Kubasika

35 Na nima Moize vukisaka kimvuka ya mvimba ya bantu ya Izraele mpi tubilaka bo nde: “Yehowa me pesa ntuma na kusala mambu yai:+ 2 Beno lenda sala kisalu bilumbu sambanu, kansi kilumbu ya nsambwadi ta kuma kima mosi ya santu sambu na beno, kisabatu ya kupema kibeni sambu na Yehowa.+ Konso muntu yina ta sala kisalu na kilumbu yina, bo ta fwa yandi.+ 3 Na kilumbu ya Kisabatu, beno fwete pedisa ve tiya na bisika yonso yina beno ke zingaka.”

4 Ebuna Moize tubilaka kimvuka ya mvimba ya bantu ya Izraele nde: “Yehowa me tuba nde, 5 ‘Beno baka makabu sambu na Yehowa na kati na beno.+ Bika nde konso muntu yina ntima na yandi me zola+ kunata dikabu sambu na Yehowa: wolo, arza, kwivre, 6 nsinga ya ble, lene ya mbwaki-ble, lele ya mbwaki mingi, lino ya kitoko, mika ya nkombo,+ 7 bampusu ya mameme ya babakala ya bo me pakula mukubu ya mbwaki, bampusu ya mbisi ya bo ke bingaka foke, mabaya ya akasia, 8 mafuta sambu na minda, balsami sambu na mafuta ya bo ke tulaka muntu mpi sambu na ndumbu ya nsudi ya kitoko,+ 9 matadi ya oniksi, mpi matadi ya nkaka ya kutula na efodi+ mpi na lele ya ntulu.+

10 “‘Bika nde bantu yonso yina me zaba kisalu mbote*+ na kati na beno kukwisa mpi kusala bima yonso yina Yehowa me tuba, 11 disongidila, nzo-tenta ti tenta na yo mpi lele sambu na kufika yo, bikangilu na yo mpi makunzi na yo, banti na yo, makunzi na yo ya nene mpi mabulu na yo; 12 Sanduku+ ti banti+ na yo, mufiniku+ mpi rido+ ya ke kabulaka; 13 mesa+ mpi banti na yo mpi bisadilu na yo yonso mpi mampa ya kumonisa;+ 14 kima ya kutudila minda+ sambu na nsemo mpi bisadilu na yo mpi minda na yo mpi mafuta sambu na nsemo;+ 15 mesa-kimenga ya ndumbu+ mpi banti na yo; mafuta ya bo ke tulaka muntu mpi ndumbu ya nsudi ya kitoko;+ rido sambu na munoko ya nzo-tenta; 16 mesa-kimenga ya dikabu ya kuyoka+ mpi wayi na yo ya kwivre, banti na yo mpi bisadilu na yo yonso; dilonga ya nene mpi kima ya kutula yo;+ 17 barido ya ke lela ya kibansala,+ makunzi na yo mpi mabulu na yo; rido ya munoko ya kibansala; 18 bapike ya tenta ya nzo-tenta mpi bapike ya tenta ya kibansala mpi bansinga na yo;+ 19 bilele+ ya kutunga mbote sambu na kusala na kisika ya santu, bilele ya santu sambu na nganga-nzambi Aroni,+ mpi bilele ya bana na yandi sambu bo vanda banganga-nzambi.’”

20 Yo yina kimvuka ya mvimba ya bantu ya Izraele katukaka na ntwala ya Moize mpi basikaka. 21 Ebuna konso muntu yina ntima na yandi vandaka kupusa yandi+ mpi konso muntu yina mpeve na yandi vandaka kupusa yandi, kwisaka mpi nataka makabu na yandi sambu na Yehowa sambu bo sadila yo sambu na tenta ya lukutakanu, sambu na bisalu na yo yonso, mpi sambu na bilele ya santu. 22 Bo landaka kukwisa, babakala ti bankento, konso muntu yina ntima na yandi zolaka, mpi bo vandaka kunata bilunga ya bo ke lwataka na bilele, bima-makutu, mitaku, mpi babiju ya nkaka, mpi bima ya wolo ya mitindu yonso. Bo yonso pesaka makabu na bo* ya wolo na Yehowa.+ 23 Bantu yonso yina vandaka ti nsinga ya ble, lene ya mbwaki-ble, lele ya mbwaki mingi, lino ya kitoko, mika ya nkombo, bampusu ya dimeme ya bakala ya bo me pakula mukubu ya mbwaki, mpi bampusu ya mbisi ya bo ke bingaka foke, nataka yo. 24 Bantu yonso yina pesaka arza mpi kwivre nataka makabu ya Yehowa, mpi bantu yonso yina vandaka ti mabaya ya akasia sambu na konso kisalu ya nzo-tenta nataka yo.

25 Bankento yonso yina zabaka kisalu mbote+ tungaka na maboko na bo, mpi bo nataka bima yina bo tungaka: nsinga ya ble, lene ya mbwaki-ble, lele ya mbwaki mingi, mpi lino ya kitoko. 26 Bankento yonso yina zabaka kisalu mbote yina ntima na bo vandaka kupusa bo tungaka mika ya nkombo.

27 Ebuna bamfumu nataka matadi ya oniksi ti matadi ya nkaka ya kutula na efodi mpi na lele ya ntulu,+ 28 balsami mpi mafuta sambu na nsemo, sambu na mafuta ya bo ke tulaka muntu+ mpi sambu na ndumbu ya nsudi ya kitoko.+ 29 Babakala ti bankento yonso yina bantima na bo pusaka bo nataka mwa kima sambu na kisalu yina Yehowa tubaka na nzila ya Moize nde beto fwete sala; bantu ya Izraele nataka yo bonso dikabu ya luzolo ya mbote na Yehowa.+

30 Ebuna Moize tubilaka bantu ya Izraele nde: “Tala, Yehowa me pona Besalele mwana ya Uri mwana ya Hure ya dikanda ya Yuda.+ 31 Yandi me fulusa yandi ti mpeve ya Nzambi, me pesa yandi mayele, mayele ya kubakisa mambu, mpi nzayilu ya bisalu ya maboko ya mutindu na mutindu 32 sambu na kusala bapula, sambu na kusala bima ti wolo, ti arza, mpi ti kwivre, 33 sambu na kuzenga mpi kuyidika matadi, mpi sambu na kusala bima ya kitoko ya mabaya ya mutindu na mutindu. 34 Yandi me tula na ntima na yandi mpi ya Oholiabi+ mwana ya Ahisamaki ya dikanda ya Dani mayele ya kulonga bantu ya nkaka. 35 Yandi me pesa bo mayele mingi ya kusala kisalu mbote*+ sambu na kusala kisalu yonso ya muntu ya ke salaka kisalu ya maboko, ya muntu ya ke tulaka bifwanisu na bilele, mpi ya muntu ya ke sadilaka nsinga ya ble, lene ya mbwaki-ble, lele ya mbwaki mingi, mpi lino ya kitoko sambu na kutunga bilele, mpi ya muntu ya ke tungaka bilele. Babakala yai ta sala bisalu ya mitindu yonso mpi ta yidika bapula ya mitindu yonso.