Bingana

11 Bakilo ya luvunu* kele kima ya nzanzi na meso ya Yehowa,

Kansi kilo ya sikisiki* ke pesaka yandi kiese.+

 2 Kana lulendo me kwisa, nsoni ta landa,+

Kansi mayele ke vandaka ti bantu ya kudikulumusa.+

 3 Kwikama ya bantu ya mbote ke twadisaka bo,+

Kansi luvunu ya bayekudi ta fwa bo.+

 4 Kimvwama* ta vanda ve na mfunu na kilumbu ya makasi,+

Kansi lunungu kele kima yina ta gulusa na lufwa.+

 5 Lunungu ya muntu ya kukonda kifu ke kumisaka nzila na yandi ya kusungama,

Kansi muntu ya mbi ta bwa sambu na mbi na yandi mosi.+

 6 Lunungu ya bantu ya mbote ta gulusa bo,+

Kansi bayekudi ta kangama na banzala na bo mosi.+

 7 Kana muntu ya mbi kufwa, kivuvu na yandi ke fwaka;

Mpi mambu yina yandi vandaka kuvingila ya me simbama na ngolo na yandi mpi ke fwaka.+

 8 Muntu ya lunungu bo ke gulusaka yandi na bampasi,

Mpi muntu ya mbi ke bakaka kisika na yandi.+

 9 Na munoko na yandi, nkolami* ke bwisaka nkweno na yandi,

Kansi na nzayilu bo ke gulusaka bantu ya lunungu.+

10 Bumbote ya bantu ya lunungu ke salaka nde mbanza kuvanda na kiese,

Mpi ntangu bantu ya mbi ke fwaka, bantu ke tulaka milolo ya kiese.+

11 Sambu na lusakumunu ya bantu ya kusungama, bo ke tombulaka mbanza,+

Kansi munoko ya bantu ya mbi ke bwisaka yo.+

12 Muntu yina me konda mabanza ya mbote* ke vwezaka nkweno na yandi,

Kansi muntu yina kele ti luswasukusu ya kieleka ke bikalaka pima.+

13 Muntu ya ke kusilaka bantu makambu ke tambula-tambulaka sambu na kubasisa mambu ya kinsweki,+

Kansi muntu ya me fwana na kutudila ntima* ke bumbaka diambu ya kinsweki.*

14 Kana lutwadisu ya mayele kele ve, bantu ke bwaka,

Kansi mambu ke nungaka* kana bandongisi kele mingi.+

15 Muntu yina ke ndima kufutila munzenza mfuka ta suka kibeni mbi,+

Kansi muntu yina ke buya* kupesana maboko sambu na kuwakana ta vanda na lutaninu.

16 Nkento ya mawete* ke bakaka nkembo,+

Kansi bantu ya nku ke simbaka bimvwama.

17 Muntu ya mbote* ke kudinatilaka mambote,*+

Kansi muntu ya nku ke kudinatilaka mavwanga.*+

18 Muntu ya mbi ke bakaka lufutu ya luvunu,+

Kansi muntu yina ke kunaka lunungu ke bakaka matabisi ya kieleka.+

19 Muntu yina ke nwaninaka ngolo lunungu ta baka luzingu,+

Kansi muntu yina ke landa mambu ya mbi ta fwa.

20 Bantu yina kele ntima mbi kele kima ya nzanzi na meso ya Yehowa,+

Kansi bantu yina nzila na bo kele ya kukonda kifu ke pesaka yandi kiese.+

21 Ndima diambu yai:* Muntu ya mbi fwete baka kibeni ndola,+

Kansi bana ya bantu ya lunungu ta guluka.

22 Bonso lupetu ya wolo na mbombo ya ngulu

Nkento ya kitoko yina ke buya mabanza ya mbote kele mutindu yina.

23 Nzala ya bantu ya lunungu ke nataka mambote,+

Kansi mambu yina bantu ya mbi ke tudilaka kivuvu ke nataka makasi.

24 Muntu mosi ke kabaka mingi,* mpi yandi ke kumaka ti bima mingi;+

Muntu ya nkaka ke buyaka kupesa bima yina yandi fwete pesa, kansi yandi ke kumaka nsukami.+

25 Muntu* yina ke kabaka ta toma,*+

Mpi muntu yina ke pesaka bankaka kikesa,* bo ta pesa yandi kikesa.+

26 Bantu ta singa muntu yina ke buya kupesa nkeni,

Kansi bo ta sakumuna muntu yina ke teka yo.

27 Muntu yina ke sosa kusala mambu ya mbote na kikesa yonso, yandi ke sosa nde bo ndima yandi,+

Kansi muntu yina ke sosa mambu ya mbi—yo yina kibeni mambu yina ta bwila yandi.+

28 Muntu yina ke tula ntima na bimvwama na yandi ta bwa,+

Kansi bantu ya lunungu ta kuma mingi bonso matiti.+

29 Konso muntu yina ke natila dibuta na yandi mpasi* ta baka* mupepe,+

Mpi zoba ta vanda nsadi ya muntu yina kele na ntima ya mayele.

30 Mbuma ya muntu ya lunungu kele nti ya luzingu,+

Mpi muntu yina ke nunga mioyo* kele mayele.+

31 Kana bo ke futaka muntu ya lunungu ya kele na ntoto,

Ya kieleka bo ta futa mpi muntu ya mbi ti nsumuki!+