Kulonga

15 “Na nsuka ya konso bamvula nsambwadi, nge fwete yambula kulomba mfuka.+ 2 Kuyambula kulomba mfuka yina ta salama mutindu yai: Konso muntu yina defisaka nkweno na yandi kima ta yambula kulomba yandi mfuka yina yandi bakaka. Yandi fwete lomba ve nde nkweno to mpangi na yandi kufuta mfuka yina, sambu bo ta samuna nde bo me yambula kulomba mfuka sambu na Yehowa.+ 3 Nge lenda lomba mfuka na munzenza,+ kansi nge fwete yambula kulomba konso kima na nge yina mpangi na nge defaka na nge. 4 Ata mpidina, muntu mosi ve na kati na beno fwete kuma nsukami, sambu Yehowa ta sakumuna nge+ kibeni na insi yina Yehowa Nzambi na nge ke pesa nge na kubaka bonso dikabu, 5 kansi kaka kana nge lemfukila kibeni ndinga ya Yehowa Nzambi na nge mpi kuzitisa mbote-mbote bantuma yai yonso ya mono ke pesa nge bubu yai.+ 6 Yehowa Nzambi na nge ta sakumuna nge kaka mutindu yandi silaka nge, mpi nge ta defisa* makanda mingi, kansi nge ta vanda ve ti mfunu ya kudefa;+ nge ta yala makanda mingi, kansi bo ta yala nge ve.+

7 Kana mpangi na nge kukuma nsukami na mbanza mosi na kati ya bambanza ya insi yina Yehowa Nzambi na nge ke pesa nge, kukumisa ve ntima na nge ngolo mpi kuvanda ve diboko ngolo sambu na mpangi na nge ya nsukami.+ 8 Nge fwete kabila yandi mingi+ mpi kudefisa yandi* kibeni konso kima yina yandi kele na yo mfunu to yina yandi me konda. 9 Keba na mpila nde nge bumba ve ngindu yai ya mbi na ntima na nge, ‘Mvula ya nsambwadi, mvula ya kuyambula kulomba mfuka, me kuma pene-pene,’+ mpi nge buya kukabila na luzolo yonso mpangi na nge yina kele nsukami ebuna nge pesa yandi ve ata kima mosi. Kana yandi binga Yehowa sambu na kufunda nge, yo ta vanda disumu sambu na nge.+ 10 Nge fwete kabila yandi mingi,+ mpi nge* fwete pesa yandi ve ti bantima zole, sambu yo yina kikuma Yehowa Nzambi na nge ta sakumuna mambu yonso ya nge ke salaka mpi kisalu na nge.+ 11 Bansukami ta vandaka ntangu yonso na insi.+ Yo yina mono ke songa nge nde, ‘Mpangi na nge yina ke mona mpasi mpi yina kele nsukami na insi na nge,+ nge fwete kabila yandi mingi.’*

12 “Kana bo tekila nge mpangi na nge, Mu-Ebreo ya bakala to ya nkento, ebuna yandi me sadila nge bamvula sambanu, na nsuka ya mvula ya nsambwadi nge fwete pesa yandi kimpwanza.+ 13 Kansi kana nge fwete pesa yandi kimpwanza, kubika yandi ve yandi kwenda maboko-mpamba. 14 Nge fwete pesa yandi na luzolo yonso ndambu ya bima ya nge ta baka na bitwisi na nge, na kisika na nge ya bo ke tutaka bambuma sambu na kukatula yo bampusu, mpi na kikamuninu na nge ya mafuta mpi ya vinu. Nge fwete pesa yandi kaka mutindu Yehowa Nzambi na nge me sakumuna nge. 15 Yibuka nde nge kumaka mpika na insi ya Ezipte mpi nde Yehowa Nzambi na nge sumbaka nge diaka. Yo yina mono ke songa nge na kusala diambu yai bubu yai.

16 “Kansi kana yandi zabisa nge nde, ‘Mono ta bika nge ve!’ sambu yandi ke zolaka nge mpi bantu ya nzo na nge, sambu yandi vandaka na kiese ntangu yandi vandaka ti nge,+ 17 nge fwete baka muntunga, kukangimisa dikutu na yandi na kielo mpi kutobula yandi dikutu ti yo, ebuna yandi ta kuma mpika na nge ntangu yonso. Nge fwete sala mutindu mosi na mpika na nge ya nkento. 18 Kana nge pesa yandi kimpwanza ebuna yandi kwenda, kumona yo ve diambu ya mpasi, sambu kisalu yina yandi sadilaka nge na nsungi ya bamvula sambanu lutaka mbala zole ntalu ya kisalu ya muntu yina ke bakaka lufutu, mpi Yehowa Nzambi na nge me sakumuna nge na mambu yonso yina salamaka.

19 “Nge fwete santisa konso mwana-bakala ya ntete ya bangombe na nge mpi ya mameme na nge sambu na Yehowa Nzambi na nge.+ Nge fwete sala ve ata kisalu mosi ti mwana ya ntete ya kimvuka na nge ya bangombe,* nge fwete zenga mpi ve mwana ya ntete ya mameme na nge mika. 20 Nge ti bantu ya nzo na nge, beno fwete dia yo na ntwala ya Yehowa Nzambi na nge konso mvula na kisika yina Yehowa ta sola.+ 21 Kansi kana yo kele ti kifu—dikulu-kifu, meso ya kufwa, to konso kifu ya nkaka ya nene—nge fwete pesa yo ve kimenga na Yehowa Nzambi na nge.+ 22 Nge fwete dia yo na kati ya bambanza* na nge, muntu ya kukonda bunkete kumosi ti muntu ya bunkete, bonso nde yo kele mbambi to kabuluku.+ 23 Kansi nge fwete dia ve menga na yo;+ nge fwete tiamuna yo na ntoto bonso masa.+