Ya Ntete na Bakorinto

10 Bampangi, mono ke zola beno zaba nde, ba-nkaka na beto vandaka bo yonso na nsi ya dituti,+ bo yonso sabukaka nzadi-mungwa,+ 2 bo yonso bakaka mbotika na Moize na nzila ya dituti mpi ya nzadi-mungwa, 3 bo yonso diaka madia ya kimpeve ya mutindu mosi,+ 4 mpi bo yonso nwaka masa ya kimpeve ya mutindu mosi.+ Sambu bo vandaka kunwa masa yina vandaka kukatuka na ditadi ya kimpeve yina vandaka kulanda bo, mpi ditadi yina vandaka* Kristu.+ 5 Kansi, Nzambi ndimaka ve bantu mingi na kati na bo, yo yina bo fwaka na ntoto ya zelo na zelo.+

6 Ebuna mambu yai kumaka bambandu sambu na beto, sambu beto vanda ve na nzala ya bima ya mbi, mutindu bo vandaka na nzala na yo.+ 7 Beno kuma mpi ve bantu ya ke sambilaka biteki, mutindu bantu ya nkaka na kati na bo salaka; mutindu bo me sonikaka nde: “Bantu vandaka sambu na kudia mpi kunwa. Ebuna bo telamaka sambu na kuyangalala.”+ 8 Beto sala mpi ve pite,* mutindu bantu ya nkaka na kati na bo salaka pite,* ebuna bantu 23 000 na kati na bo fwaka na kilumbu mosi.+ 9 Beto meka+ mpi ve Yehowa,* mutindu bantu ya nkaka na kati na bo mekaka yandi, mpi banioka tatikaka bo ebuna bo fwaka.+ 10 Beno bokuta mpi ve, mutindu bantu ya nkaka na kati na bo bokutaka,+ ebuna bo fwaka na maboko ya muntu yina ke bebisaka.+ 11 Mambu yai bwilaka bo bonso bambandu, mpi bo sonikaka yo sambu na kukebisa beto,+ bantu yina ke zinga na nsuka ya bangidika ya bima.

12 Yo yina, muntu yina ke yindula nde yandi kele ya kutelama, yandi keba sambu yandi bwa ve.+ 13 Ata mpukumuna mosi ve me kwisilaka beno yina bantu ya nkaka me kutanaka na yo ve.+ Kansi Nzambi kele ya kwikama, mpi yandi ta pesa ve nzila nde beno kutana ti mpukumuna kuluta yina beno lenda kangila ntima,+ kansi ntangu mpukumuna ke kwisa yandi ta yidika mpi nzila sambu beno kuka kukangila yo ntima.+

14 Yo yina, bampangi na mono ya mono ke zolaka mingi, beno tina lusambu ya biteki.+ 15 Mono ke tuba bonso na bantu yina kele ti luswasukusu; beno tala beno mosi kana mambu ya mono ke tuba kele ya kieleka to ve. 16 Dikopa ya lusakumunu yina beto ke sakumunaka, keti yo kele ve kuvukana na menga ya Kristu?+ Dimpa yina beto ke zengaka, keti yo kele ve kuvukana na nitu ya Kristu?+ 17 Sambu dimpa kele kaka mosi, beto, ata beto kele mingi, beto kele kaka nitu mosi,+ sambu beto yonso ke diaka dimpa yina mosi.

18 Beno tala Izraele ya kinsuni: Keti bantu yina ke diaka bimenga ke vukanaka ve ti mesa-kimenga?+ 19 Ebuna mono ke tuba inki? Nde kima yina bo me pesa kimenga na kiteki kele kima ya mfunu, to nde kiteki kele kima ya mfunu? 20 Ve; kansi mono ke tuba nde bima yina makanda ke pesaka bimenga, bo ke pesaka yo bimenga na bademo, kansi na Nzambi ve;+ mpi mono ke zola ve nde beno vukana ti bademo.+ 21 Beno lenda nwa ve dikopa ya Yehowa* mpi dikopa ya bademo; beno lenda dia ve na “mesa ya Yehowa”*+ mpi na mesa ya bademo. 22 To, ‘keti beto ke pusa Yehowa* na kuwa kimpala’?+ Keti beto me luta yandi na ngolo?

23 Bo me pesaka nzila na mambu yonso, kansi mambu yonso ve ke nataka mambote. Bo me pesaka nzila na mambu yonso, kansi mambu yonso ve ke tungaka.+ 24 Konso muntu kulanda na kusosa, mambote na yandi mosi ve, kansi ya muntu ya nkaka.+

25 Beno landa kudia konso mbisi yina bo ke teka na zandu ya bambisi; beno yula ve bangiufula sambu na kansansa na beno, 26 sambu “ntoto mpi bima yonso yina kele na kati na yo kele ya Yehowa.”*+ 27 Kana muntu mosi ya ke kwikilaka ve kubingisa beno mpi beno me ndima kukwenda, beno dia konso kima yina bo me pesa beno, beno yula ve bangiufula sambu na kansansa na beno. 28 Kansi kana muntu mosi kutubila beno nde, “Bo pesaka mbisi yai na biteki,” beno dia ve sambu na muntu yina me songa beno diambu yina mpi sambu na kansansa.+ 29 Mono ke zola kutubila ve kansansa na nge, kansi kansansa ya muntu ya nkaka. Sambu na nki kansansa ya muntu ya nkaka fwete sambisa kimpwanza na mono?+ 30 Kana mono ke dia mpi ke pesa Nzambi matondo, sambu na nki bo fwete vweza mono sambu na mambu yina mono me pesila Nzambi matondo?+

31 Yo yina, yo vanda beno ke dia, yo vanda beno ke nwa, to yo vanda beno ke sala konso kima ya nkaka, beno sala mambu yonso sambu na nkembo ya Nzambi.+ 32 Beno kuma ve bikuma ya ke sala nde Bayuda mpi Bagreki mpi dibundu ya Nzambi kubula sakuba,+ 33 mutindu mono ke mekaka kupesa bantu yonso kiese na mambu yonso, mpi mono ke sosaka ve mambote na mono mosi+ kansi ya bantu mingi, sambu bo guluka.+