Bansangu ya Ntete

20 Na luyantiku ya mvula,* na ntangu yina bantotila ke kwendaka na bitumba, Yoabi+ nataka basoda na bitumba mpi bo bebisaka insi ya bantu ya Amoni; yandi kwisaka mpi ziungaka Raba,+ kansi Davidi bikalaka na Yeruzalemi.+ Yoabi nwanisaka Raba mpi fwaka yo.+ 2 Na nima, Davidi katulaka mpu ya kimfumu ya Malkami na ntu na yo, mpi yandi monaka nde kilo na yo vandaka talanta* mosi ya wolo, mpi yo vandaka ti matadi ya ntalu; ebuna bo tulaka yo na ntu ya Davidi. Yandi bakaka mpi bima mingi kibeni yina bo botulaka na mbanza yina.+ 3 Ebuna yandi basisaka bantu yina vandaka na kati na yo mpi tulaka bo na kisalu+ ya kupasula matadi mpi ya kusadila bisadilu ya makasi ya bibende mpi masoka. Yai mambu yina Davidi salaka na bambanza yonso ya bantu ya Amoni. Nsuka-nsuka, Davidi mpi basoda yonso vutukaka na Yeruzalemi.

4 Na nima, bitumba basikaka na Gezere ti bantu ya Filistia. Na ntangu yina, Sibekai+ muntu ya Usha fwaka Sipai, yina vandaka muntu ya dikanda ya Refayimi,+ ebuna bantu ya Filistia kumaka na nsi ya kiyeka na bo.

5 Bitumba basikaka diaka ti bantu ya Filistia, ebuna Elanani mwana ya Yaire fwaka Lami mpangi ya Goliati+ muntu ya Gati, yina dikonga na yandi vandaka bonso nti ya bantu yina ke tungaka bilele.+

6 Bitumba basikaka diaka na Gati,+ kisika muntu mosi ya nda mingi kibeni vandaka,+ yandi vandaka ti misapi 6 na konso diboko mpi misapi 6 na konso dikulu, na kimvuka misapi 24; yandi mpi vandaka muntu ya dikanda ya Refayimi.+ 7 Yandi landaka kusosila+ Izraele. Yo yina Yonatani mwana ya Shimei,+ mpangi ya Davidi, fwaka yandi.

8 Bantu yai vandaka bantu ya dikanda ya Refayimi+ na Gati,+ mpi bo bwaka na maboko ya Davidi mpi na maboko ya bansadi na yandi.