Bansangu ya Zole

31 Ntangu bo manisaka mambu yai yonso, bantu ya Izraele yonso yina vandaka pana kwendaka na bambanza ya Yuda, mpi bo panza-panzaka makunzi ya santu,+ bo zengaka banti ya santu,*+ bo bwisaka bisika ya kunanguka+ mpi bamesa-kimenga+ na Yuda ya mvimba mpi na Benyamini, na Efrayimi, mpi na Manase,+ tii kuna bo fwaka yo yonso, na nima bantu ya Izraele yonso vutukaka na bambanza na bo, konso muntu na ntoto na yandi.

2 Na nima Ezekiasi tulaka banganga-nzambi na bimvuka na bo+ mpi Balevi na bimvuka na bo,+ konso kimvuka ya banganga-nzambi mpi ya Balevi sambu na kisalu na bo,+ sambu na makabu ya kuyoka mpi bimenga ya kinduku, sambu na kusala kisalu, kupesa matondo, mpi kukumisa Nzambi na bakielo ya bibansala* ya Yehowa.+ 3 Ntotila pesaka mpi ndambu ya bima na yandi sambu na makabu ya kuyoka,+ tanga mpi makabu ya suka ti ya nkokila,+ mpi makabu ya kuyoka sambu na Bisabatu,+ bangonda ya mpa,+ mpi bankinsi,+ na kulanda mambu yina bo me sonikaka na Nsiku ya Yehowa.

4 Diaka, yandi songaka bantu yina vandaka kuzinga na Yeruzalemi na kupesa dikabu yina banganga-nzambi mpi Balevi fwete baka,+ sambu bo kangama ngolo* na nsiku ya Yehowa. 5 Ntangu ntotila tubaka, bantu ya Izraele pesaka bima mingi yina katukaka na bima ya ntete ya bilanga na bo: mbuma ya kusala fufu, vinu ya mpa, mafuta,+ ti bwiki, mpi bima yonso ya bilanga;+ bo nataka mingi kibeni ndambu mosi na kati ya bandambu kumi ya bima yonso.+ 6 Bantu ya Izraele ti ya Yuda yina vandaka kuzinga na bambanza ya Yuda nataka mpi ndambu mosi na kati ya bandambu kumi ya bangombe ti ya mameme, mpi ndambu mosi na kati ya bandambu kumi ya bima ya santu+ yina bo santisaka sambu na Yehowa Nzambi na bo. Bo nataka yo mpi bo tulaka yo na bita mingi. 7 Bo yantikaka kutula makabu na bo na bita na ngonda ya tatu;+ mpi bo manisaka na ngonda ya nsambwadi.+ 8 Ntangu Ezekiasi ti bamfumu kwisaka mpi monaka bita ya makabu yina, bo kumisaka Yehowa mpi bo sakumunaka bantu na yandi Izraele.

9 Ezekiasi yulaka banganga-nzambi ti Balevi mambu ya me tala bita yina ya makabu, 10 ebuna Azaria, mfumu ya banganga-nzambi ya nzo ya Zadoki, tubilaka yandi nde: “Katuka ntangu yina bo yantikaka kunata makabu na nzo ya Yehowa,+ bantu ke dia mpi ke fuluka, mpi bima mingi ke bikala, sambu Yehowa me sakumuna bantu na yandi, mpi bima yai mingi me bikala.”+

11 Ebuna Ezekiasi songaka bo na kuyidika basuku ya kubumbila bima*+ na nzo ya Yehowa, mpi bo yidikaka yo. 12 Bo landaka kunata na kwikama yonso makabu, bandambu ya kumi,*+ mpi bima ya santu; bo pesaka Konania yina vandaka Mulevi kisalu ya kutala bima yai yonso, yandi vandaka ntwadisi, mpi mpangi na yandi Shimei vandaka kilandi. 13 Yehiele, Azazia, Nahati, Asaele, Yerimoti, Yozabadi, Eliele, Yismakia, Mahati, mpi Benaya vandaka mimonisi yina vandaka kusadisa Konania ti mpangi na yandi Shimei, na kulanda mambu yina ntotila Ezekiasi tubaka, mpi Azaria vandaka ntwadisi ya nzo ya Nzambi ya kieleka. 14 Kore mwana ya Yimna, Mulevi yina vandaka nkengidi ya kielo na ndambu ya esti,+ vandaka ti kisalu ya kutala makabu ya luzolo ya mbote+ ya Nzambi ya kieleka, mpi yandi vandaka kukabula makabu yina bo vandaka kupesa Yehowa+ mpi bima ya kuluta santu.+ 15 Bantu yai vandaka na nsi ya lutwadisu na yandi: Edeni, Miniamini, Yeshua, Shemaya, Amaria, mpi Shekania, na bambanza ya banganga-nzambi,+ na kisalu ya bo ke pesaka na bantu yina bo lenda tudila ntima, sambu na kukabudila bampangi na bo bima kiteso mosi na bimvuka na bo,+ muntu ya mfunu mpi muntu ya kukonda mfunu kiteso mosi. 16 Yai vandaka kukabula ya nkaka katula kukabula bima yina bo salaka sambu na babakala ya kele ti bamvula yantika tatu mata, bayina bo sonikisaka bazina na kulanda bandonga ya ba-nkaka na bo, yina vandaka kukwisa konso kilumbu sambu na kusala na nzo ya Yehowa mpi kusala bisalu ya bimvuka na bo.

17 Kusonikisa bazina ya banganga-nzambi na kulanda bandonga ya ba-nkaka na bo salamaka na kutadila banzo ya batata na bo,+ mutindu bo salaka sambu na Balevi yina vandaka na bamvula yantika 20 mata,+ na kutadila bisalu ya bimvuka na bo.+ 18 Ntangu bo sonikisaka bazina yina na kulanda bandonga ya ba-nkaka na bo, bo sonikisaka mpi bana na bo yonso, bankento na bo, bana na bo ya babakala, mpi bana na bo ya bankento, dibundu na bo ya mvimba—sambu bo bikalaka ya santu na yina me tala bima ya santu sambu na kisalu na bo ya bo ke pesaka na bantu yina bo lenda tudila ntima— 19 mpi bana ya Aroni, banganga-nzambi yina vandaka kuzinga na banseke yina vandaka na nziunga ya bambanza na bo.+ Na bambanza yonso, bo solaka bantu na bazina sambu na kupesa makabu na konso bakala na kati ya banganga-nzambi mpi na konso muntu yina bo sonikaka zina na yandi ntangu bo sonikisaka bazina ya Balevi na kulanda bandonga ya ba-nkaka na bo.

20 Ezekiasi salaka mambu yai na Yuda ya mvimba, mpi yandi landaka kusala mambu ya mbote, ya me fwana, mpi ya kwikama na ntwala ya Yehowa Nzambi na yandi. 21 Konso kisalu yina yandi salaka sambu na kusosa Nzambi na yandi, yo vanda na mambu ya me tala kisalu ya nzo ya Nzambi ya kieleka+ to na Nsiku mpi na ntuma, yandi salaka yo na ntima ya mvimba, mpi yandi vandaka kununga.