Na Bakolosai

1 Polo, ntumwa ya Kristu Yezu na luzolo ya Nzambi, mpi mpangi na beto Timoteo,+ 2 na basantu mpi bampangi ya kwikama yina kele na bumosi ti Kristu, bayina kele na Kolosai:

Ntima ya mbote ya nene mpi ngemba ya Nzambi Tata na beto kuvanda ti beno.

3 Beto ke pesaka ntangu yonso matondo na Nzambi, Tata ya Mfumu na beto Yezu Kristu, ntangu beto ke sambaka sambu na beno, 4 tuka beto waka nsangu ya lukwikilu na beno na Kristu Yezu mpi ya zola yina beno kele na yo sambu na basantu yonso, 5 sambu na kivuvu yina bo ke bumbila beno na zulu.+ Beno waka ntete nsangu ya kivuvu yai na nzila ya nsangu ya kieleka ya nsangu ya mbote 6 yina kwisaka* na beno. Mutindu nsangu ya mbote ke buta mbuma mpi ke yela na nsi-ntoto ya mvimba,+ yo ke sala mpi mutindu mosi na kati na beno, katuka kilumbu yina beno waka mpi zabaka mbote-mbote ntima ya mbote ya nene ya Nzambi mutindu yo kele kibeni. 7 Yo yina mambu ya beno longukaka na Epafrasi+ nduku na beto ya mpika yina beto ke zolaka mingi; yandi kele nsadi ya kwikama ya Kristu na kisika na beto. 8 Yandi zabisaka beto mpi zola yina beno yedisaka na lusadisu ya mpeve ya Nzambi.

9 Yo yina mpi, tuka kilumbu yina beto waka yo, beto me yambulaka ve na kusamba sambu na beno+ mpi na kulomba nde beno fuluka ti nzayilu ya sikisiki+ ya luzolo na yandi, na mayele yonso mpi na mayele ya kubakisa yina mpeve ya Nzambi ke pesaka,+ 10 sambu beno tambula na mutindu yina me fwana na Yehowa,* sambu na kupesa yandi kiese kibeni ntangu beno ke landa kubuta mbuma na konso kisalu ya mbote, mpi ke yela na nzayilu ya sikisiki ya Nzambi;+ 11 beno baka kikesa ti ngolo yonso na kutadila ngolo na yandi ya nkembo+ sambu beno kanga kibeni ntima ti ntima ya nda mpi kiese, 12 na ntangu beno ke pesa matondo na Tata yina salaka nde beno fwana sambu na kubaka dikabu kumosi ti basantu+ yina kele na nsemo.

13 Yandi me katulaka beto na kiyeka ya mpimpa+ mpi yandi me kotisaka beto na kimfumu ya Mwana yina yandi ke zolaka, 14 na nzila na yandi beto me katukaka na kimpika na nsadisa ya nkudulu, disongidila, ndolula ya masumu na beto.+ 15 Yandi kele kifwani ya Nzambi yina ke monanaka ve,+ mwana ya ntete ya lugangu yonso;+ 16 sambu na nzila na yandi, bo gangaka bima yonso ya nkaka na zulu mpi na ntoto, bima yina ke monanaka mpi bima yina ke monanaka ve,+ yo vanda bakiti ya kimfumu to bimfumu to baluyalu to biyeka. Bo gangaka bima yonso ya nkaka na nzila na yandi+ mpi sambu na yandi. 17 Diaka, yandi vandaka na ntwala ya bima yonso ya nkaka,+ mpi bo gangaka bima yonso ya nkaka na nzila na yandi, 18 mpi yandi kele ntu ya nitu, disongidila dibundu.+ Yandi kele luyantiku, mwana ya ntete yina bo tedimisaka na lufwa,+ sambu yandi kuma muntu ya ntete na bima yonso; 19 sambu Nzambi monaka kiese na kubika nde yandi vanda ya kukuka na bima yonso.+ 20 Mpi na nzila ya Kristu, Nzambi ke wakanisa bima yonso ya nkaka+ ti yandi mosi; yandi ke tula ngemba na nsadisa ya menga+ yina Kristu tiamunaka na zulu ya nti ya mpasi,* yo vanda bima yina kele na ntoto to bima yina kele na zulu.

21 Ya kieleka, beno bantu yina vandaka ntete ntama ti Nzambi mpi bambeni na yandi sambu mabanza na beno vandaka kaka na mambu ya mbi, 22 ntangu yai yandi me wakanisa beno ti yandi mosi na nzila ya lufwa ya muntu yina tambikaka nitu na yandi ya kinsuni, sambu yandi monisa beno na ntwala na yandi bonso bantu ya santu, ya kukonda mvindu, mpi yina bo lenda funda ve ata na diambu mosi+— 23 ya kieleka, yo ta vanda mutindu yina kaka kana beno bikala na lukwikilu,+ beno kangama ngolo na fondasio,+ beno vanda kikesa,+ mpi beno nikana ve na kivuvu ya nsangu ya mbote yina beno waka mpi yina bo longaka na lugangu ya mvimba yina kele na nsi ya zulu.+ Mono Polo, mono me kumaka nsadi ya nsangu yai ya mbote.+

24 Ntangu yai mono kele na kiese sambu na bampasi ya mono ke mona sambu na beno,+ mpi mono ke kutana ti bampasi ya Kristu yina ke konda na nsuni na mono sambu na mambote ya nitu na yandi,+ disongidila dibundu.+ 25 Mono kumaka nsadi ya dibundu yai na kuwakana ti kisalu ya kikapita+ yina Nzambi pesaka mono sambu na mambote na beno, sambu na kusamuna ndinga ya Nzambi mbote-mbote, 26 kinsweki ya santu+ yina vandaka ya kubumbana na bangidika ya bima ya ntama*+ mpi na bandonga ya bantu ya ntama. Kansi ntangu yai, Nzambi me monisaka yo na basantu na yandi;+ 27 Nzambi monaka mbote na kuzabisa bo kimvwama ya nkembo ya kinsweki yai ya santu+ na kati ya makanda, yina kele Kristu na bumosi ti beno, kivuvu ya nkembo na yandi.+ 28 Yandi kele muntu yina beto ke samuna, ntangu beto ke kebisa konso muntu mpi ke longa konso muntu na mayele yonso, sambu beto monisa konso muntu nde yandi me lunga na mambu yonso na bumosi ti Kristu.+ 29 Yo yina, mono ke sala ngolo mpi mono ke sala ti kikesa na lusadisu ya ngolo na yandi yina ke salaka na kati na mono.+