Yeremia
13 Yehowa songaka mono nde: “Kwenda kusumba mukaba ya lino mpi lwata yo na luketo, kansi kutula yo ve na masa.” 2 Yo yina mono sumbaka mukaba mutindu Yehowa tubaka mpi mono lwataka yo na luketo. 3 Ebuna ndinga ya Yehowa kwisilaka mono na mbala ya zole nde: 4 “Baka mukaba ya nge sumbaka yina nge me lwata, telama, kwenda na Efrate, mpi bumba yo kuna na kati ya mpwasa ya ditadi.” 5 Yo yina mono kwendaka mpi bumbaka yo pene-pene ya Efrate, kaka mutindu Yehowa songaka mono.
6 Kansi bilumbu mingi na nima, Yehowa tubilaka mono nde: “Telama, kwenda na Efrate, mpi baka mukaba yina mono songaka nge na kubumba kuna.” 7 Yo yina mono kwendaka na Efrate, mono timunaka, mpi mono bakaka mukaba na kisika yina mono bumbaka yo, mpi mono monaka nde yo me beba; yo vandaka diaka ve na mfunu ata fioti.
8 Na nima ndinga ya Yehowa kwisilaka mono nde: 9 “Yehowa ke tuba nde, ‘Mutindu mosi mpi, mono ta fwa lulendo ya Yuda mpi lulendo ya mingi ya Yeruzalemi.+ 10 Bantu yai ya mbi yina ke buya kuzitisa bangogo na mono,+ yina ke landa ntima na bo+ na ntu-ngolo yonso, mpi yina ke landa banzambi ya nkaka, ke sadila bo mpi ke fukimina bo, ta kuma kaka bonso mukaba yai ya kele diaka ve na mfunu ata fioti.’ 11 ‘Kaka mutindu mukaba ke kangamaka na luketo ya muntu, mono salaka nde nzo ya mvimba ya Izraele mpi nzo ya mvimba ya Yuda kukangama na mono,’ Yehowa muntu me tuba, ‘sambu bo kuma bantu,+ zina,+ lukumu, mpi kima ya kitoko sambu na mono. Kansi bo lemfukaka ve.’+
12 “Nge fwete pesa bo mpi nsangu yai, ‘Yehowa Nzambi ya Izraele ke tuba nde: “Konso dibungu ya nene fwete fuluka ti vinu.”’ Mpi bo ta vutudila nge nde, ‘Keti beto me zaba ve nde konso dibungu ya nene fwete fuluka ti vinu?’ 13 Na nima tubila bo nde, ‘Yehowa me tuba nde: “Tala, mono ke pesa bantu yonso ya insi yai vinu mingi tii kuna bo ta lawuka,+ bantotila yina me vanda na kiti ya kimfumu ya Davidi, banganga-nzambi ti bambikudi, mpi bantu ya Yeruzalemi yonso. 14 Mpi mono ta tutanisa bo sambu na kupasula bo, batata ti bana kiteso mosi,” Yehowa+ muntu me tuba. “Mono ta wila bo ve mawa, ta fwila bo ve nkenda, mpi ta vanda ve na ntantu sambu na bo; kima mosi ve ta kanga mono nzila na kufwa bo.”’+
15 Beno wa mpi beno tula dikebi.
Beno vanda ve lulendo, sambu Yehowa me tuba.
16 Beno pesa Yehowa Nzambi na beno nkembo
Na ntwala nde yandi nata mudidi
Mpi na ntwala nde makulu na beno kubula sakuba na bangumba na ntwala nde mpimpa kubwa.
17 Mpi kana beno buya kuwa,
Mono* ta dila na kinsweki sambu na lulendo na beno.
Mono ta basisa mansanga mingi, mpi meso na mono ta kulumusa mansanga,+
Sambu bo me nata mameme ya Yehowa+ na kimpika.
18 Songa ntotila mpi mama ya ntotila*+ nde, ‘Beno vanda na kisika ya nsi,
Sambu mpu na beno ya kimfumu ya kitoko ta katuka na ntu na beno mpi ta bwa.’
19 Bambanza ya sudi kele ya kukanga,* muntu ya kukangula yo kele ve.
Bo me nata bantu yonso ya Yuda na insi ya nkaka, bo me nata bo yonso na insi ya nkaka.+
20 Tombula meso na nge mpi tala bantu yina ke kwisa katuka na nordi.+
Wapi bitwisi yina bo pesaka nge, mameme na nge ya kitoko?+
21 Nge ta tuba nki ntangu ndola na nge ta kwisa
Na banduku na nge ya ngolo yina nge yedisaka katuka luyantiku?+
Keti mpasi ya kubuta ta simba nge ve, bonso ya nkento yina ke buta?+
22 Mpi ntangu nge ke tuba na ntima na nge nde, ‘Sambu na nki mambu yai me bwila mono?’+
Bo me katula+ bansongi ya bilele na nge sambu na kifu na nge ya nene
Mpi bo me monisa bisingini na nge mpasi.
23 Keti muntu ya Kushi* lenda soba mpusu ya nitu na yandi, to keti nkoyi lenda soba matono na yandi?+
Kana mpidina, beno lenda sala mambu ya mbote,
Beno bantu yina bo me longaka na kusala mambu ya mbi.
24 Yo yina mono ta panza bo bonso nianga yina mupepe ya ntoto ya zelo na zelo+ ke pumbusa.
25 Yai dikabu na nge, kitini yina mono me tesilaka nge,” Yehowa muntu me tuba,
“Sambu nge me vilaka mono+ mpi nge ke tula ntima na mambu ya luvunu.+
26 Yo yina mono ta tombula bansongi ya bilele na nge tii na luse na nge,
Ebuna bo ta mona nsoni na nge,+
27 Bizumba na nge+ mpi nzala na nge ya ngolo ya kuvukisa nitu,
Kindumba na nge ya nsoni.
Na zulu ya bangumba ya fioti, na bilanga,
Mono me monaka bikalulu na nge ya nzanzi.+
Mawa na nge, O Yeruzalemi!
Tii nki ntangu nge ta vanda kaka mvindu?”+