala,
Mpi pesa bo na maboko ya bambeni sambu bo fwa na mbele ya bitumba.+
Bika bankento na bo kukonda bana mpi kukuma mifwidi.+
Bika babakala na bo kufwa na maladi ya ke fwaka bantu,
Bika baleke na bo ya babakala kufwa na bitumba na mbele ya bitumba.+
22 Bika kudila kuwakana na banzo na bo
Ntangu nge ke tindila bo miyibi na kintulumukina.
Sambu bo me timuna dibulu sambu na kukanga mono
Mpi bo me tula mitambu sambu na makulu na mono.+
23 Kansi nge, O Yehowa,
Nge me zaba mbote balukanu na bo yonso sambu na kufwa mono.+
Kufika ve kifu na bo,
Mpi kuvwansa ve disumu na bo na ntwala na nge.