Bansangu ya Zole

34 Yoziasi+ vandaka ti bamvula nana ntangu yandi kumaka ntotila, mpi yandi yalaka bamvula 31 na Yeruzalemi.+ 2 Yandi salaka mambu ya mbote na meso ya Yehowa mpi yandi tambulaka na banzila ya nkaka na yandi Davidi; yandi kwendaka ve na diboko ya kitata to na diboko ya kimama.

3 Na mvula ya 8 ya luyalu na yandi, ntangu yandi vandaka ntete mwana-fioti, yandi yantikaka kusosa Nzambi ya nkaka na yandi Davidi;+ mpi na mvula ya 12, yandi yantikaka kukatula bisika ya kunanguka,+ banti ya santu,* biteki,+ mpi biteki ya bibende* sambu na kutula bunkete na Yuda mpi na Yeruzalemi.+ 4 Diaka, bo fwaka bamesa-kimenga ya Babaale na meso na yandi, mpi yandi zengaka bamesa-kimenga ya ndumbu yina vandaka na zulu na yo. Yandi zengaka mpi bitini-bitini banti ya santu,* biteki, mpi biteki ya bibende* mpi yandi kumisaka yo mfututu, ebuna yandi mwangaka yo na zulu ya maziamu ya bantu yina vandaka kutambikila yo.+ 5 Yandi yokaka mikwa ya banganga-nzambi na bamesa-kimenga na bo.+ Na mutindu yina, yandi tulaka bunkete na Yuda mpi na Yeruzalemi.

6 Na bambanza ya Manase, ya Efrayimi,+ ya Simeoni, tii na bambanza ya Naftali, na bisika ya kubeba yina vandaka na nziunga na yo, 7 yandi fwaka bamesa-kimenga mpi yandi bukaka banti ya santu ti biteki,+ yandi kumisaka yo mfututu; mpi yandi zengaka bamesa-kimenga ya ndumbu na insi ya mvimba ya Izraele,+ ebuna yandi vutukaka na Yeruzalemi.

8 Na mvula ya 18 ya luyalu na yandi, ntangu yandi manisaka kutula bunkete na insi mpi na tempelo,* yandi tindaka Shafani+ mwana ya Asalia, Maaseya mfumu ya mbanza, mpi Yoa mwana ya Yoahazi muntu ya ke sonikaka mambu sambu na kuyidika nzo ya Yehowa Nzambi na yandi.+ 9 Bo kwendaka na nganga-nzambi ya nene Hilkia mpi bo pesaka yandi mbongo yina bantu nataka na nzo ya Nzambi, yina Balevi yina vandaka bankengidi ya bakielo bakaka na bantu ya Manase, ya Efrayimi, mpi na bantu yonso ya nkaka ya Izraele,+ ti na bantu ya Yuda, ya Benyamini, mpi ya Yeruzalemi. 10 Na nima, bo pesaka yo na bantu yina bo tulaka sambu na kutwadisa kisalu ya nzo ya Yehowa. Ebuna bantu yina vandaka kusala kisalu na nzo ya Yehowa sadilaka yo sambu na kuyidika nzo yina. 11 Bo pesaka yo na bantu yina ke salaka bisalu ya maboko ti na bantu yina ke tungaka, sambu bo sumba matadi ya bo me zenga mpi mabaya sambu na bima ya kukangila mpi sambu na kutunga ti banti banzo yina bantotila ya Yuda bikaka nde yo beba.+

12 Bantu yina salaka kisalu na kwikama yonso.+ Bo tulaka Balevi yai, Yahati ti Obadia, na kati ya bana ya Merari,+ mpi Zekaria ti Meshulami, na kati ya bana ya Kohati,+ sambu bo vanda bankengi na bo. Mpi Balevi, bayina yonso zabaka kubula miziki mbote,+ 13 vandaka kutala bantu yina ke salaka bisalu ya ngolo* mpi bo vandaka bankengi ya bantu yonso yina vandaka kusala bisalu ya mutindu na mutindu; mpi Balevi ya nkaka vandaka basekretere, bakapita, mpi bankengidi ya bakielo.+

14 Ntangu bo vandaka kubasisa mbongo yina bantu vandaka kunata na nzo ya Yehowa,+ nganga-nzambi Hilkia monaka mukanda ya Nsiku ya Yehowa+ yina yandi pesaka na nzila* ya Moize.+ 15 Yo yina, Hilkia tubilaka sekretere Shafani nde: “Mono me mona mukanda ya Nsiku na nzo ya Yehowa.” Ebuna Hilkia pesaka mukanda yina na Shafani. 16 Na nima Shafani natilaka ntotila mukanda yina mpi songaka yandi nde: “Bansadi na nge ke sala bisalu yonso yina nge pesaka bo. 17 Bo me baka mbongo yina bo monaka na nzo ya Yehowa, mpi bo me pesa yo na bantu yina nge tulaka mpi na bantu yina ke sala kisalu.” 18 Sekretere Shafani songaka mpi ntotila nde: “Nganga-nzambi Hilkia me pesa mono mukanda mosi.”+ Ebuna Shafani yantikaka kutanga yo na ntwala ya ntotila.+

19 Ntangu ntotila waka bangogo ya Nsiku, yandi pasulaka bilele na yandi.+ 20 Ebuna ntotila songaka Hilkia, Ahikami+ mwana ya Shafani, Abdoni mwana ya Mika, sekretere Shafani, mpi Asaya nsadi ya ntotila nde: 21 “Beno kwenda, beno yula Yehowa sambu na mono mpi sambu na bantu yina me bikala na Izraele mpi na Yuda na yina me tala mambu ya kele na mukanda yina ya bo me mona; sambu Yehowa ta wila beto makasi ya ngolo sambu ba-nkaka na beto salaka ve mambu yina Yehowa tubaka mpi bo zitisaka ve mambu yonso yina bo me sonikaka na mukanda yai.”+

22 Yo yina Hilkia, ti bantu yina ntotila tindaka, kwendaka na mbikudi ya nkento Hulda.+ Yandi vandaka nkento ya Shalumi mwana ya Tikva mwana ya Arhasi, muntu yina ke talaka kisika ya kubumba bilele, mpi yandi vandaka kuzinga na Ndambu ya Mpa ya Yeruzalemi; ebuna bo solulaka ti yandi kuna.+ 23 Yandi tubilaka bo nde: “Yehowa Nzambi ya Izraele ke tuba nde, ‘Beno songa muntu yina me tinda beno na mono nde: 24 “Yehowa me tuba nde, ‘Mono ta natila kisika yai mpi bantu na yo mpasi,+ disongidila balusingu yonso ya bo me sonikaka na mukanda+ yina bo tangaka na ntwala ya ntotila ya Yuda. 25 Sambu bo me yambula mono+ mpi bo ke yoka bimenga sambu na banzambi ya nkaka sambu na kupesa mono makasi+ na bisalu yonso ya maboko na bo, mono ta wila kisika yai makasi mpi yo ta mana ve.’”+ 26 Kansi sambu na ntotila ya Yuda yina tindaka beno na kuyula Yehowa, beno fwete tubila yandi nde, “Yehowa Nzambi ya Izraele me tuba nde: ‘Sambu na mambu yina nge me wa,+ 27 sambu ntima na nge vandaka bulemfu* mpi nge kudikulumusaka na ntwala ya Nzambi ntangu nge waka mambu yina mono tubaka sambu na kisika yai ti bantu na yo mpi nge kudikulumusaka na ntwala na mono, nge pasulaka bilele na nge mpi nge dilaka na ntwala na mono, mono mpi me wa nge,+ Yehowa muntu me tuba. 28 Yo yina mono ta vukisa nge ti ba-nkaka na nge,* mpi bo ta zika nge na maziamu na nge na ngemba, mpi meso na nge ta mona ve bampasi yonso yina mono ta nata na kisika yai mpi na bantu na yo.’”’”+

Ebuna bo kwisaka kuzabisa ntotila mambu yina. 29 Yo yina ntotila tindaka ndinga mpi bingaka bankuluntu yonso ya Yuda ti ya Yeruzalemi.+ 30 Na nima ntotila kwendaka na nzo ya Yehowa ti babakala yonso ya Yuda, bantu ya Yeruzalemi, banganga-nzambi, Balevi—bantu yonso, bantu ya mfunu mpi bantu ya kukonda mfunu. Yandi tangaka na makutu na bo mambu yonso ya mukanda ya kuwakana yina bo monaka na nzo ya Yehowa.+ 31 Ntotila telamaka na kisika na yandi mpi yandi salaka kuwakana*+ na ntwala ya Yehowa nde yandi ta landa Yehowa mpi ta zitisa bantuma na yandi, bangibusa na yandi, mpi bansiku na yandi na ntima na yandi ya mvimba mpi na moyo*+ na yandi ya mvimba mpi yandi ta zitisa bangogo ya kuwakana yina bo sonikaka na mukanda yai.+ 32 Diaka, yandi lombaka bantu yonso yina vandaka na Yeruzalemi mpi na Benyamini na kundima yo. Ebuna bantu ya Yeruzalemi landaka kuwakana ya Nzambi, Nzambi ya ba-nkaka na bo.+ 33 Na nima, Yoziasi katulaka bima yonso ya nzanzi* na bantoto yonso yina vandaka ya bantu ya Izraele,+ mpi yandi salaka nde bantu yonso ya Izraele kusadila Yehowa Nzambi na bo. Na luzingu* na yandi ya mvimba bo yambulaka ve kulanda Yehowa Nzambi ya ba-nkaka na bo.