Yeremia
11 Yai mambu yina katukaka na Yehowa mpi kwisilaka Yeremia: 2 “Beno bantu, beno wa mambu ya kuwakana yai!
“Zabisa* yo na bantu ya Yuda mpi na bantu ya Yeruzalemi 3 mpi tubila bo nde, ‘Yehowa Nzambi ya Izraele ke tuba nde: “Bika bo singa muntu yina ke zitisa ve mambu ya kuwakana yai,+ 4 yina mono songaka ba-nkaka na beno kilumbu yina mono basisaka bo na insi ya Ezipte,+ na fulu ya tiya ya ke kumisaka bibende masa-masa+ nde, ‘Beno zitisa ndinga na mono, mpi beno sala mambu yonso ya mono ke songa beno; ebuna beno ta kuma bantu na mono mpi mono ta vanda Nzambi na beno,+ 5 sambu mono lungisa ndefi yina mono diaka na ba-nkaka na beno, ya kupesa bo insi yina miliki* ti bwiki kele mingi,+ mutindu yo kele bubu yai.’”’”
Mpi mono vutulaka nde: “Amen,* O Yehowa.”
6 Na nima Yehowa tubilaka mono nde: “Zabisa mambu yai yonso na bambanza ya Yuda mpi na babala-bala ya Yeruzalemi: ‘Beno wa mambu ya kuwakana yai, mpi beno lungisa yo. 7 Sambu mono kebisaka ba-nkaka na beno pwelele kilumbu yina mono basisaka bo na insi ya Ezipte mpi tii bubu yai, mono kebisaka bo mbala na mbala* nde: “Beno zitisa ndinga na mono.”+ 8 Ata mpidina, bo waka ve mpi bo tulaka ve makutu; kansi, konso muntu vandaka kaka kulanda ntima na yandi ya mbi+ na ntu-ngolo yonso. Yo yina mono natilaka bo mambu yonso ya kuwakana yai yina mono songaka bo na kusala, kansi bo buyaka kulungisa yo.’”
9 Ebuna Yehowa tubilaka mono nde: “Bantu ya Yuda ti bantu ya Yeruzalemi me sala komplo. 10 Bo me vutukila bifu ya ba-nkaka na bo ya ntama, yina buyaka kuzitisa bangogo na mono.+ Bo mpi me landa banzambi ya nkaka mpi me sadila bo.+ Nzo ya Izraele mpi nzo ya Yuda me fwa kuwakana yina mono salaka ti ba-nkaka na bo.+ 11 Yo yina, Yehowa ke tuba nde, ‘Tala, mono ke natila bo mpasi+ yina bo ta kuka ve kutina. Ntangu bo ta binga mono sambu mono sadisa bo, mono ta wa bo ve.+ 12 Ebuna bambanza ya Yuda mpi bantu ya Yeruzalemi ta kwenda na banzambi yina bo ke pesaka bimenga* mpi ta binga bo sambu bo sadisa bo,+ kansi banzambi yina ta sadisa bo ve ata fioti na ntangu ya mpasi na bo. 13 Sambu banzambi na nge me kuma mingi bonso bambanza na nge, O Yuda, mpi nge me tedimisa bamesa-kimenga mingi sambu na kima ya nzanzi* bonso babala-bala ya Yeruzalemi, bamesa-kimenga sambu na kupesa bimenga na Baale.’+
14 “Kansi nge,* kusamba ve sambu na bantu yai. Kubinga ve sambu na bo mpi kusala ve kisambu sambu na bo,+ sambu mono ta wa ve ntangu bo ta binga mono sambu na mpasi na bo.
15 Inki nswa muntu ya mono ke zolaka mingi kele na yo ya kuvanda na nzo na mono
Ntangu bantu mingi kibeni me lungisa bangindu ya mbi?
Ti musuni ya santu,* keti bo ta katula mpasi ntangu yo ta kwisila nge?
Keti nge ta vanda na kiese na ntangu yina?
16 Yehowa vandaka kubinga nge ntete nti ya olive ya ke yela mbote,
Ya kitoko mpi ya kele ti bambuma ya mbote.
Ti makelele ya kuboka ya ngolo, yandi me tula yo tiya,
Mpi bo me zenga balutangu na yo.
17 “Yehowa ya makesa, Muntu yina kunaka nge,+ me tuba nde mpasi ta kwisila nge sambu na mambu ya mbi yina nzo ya Izraele mpi nzo ya Yuda salaka; bo me pesa mono makasi sambu na bimenga ya bo ke pesa na Baale.”+
18 Yehowa songaka mono sambu mono zaba;
Na ntangu yina nge sadisaka mono na kumona mambu yina bo vandaka kusala.
19 Mono vandaka bonso mwana-dimeme ya mawete ya bo ke kwenda kufwa.
Mono zabaka ve nde bo vandaka kukanina mono:+
“Bika beto fwa nti ti mbuma na yo,
Mpi bika beto katula yandi na insi ya bantu ya moyo,
Sambu bo yibuka diaka ve zina na yandi.”
20 Kansi Yehowa ya makesa ke sambisaka ti lunungu;
Bika mono tala mutindu nge ta vutudila bo mbi,
Sambu mono me pesa diambu na mono na maboko na nge.
21 Yo yina, yai mambu yina Yehowa ke tubila bantu ya Anatoti+ yina ke sosa kufwa nge* mpi ke tuba nde: “Nge fwete bikula ve na zina ya Yehowa,+ kana ve nge ta fwa na maboko na beto”; 22 yo yina, Yehowa ya makesa ke tuba nde: “Tala, mono ke sambisa bo. Baleke ta fwa na mbele ya bitumba;+ bana na bo ya babakala ti ya bankento ta fwa na nzala.+ 23 Ata muntu mosi ve ta bikala na kati na bo, sambu mono ta natila bantu ya Anatoti+ mpasi na mvula yina mono ta sambisa bo.”