Samuele ya Zole

9 Ebuna Davidi tubaka nde: “Keti kele diaka ti muntu yina me bikala na nzo ya Saule ya mono lenda monisila zola ya kwikama sambu na Yonatani?”+ 2 Ntangu yai kuvandaka ti nsadi mosi ya nzo ya Saule zina na yandi Siba.+ Ebuna bo bingaka yandi na kukwenda na Davidi, mpi ntotila yulaka yandi nde: “Keti nge Siba?” Yandi vutulaka nde: “Mono kele nsadi na nge.” 3 Ntotila tubaka diaka nde: “Keti kele ti muntu yina me bikala na nzo ya Saule ya mono lenda monisila zola ya kwikama ya Nzambi?” Siba vutudilaka ntotila nde: “Kele diaka ti mwana mosi ya Yonatani; yandi kele ti kifu na makulu.”*+ 4 Ntotila yulaka Siba nde: “Yandi kele na wapi?” Siba vutudilaka ntotila nde: “Yandi kele na nzo ya Makire+ mwana ya Amiele na Lo-debare.”

5 Na mbala mosi ntotila Davidi tindaka bantu sambu na kubaka yandi mpi bo bakaka yandi na nzo ya Makire mwana ya Amiele na Lo-debare. 6 Ntangu Mefibosheti mwana ya Yonatani mwana ya Saule kwisaka na Davidi, na mbala mosi yandi bwaka luse na ntoto mpi fukamaka. Ebuna Davidi tubaka nde: “Mefibosheti!” yandi vutulaka nde: “Nsadi na nge yandi yai.” 7 Davidi tubilaka yandi nde: “Kuwa boma ve, sambu mono ta monisila nge mpenza zola ya kwikama+ sambu na tata na nge Yonatani, mpi mono ta vutudila nge ntoto yonso ya nkaka na nge Saule, mpi nge ta diaka* ntangu yonso na mesa na mono.”+

8 Ebuna yandi fukamaka mpi tubaka nde: “Nsadi na nge kele inki sambu nge tula dikebi* na nge na mbwa ya kufwa+ bonso mono?” 9 Ebuna ntotila tindaka bantu sambu na kubinga Siba, nsadi ya Saule, mpi tubilaka yandi nde: “Konso kima yina vandaka ya Saule mpi ya nzo na yandi ya mvimba, mono ke pesa yo na mutekolo ya mfumu na nge.+ 10 Nge ta sala bilanga sambu na yandi—nge ti bana na nge, mpi bansadi na nge—mpi nge ta vukisa bima yina yo ta basisa sambu na kupesa madia na bantu ya mutekolo ya mfumu na nge. Kansi Mefibosheti, mutekolo ya mfumu na nge, ta diaka ntangu yonso na mesa na mono.”+

Siba vandaka ti bana-babakala 15 mpi bansadi 20.+ 11 Ebuna Siba tubilaka ntotila nde: “Nsadi na nge ta sala mambu yonso yina mfumu na mono ntotila ke songa nsadi na yandi na kusala.” Yo yina Mefibosheti vandaka kudia na mesa ya Davidi* bonso mwana ya ntotila. 12 Mefibosheti vandaka mpi ti mwana mosi ya bakala, zina na yandi Mika;+ mpi bantu yonso yina vandaka kuzinga na nzo ya Siba kumaka bansadi ya Mefibosheti. 13 Mefibosheti zingaka na Yeruzalemi, sambu yandi vandaka kudia ntangu yonso na mesa ya ntotila;+ mpi yandi vandaka ti kifu na makulu.+