Bansangu ya Zole

32 Na nima ya mambu yai mpi ya mambu yai ya kwikama,+ Senakeribi ntotila ya Asiria kwisaka mpi kotaka na ngolo na Yuda. Yandi ziungaka bambanza ya ngolo, ti lukanu ya kutobula yo mpi kubotula yo.+

2 Ntangu Ezekiasi monaka nde Senakeribi me kwisa mpi kele ti lukanu ya kunwanisa Yeruzalemi, 3 na nima ya kusolula ti bamfumu na yandi mpi basoda na yandi, yandi bakaka lukanu ya kukanga bamasa ya banto ya masa yina vandaka na nganda ya mbanza,+ mpi bo pesaka yandi maboko. 4 Bantu mingi vukanaka, ebuna bo kangaka banto yonso ya masa mpi bamasa yina ke kulumukaka na insi yina, bo tubaka nde: “Sambu na nki bantotila ya Asiria fwete kwisa mpi kukuta masa mingi?”

5 Diaka, ti lukanu ya ngolo yandi tungaka diaka kibaka ya mvimba yina bwaka, yandi tedimisaka banzo-zulu na zulu na yo, mpi yandi salaka kibaka ya nkaka na nganda. Yandi yidikaka mpi Mwa-Ngumba*+ ya Mbanza ya Davidi, mpi yandi salaka binwaninu mingi ti bitaninu. 6 Na nima, yandi tulaka bamfumu ya basoda sambu na kutala bantu mpi yandi vukisaka bo na bala-bala ya nene ya kielo ya mbanza ebuna yandi siamisaka bo* mpi tubaka nde: 7 Beno vanda kikesa mpi ngolo. Beno wa boma ve mpi beno tekita ve sambu na ntotila ya Asiria+ mpi bantu mingi yina kele ti yandi, sambu bayina kele ti beto kele mingi kuluta bayina kele ti yandi.+ 8 Yandi kele ti diboko ya kinsuni,* kansi beto kele ti Yehowa Nzambi na beto sambu na kusadisa beto mpi sambu na kunwana bitumba na beto.”+ Ebuna mambu yina Ezekiasi ntotila ya Yuda+ tubaka pesaka bantu kikesa.

9 Na nima, ntangu Senakeribi ntotila ya Asiria vandaka na Lakishi+ ti ngolo yonso ya kintinu na yandi,* yandi tindaka bansadi na yandi na Yeruzalemi, na Ezekiasi ntotila ya Yuda mpi na bantu yonso ya Yudea yina vandaka na Yeruzalemi,+ yandi tubaka nde:

10 “Senakeribi ntotila ya Asiria ke tuba nde, ‘Beno ke tula ntima na nki sambu beno bikala na Yeruzalemi awa ya bo me ziunga yo?+ 11 Keti Ezekiasi ke kusa beno ve mpi ke bika ve nde beno fwa na nzala mpi na kiwina, ntangu yandi ke tuba nde: “Yehowa Nzambi na beto ta gulusa beto na maboko ya ntotila ya Asiria”?+ 12 Keti Ezekiasi yai mosi ve muntu katulaka bisika ya kunanguka+ ya Nzambi na beno* ti bamesa-kimenga+ na yandi mpi na nima yandi tubilaka bantu ya Yuda mpi ya Yeruzalemi nde: “Beno fwete fukama na ntwala ya mesa-kimenga mosi mpamba mpi kuyoka bimenga na beno na zulu na yo sambu yo basisa midinga”?+ 13 Keti beno me zaba ve mambu yina mono ti ba-nkaka na mono salaka bantu yonso ya bansi yai?+ Keti banzambi ya makanda ya bansi yina kukaka kugulusa insi na bo na maboko na mono?+ 14 Nani na kati ya banzambi yonso ya makanda yai yina ba-nkaka na mono fwaka kukaka kugulusa bantu na yandi na maboko na mono, sambu Nzambi na beno kukuka kugulusa beno na maboko na mono?+ 15 Ntangu yai beno bika ve nde Ezekiasi kukusa-kusa beno mutindu yina!+ Beno ndima yandi ve, sambu nzambi ya dikanda mosi ve to ya kimfumu mosi ve kukaka kugulusa bantu na yandi na maboko na mono mpi na maboko ya ba-nkaka na mono. Ya kieleka, Nzambi na beno ta kuka ve kugulusa beno na maboko na mono!’”+

16 Bansadi na yandi tubaka nkutu mambu mingi ya mbi sambu na Yehowa Nzambi ya kieleka mpi sambu na nsadi na yandi Ezekiasi. 17 Yandi sonikaka mpi mikanda+ sambu na kufinga Yehowa Nzambi ya Izraele+ mpi sambu na kutuba mambu ya mbi sambu na yandi, nde: “Bonso banzambi ya makanda ya bansi yina lendaka ve kugulusa bantu na bo na maboko na mono,+ Nzambi ya Ezekiasi ta gulusa ve bantu na yandi na maboko na mono.” 18 Bo landaka kutubila bantu ya Yeruzalemi yina vandaka na zulu ya kibaka na ndinga ya ngolo na ndinga ya Bayuda, sambu na kupesa bo boma mpi kutitisa bo, sambu bo botula mbanza.+ 19 Bo tubaka mambu ya mbi sambu na Nzambi ya Yeruzalemi kaka mutindu bo tubaka sambu na banzambi ya bantu ya ntoto, yina kele kisalu ya maboko ya muntu. 20 Kansi ntotila Ezekiasi mpi mbikudi Yezaya+ mwana ya Amozi landaka kusamba sambu na diambu yai mpi kubinga Nzambi na zulu sambu na kulomba lusadisu.+

21 Ebuna Yehowa tindaka wanzio mosi mpi yandi fwaka konso soda ya ngolo,+ ntwadisi, mpi mfumu na camp ya ntotila ya Asiria, yo yina yandi vutukaka na insi na yandi na nsoni. Na nima, yandi kotaka na nzo* ya nzambi na yandi, mpi kuna bana na yandi ya nkaka fwaka yandi na mbele ya bitumba.+ 22 Na mutindu yina, Yehowa gulusaka Ezekiasi ti bantu ya Yeruzalemi na maboko ya Senakeribi ntotila ya Asiria mpi na maboko ya bantu yonso ya nkaka ebuna yandi pesaka bo ngemba na bandambu yonso. 23 Bantu mingi natilaka Yehowa makabu na Yeruzalemi mpi bo natilaka Ezekiasi ntotila ya Yuda bima ya kuluta kitoko;+ ebuna makanda yonso kumaka kuzitisa yandi mingi na nima ya mambu yai.

24 Na bilumbu yina, Ezekiasi belaka mpi yandi zolaka kufwa, ebuna yandi sambaka Yehowa,+ mpi yandi pesaka Ezekiasi mvutu mpi kidimbu.+ 25 Kansi Ezekiasi monisaka ve ntonda sambu na mambu ya mbote yina bo sadilaka yandi, sambu ntima na yandi kumaka lulendo, ebuna Nzambi wilaka yandi makasi ti Yuda mpi Yeruzalemi. 26 Kansi, Ezekiasi kudikulumusaka mpi bikisaka lulendo ya ntima na yandi,+ yandi ti bantu ya Yeruzalemi, ebuna makasi ya Yehowa bwilaka bo ve na bilumbu ya Ezekiasi.+

27 Ezekiasi kumaka ti bimvwama mpi nkembo mingi kibeni;+ mpi yandi kuditungilaka banzo ya kubumbila bima+ sambu na arza, wolo, matadi ya ntalu, mafuta ya balsami, bitaninu, mpi sambu na bima yonso ya kitoko. 28 Yandi tungaka mpi bisika ya kubumbila bima sambu na mbuma, vinu ya mpa, ti mafuta, mpi balupangu sambu na bitwisi ya mitindu yonso ti balupangu sambu na bimvuka ya mameme. 29 Yandi kudibakilaka mpi bambanza, bitwisi, mameme, ti bangombe mingi kibeni, sambu Nzambi pesaka yandi bima mingi kibeni. 30 Ezekiasi muntu kangaka nto ya masa ya zulu ya bamasa+ ya Gihoni+ mpi salaka nde yo kulumuka mbala mosi tii na westi na Mbanza ya Davidi,+ mpi Ezekiasi vandaka kununga na bisalu na yandi yonso. 31 Kansi, ntangu bo tindaka binati-ndinga ya bamfumu ya Babilone sambu na kuyula yandi mambu ya me tala kidimbu+ yina bwaka na insi,+ Nzambi ya kieleka bikisaka yandi yandi mosi sambu na kumeka+ yandi, sambu na kuzaba mambu yonso yina vandaka na ntima na yandi.+

32 Sambu na mambu ya nkaka ya Ezekiasi salaka mpi mambu yina yandi salaka ya ke monisa zola na yandi ya kwikama,+ bo me sonikaka yo na mbona-meso ya mbikudi Yezaya,+ mwana ya Amozi, na Mukanda ya Bantotila ya Yuda mpi ya Izraele.+ 33 Na nima Ezekiasi lalaka sambu na kupema ti ba-nkaka na yandi, mpi bo zikaka yandi na mwa-ngumba na maziamu ya bana ya Davidi;+ bantu yonso ya Yuda mpi bantu ya Yeruzalemi pesaka yandi lukumu na lufwa na yandi. Ebuna mwana na yandi Manase kumaka ntotila na kisika na yandi.