Samuele ya Ntete

25 Na nima Samuele+ fwaka; mpi Izraele ya mvimba vukanaka sambu na kudila yandi mpi kuzika yandi pene-pene ya nzo na yandi na Rama.+ Ebuna Davidi telamaka mpi kwendaka na ntoto-makanga ya Parani.

2 Kuvandaka ti muntu mosi na Maoni+ yina vandaka kusala na Karmele.*+ Muntu yina vandaka ti kimvwama mingi; yandi vandaka ti mameme 3 000 mpi bankombo 1 000, mpi na ntangu yina yandi vandaka kuzenga mameme na yandi mika na Karmele. 3 Zina na yandi Nabale,+ mpi zina ya nkento na yandi Abigaile.+ Nkento yina vandaka ti luswasukusu mpi yandi vandaka kitoko, kansi bakala na yandi, muntu ya dikanda ya Kalebi,+ vandaka muntu ya nku, mpi yandi vandaka kusala mambu na mutindu ya mbi.+ 4 Davidi waka kuna na ntoto-makanga nde Nabale ke zenga mameme na yandi mika. 5 Yo yina, Davidi tindilaka yandi baleke ya babakala kumi, mpi yandi songaka bo nde: “Beno kwenda na Karmele, ebuna ntangu beno ta kuma kisika Nabale kele, beno yula yandi na zina na mono kana yandi kele mbote. 6 Na nima beno tuba nde, ‘Bika nge zinga mingi mpi ngemba kuvanda na nge, na bantu ya nzo na nge, mpi na bima na nge yonso. 7 Mono me wa nde nge ke zenga mameme na nge mika. Ntangu bangungudi na nge vandaka ti beto, beto salaka bo mbi ve,+ mpi bo vidisaka ve ata kima mosi ntangu yonso yina bo vandaka na Karmele. 8 Yula bantu na nge, mpi bo ta songa nge. Ndima bantu na mono, sambu beto me kwisa na ntangu ya kiese.* Pardo, pesa bansadi na nge mpi mwana na nge Davidi konso kima yina nge lenda pesa bo.’”+

9 Ebuna bantu ya Davidi kwendaka mpi songaka Nabale mambu yai yonso na zina ya Davidi. Ntangu bo manisaka, 10 Nabale vutudilaka bansadi ya Davidi nde: “Davidi kele nani, mpi mwana ya Yese kele nani? Bilumbu yai bansadi mingi ke tina bamfumu na bo.+ 11 Keti mono fwete baka mampa na mono, masa na mono, mpi misuni ya mbisi na mono yina mono fwilaka bantu ya ke zengaka mameme na mono mika mpi kupesa yo na bantu yina me katuka kana na wapi?”

12 Ebuna bantu ya Davidi vutukaka mpi songaka yandi mambu yai yonso. 13 Na mbala mosi Davidi tubilaka bantu na yandi nde: “Konso muntu kulwata mbele na yandi ya bitumba!”+ Bo yonso lwataka bambele na bo ya bitumba, Davidi mpi kangaka mbele na yandi ya bitumba, ebuna bantu kiteso ya 400 kwendaka ti Davidi, kansi bantu 200 bikalaka ti bima.

14 Na ntangu yina, nsadi mosi songaka Abigaile, nkento ya Nabale, nde: “Tala! Davidi tindaka binati-nsangu katuka na ntoto-makanga sambu na kuzodila mfumu na beto ngemba, kansi yandi fingaka bo na ndinga ya ngolo.+ 15 Bantu yina sadilaka beto mambu ya mbote kibeni. Bo salaka beto ve mbi ata fioti, mpi beto vidisaka ve ata kima mosi ntangu yonso yina beto vandaka ti bo na nseke.+ 16 Bo vandaka bonso kibaka ya lutaninu na nziunga na beto, na mpimpa mpi na mwini, na ntangu yonso yina beto vandaka ti bo na kugungula mameme. 17 Ntangu yai, sola diambu yina nge fwete sala, sambu bo me baka lukanu ya kusala mfumu na beto mpi nzo na yandi ya mvimba mbi,+ mpi yandi kele muntu ya kukonda mfunu*+ kibeni yo yina ata muntu mosi ve lenda solula ti yandi.”

18 Abigaile+ bakaka nswalu mampa 200, mabungu zole ya nene ya vinu, mameme tanu ya bo me yidika sambu na kulamba, baseya tanu* ya bambuma ya kukalanga, bagato 100 ya bambuma ya vinu, mpi bagato 200 ya bafige yina bo me kamuna mpi yandi tulaka yonso na zulu ya bampunda.+ 19 Ebuna yandi tubilaka bansadi na yandi nde: “Beno kwenda na ntwala na mono; mono ta landa beno.” Kansi yandi songaka ve bakala na yandi Nabale ata kima mosi.

20 Ntangu yandi vandaka kutambula na mpunda mpi vandaka kukulumuka na kinsweki na lweka ya ngumba, kaka na ntangu yina Davidi ti bantu na yandi vandaka kukwisa kukulumuka na ndambu na yandi, ebuna yandi kutanaka ti bo. 21 Davidi vandaka kutuba nde: “Mono taninaka kukonda lufutu bima ya mpangi yai na ntoto-makanga. Ata kima na yandi mosi ve vilaka,+ kansi yandi ke vutudila mono mbi sambu na mambote.+ 22 Bika Nzambi kusala mambu ya mutindu mosi mpi mingi kuluta na bambeni ya Davidi* kana na kati ya bantu na yandi mono bikisa ata bakala* mosi na luzingu tii na suka.”

23 Ntangu Abigaile monaka Davidi, yandi kulumukaka nswalu na mpunda mpi bwaka luse na ntoto na ntwala ya Davidi, yandi fukamaka na ntoto. 24 Na nima yandi bwaka na makulu ya Davidi mpi tubaka nde: “Mfumu na mono, bika kifu kuvanda na mono; bika nsadi na nge kutubila nge, mpi wa mambu yina nsadi na nge ke tuba. 25 Pardo, bika nde mfumu na mono kulanda ve Nabale yai ya kukonda mfunu,+ sambu yandi kele kaka bonso zina na yandi. Zina na yandi Nabale,* mpi yandi kele muntu ya kilawu. Kansi mono nsadi na nge, mono monaka ve bantu ya mfumu na mono yina nge tindaka. 26 Ntangu yai, mfumu na mono, ya kieleka mutindu Yehowa kele na luzingu mpi mutindu nge* kele na luzingu, Yehowa muntu me kanga nge nzila+ sambu nge kuma ve na mfuka ya menga+ mpi nge vutula ve mbi* ti maboko na nge mosi. Bika nde bambeni na nge mpi bantu yina ke sosa kusala mfumu na mono mbi kukuma bonso Nabale. 27 Ebuna ntangu yai, bika bo pesa baleke-babakala yina ke landa mfumu na mono dikabu*+ yai ya nsadi na nge me natila mfumu na mono.+ 28 Pardo, lolula mbi ya nsadi na nge, sambu ntembe kele ve nde Yehowa ta sadila mfumu na mono nzo ya ke zingaka mingi,+ sambu mfumu na mono ke nwana bitumba ya Yehowa,+ mpi bo me mona ve ata diambu mosi ya mbi na nge na bilumbu na nge yonso.+ 29 Kana muntu kutelama sambu na kulanda nge mpi kusosa luzingu* na nge, Yehowa Nzambi na nge ta kanga luzingu* ya mfumu na mono mbote-mbote na saki ya luzingu, kansi yandi ta losa luzingu* ya bambeni na nge mutindu bo ke losaka matadi na lanse.* 30 Ebuna ntangu Yehowa ta sadila mfumu na mono mambu yonso ya mbote yina yandi me silaka mpi yandi ta tula nge ntwadisi ya Izraele,+ 31 nge ta vanda ve ti mawa to ntantu* na ntima na nge sambu nge tiamunaka menga kukonda kikuma mpi sambu nge bikaka nde diboko ya mfumu na mono kuvutula mbi.*+ Ntangu Yehowa ta sadila mfumu na mono mambu ya mbote, yibuka nsadi na nge.”

32 Ebuna Davidi tubilaka Abigaile nde: “Lukumu na Yehowa Nzambi ya Izraele, yina me tinda nge bubu sambu na kukutana ti mono! 33 Bika Nzambi kusakumuna mabanza na nge ya mbote! Bika Nzambi kusakumuna nge sambu nge me kanga mono nzila bubu yai sambu mono kuma ve na mfuka ya menga+ mpi mono vutula ve mbi* ti maboko na mono mosi. 34 Kana ve, ya kieleka mutindu Yehowa Nzambi ya Izraele yina kangaka mono nzila sambu mono sala nge mbi+ ve kele na luzingu, kana nge kwisaka ve nswalu sambu na kukutana ti mono,+ na suka ata bakala* mosi ve na kati ya bantu ya Nabale+ zolaka kubikala.” 35 Ebuna Davidi ndimaka bima yina Abigaile natilaka yandi mpi Davidi tubilaka yandi nde: “Vutuka na ngemba na nzo na nge. Tala, mono me wa nge, mpi mono ta sala mambu ya nge me lomba.”

36 Na nima Abigaile vutukaka na Nabale, yina vandaka kusala nkinsi na nzo na yandi bonso ntotila, ebuna Nabale* vandaka na kiese mpi yandi lawukaka kibeni malafu. Abigaile songaka yandi ve ata kima mosi tii na suka. 37 Na suka ntangu kwiti ya Nabale manaka, nkento na yandi songaka yandi mambu yina. Ebuna ntima ya Nabale kumaka bonso ntima ya muntu ya kufwa, mpi yandi kumaka bonso ditadi. 38 Kiteso ya bilumbu kumi na nima, Yehowa bulaka Nabale, mpi yandi fwaka.

39 Ntangu Davidi waka nde Nabale me fwa, yandi tubaka nde: “Lukumu na Yehowa, yina me zenga mambu+ ya kufinga yina Nabale+ fingaka mono mpi yina me kanga nsadi na yandi nzila sambu yandi sala ve diambu ya mbi,+ mpi Yehowa me tula mambu ya Nabale na ntu na yandi mosi!” Na nima, Davidi tindilaka Abigaile ndinga nde yandi kuma nkento na yandi. 40 Ebuna bansadi ya Davidi kumaka na Karmele kisika Abigaile vandaka mpi bo tubilaka yandi nde: “Davidi me tinda beto na kubaka nge sambu nge kuma nkento na yandi.” 41 Yandi telamaka na mbala mosi, fukamaka luse na ntoto, mpi tubaka nde: “Tala mpika na nge kele bonso nsadi sambu na kuyobisa makulu+ ya bansadi ya mfumu na mono.” 42 Ebuna Abigaile+ telamaka ntinu, mataka na mpunda na yandi mpi bansadi na yandi tanu ya bankento vandaka kutambula na nima na yandi; yandi kwendaka nzila mosi ti binati-nsangu ya Davidi ebuna yandi kumaka nkento na yandi.

43 Davidi kwelaka mpi Ahinoami+ muntu ya Yizreele,+ ebuna bo zole kumaka bankento na yandi.+

44 Kansi Saule pesaka mwana na yandi Mikale,+ nkento ya Davidi, na Palti+ mwana ya Layishi, muntu ya Galimi.