Bantotila ya Zole

12 Na mvula ya nsambwadi ya Yehu,+ Yehoashi+ kumaka ntotila, mpi yandi yalaka bamvula 40 na Yeruzalemi. Zina ya mama na yandi Sibia muntu ya Bere-sheba.+ 2 Yehoashi landaka kusala mambu ya mbote na meso ya Yehowa bilumbu yonso yina nganga-nzambi Yehoyada longaka yandi. 3 Kansi bo katulaka ve bisika ya kunanguka,+ mpi bantu vandaka kaka kutambika mpi kupesa midinga ya bimenga na zulu ya bisika ya kunanguka.

4 Yehoashi tubilaka banganga-nzambi nde: “Beno baka mbongo yonso yina bo ke nata na nzo ya Yehowa sambu na makabu ya santu,+ mbongo yina konso muntu ke futa,+ ntalu yina muntu* me zenga, mpi mbongo yonso yina ntima ya konso muntu ke pusa yandi na kunata na nzo ya Yehowa.+ 5 Banganga-nzambi ta baka yo bo mosi na bantu na bo yina ke pesaka mbongo* mpi ta sadila yo sambu na kuyidika nzo, konso kisika yina kele ya kubeba.”+

6 Na mvula ya 23 ya ntotila Yehoashi, banganga-nzambi vandaka me yidika ntete ve bisika ya kubeba na nzo.+ 7 Yo yina ntotila Yehoashi bingaka nganga-nzambi Yehoyada+ ti banganga-nzambi ya nkaka mpi tubilaka bo nde: “Sambu na nki beno ke yidika ve bisika yina me beba na nzo? Beno baka diaka ve mbongo na bantu na beno yina ke pesa mbongo, katula kaka kana beno ke sadila yo sambu na kuyidika nzo.”+ 8 Ebuna banganga-nzambi ndimaka na kubaka diaka ve mbongo na bantu mpi na kutwadisa diaka ve kisalu ya kuyidika nzo.

9 Ebuna nganga-nzambi Yehoyada bakaka sanduku+ mosi, tobulaka ditobo na mufiniku na yo, mpi yandi tulaka yo pene-pene ya mesa-kimenga na diboko ya kitata kana muntu ke kota na nzo ya Yehowa. Yo kele kisika yina banganga-nzambi yina vandaka bankengidi ya bakielo vandaka kutula mbongo yonso yina bantu vandaka kunata na nzo ya Yehowa.+ 10 Konso ntangu yina bo vandaka kumona nde mbongo vandaka mingi na kati ya sanduku, sekretere ya ntotila ti nganga-nzambi ya nene vandaka kukwisa, kuvukisa yo,* mpi kutanga mbongo yina bantu nataka na nzo ya Yehowa.+ 11 Bo vandaka kupesa mbongo yina bo tangaka na bantu yina bo tulaka sambu na kutwadisa kisalu yina bo vandaka kusala na nzo ya Yehowa. Ebuna bantu yina vandaka kufuta bantu ya ke salaka kisalu ya mabaya mpi bantu ya ke tungaka yina vandaka kusala na nzo ya Yehowa,+ 12 mpi bamaso ti bantu yina ke zengaka matadi. Bo nataka mpi banti ti matadi ya bo me zenga sambu na kuyidika bisika yina bebaka na nzo ya Yehowa, mpi bo sadilaka mbongo yina sambu na bisalu yonso ya nkaka yina bo salaka sambu na kuyidika nzo.

13 Kansi, mbongo yina bantu nataka na nzo ya Yehowa, bo sadilaka ve ata ndambu sambu na kusala malonga ya nene ya arza, bima ya kufwila tiya, babolo, bampungi,+ to bima ya wolo to ya arza ya mitindu yonso sambu na nzo ya Yehowa.+ 14 Bo vandaka kupesa yo kaka na bantu yina vandaka kusala kisalu, mpi bo sadilaka yo sambu na kuyidika nzo ya Yehowa. 15 Bantu yina bo vandaka kupesa mbongo sambu bo pesa yo na bantu ya kisalu, bo vandaka kulomba bo ve bakonti sambu bo vandaka bantu ya me fwana na kutudila ntima.+ 16 Kansi, mbongo ya makabu sambu na makambu+ ti mbongo ya makabu sambu na disumu, bo vandaka kunata yo ve na nzo ya Yehowa; yo vandaka ya banganga-nzambi.+

17 Na ntangu yina Azaele+ ntotila ya Siria tombukaka sambu na kunwanisa Gati,+ mpi yandi botulaka yo, na nima yandi bakaka lukanu ya kunwanisa* Yeruzalemi.+ 18 Ebuna Yehoashi ntotila ya Yuda bakaka makabu yonso ya santu yina ba-nkaka na yandi Yehoshafati, Yehorami, mpi Ahazia bantotila ya Yuda santisaka, mpi makabu na yandi mosi ya santu ti wolo yonso yina vandaka na bisika ya kubumba bimvwama na nzo ya Yehowa mpi na nzo ya ntotila, ebuna yandi tindilaka yo Azaele ntotila ya Siria.+ Yo yina yandi katukaka na Yeruzalemi.

19 Sambu na mambu ya nkaka ya Yehoashi salaka, yonso yina yandi salaka, keti bo me sonikaka yo ve na mukanda ya bansangu ya bantotila ya Yuda? 20 Kansi, bansadi na yandi vukanaka sambu na kusadila yandi komplo,+ mpi bo fwaka Yehoashi na nzo ya Mwa-Ngumba,*+ na nzila yina ke kulumukaka tii na Sila. 21 Bansadi na yandi Yozakare mwana ya Shimeati mpi Yehozabadi mwana ya Shomere bantu bulaka yandi mpi fwaka yandi.+ Bo zikaka yandi ti ba-nkaka na yandi na Mbanza ya Davidi, ebuna mwana na yandi Amasia kumaka ntotila na kisika na yandi.+