Ezekiele

48 “Yai kele bazina ya makanda, katuka na ndambu ya nordi na nsuka: Kitini ya ntoto ya Dani+ ke yantika na nzila ya Etloni tii na Lebo-amati*+ na Azare-enani, na ndilu ya Damasi na ndambu ya nordi, pene-pene ya Amati;+ mpi yo ke katuka na ndilu ya esti tii na ndilu ya westi. 2 Kitini ya ntoto ya Asere+ kele na ndilu ya Dani, katuka na ndilu ya esti tii na ndilu ya westi. 3 Kitini ya ntoto ya Naftali+ kele na ndilu ya Asere, katuka na ndilu ya esti tii na ndilu ya westi. 4 Kitini ya ntoto ya Manase+ kele na ndilu ya Naftali, katuka na ndilu ya esti tii na ndilu ya westi. 5 Kitini ya ntoto ya Efrayimi kele na ndilu ya Manase,+ katuka na ndilu ya esti tii na ndilu ya westi. 6 Kitini ya ntoto ya Rubeni kele na ndilu ya Efrayimi,+ katuka na ndilu ya esti tii na ndilu ya westi. 7 Kitini ya ntoto ya Yuda kele na ndilu ya Rubeni,+ katuka na ndilu ya esti tii na ndilu ya westi. 8 Na ndilu ya Yuda, katuka na ndilu ya esti tii na ndilu ya westi, dikabu yina beno ta tula na kingenga fwete vanda nene maboko* 25 000+ mpi yo fwete vanda kiteso mosi ti nda ya bitini ya ntoto ya makanda ya nkaka katuka na ndilu ya esti tii na ndilu ya westi. Kisika ya santu ta vanda na kati-kati na yo.

9 “Dikabu yina beno ta tula na kingenga sambu na Yehowa ta vanda nda maboko 25 000 mpi nene maboko 10 000. 10 Yo ta vanda dikabu ya santu sambu na banganga-nzambi.+ Yo ta vanda maboko 25 000 na ndambu ya nordi, 10 000 na ndambu ya westi, 10 000 na ndambu ya esti, mpi 25 000 na ndambu ya sudi. Kisika ya santu ya Yehowa ta vanda na kati-kati na yo. 11 Yo ta vanda sambu na banganga-nzambi ya bo me santisaka yina kele na kati ya bana ya Zadoki,+ bayina lungisaka mikumba na bo sambu na mono mpi vilaka ve nzila ntangu bantu ya Izraele mpi Balevi vilaka nzila.+ 12 Na kati ya dikabu ya ntoto, bo ta baka kitini mosi ya ntoto yina bo me tulaka na kingenga bonso kima ya kuluta santu, na ndilu ya Balevi.

13 “Kaka pene-pene ya teritware ya banganga-nzambi, Balevi ta baka kitini mosi ya ntoto, nda na yo maboko 25 000 mpi nene na yo maboko 10 000. (Nda yonso ta vanda 25 000 mpi nene 10 000.) 14 Bo fwete teka ve ata kitini mosi yai ya ntoto ya kuluta kitoko, to kupesa yo sambu na kubaka kima ya nkaka, to kupesa yo na bantu ya nkaka, sambu yo kele kima mosi ya santu sambu na Yehowa.

15 “Kisika yina ta bikala, yina nene na yo kele maboko 5 000 na lweka ya ndilu ya maboko 25 000, ta vanda sambu na bantu yonso ya mbanza,+ sambu na banzo mpi sambu na nseke ya kudisa bitwisi. Mbanza ta vanda na kati-kati na yo.+ 16 Yai kele nene mpi nda ya mbanza: Ndilu ya nordi kele maboko 4 500, ndilu ya sudi kele 4 500, ndilu ya esti kele 4 500, mpi ndilu ya westi kele 4 500. 17 Nseke ya mbanza sambu na kudisa bitwisi ta vanda maboko 250 na nordi, 250 na sudi, 250 na esti mpi 250 na westi.

18 “Nda ya kitini ya ntoto yina ta bikala ta vanda kiteso mosi ti dikabu ya santu,+ maboko 10 000 na esti mpi 10 000 na westi. Yo ta vanda kiteso mosi ti dikabu ya santu, mpi bima yina yo ta buta ta pesa madia na bantu yina ke sadilaka mbanza. 19 Bantu yina ke sadilaka mbanza, bayina me katukaka na makanda yonso ya Izraele, ta sala bilanga na kati na yo.+

20 “Bandambu yonso ya dikabu ya mvimba kele maboko 25 000. Beno fwete tula yo na lweka bonso dikabu ya santu kumosi ti kitini ya ntoto ya mbanza.

21 “Ntoto yina ta bikala na bandambu yonso zole ya dikabu ya santu mpi ya kitini ya ntoto ya mbanza ta vanda ya mfumu.+ Yo ta vanda na lweka ya bandilu ya maboko 25 000 yina kele na esti mpi na westi ya dikabu. Yo ta vanda kiteso mosi ti bitini ya ntoto yina me kangama yo na yo, mpi yo ta vanda sambu na mfumu. Dikabu ya santu mpi kisika ya santu ya tempelo ta vanda na kati-kati na yo.

22 “Kitini ya ntoto ya Balevi mpi kitini ya ntoto ya mbanza ta vanda na kati-kati ya kitini ya ntoto ya mfumu. Teritware ya mfumu ta vanda na kati-kati ya ndilu ya Yuda+ ti ya ndilu ya Benyamini.

23 “Sambu na makanda yina me bikala, kitini ya ntoto ya Benyamini ke yantika na ndilu ya esti tii na ndilu ya westi.+ 24 Kitini ya ntoto ya Simeoni kele pene-pene ya ndilu ya Benyamini,+ katuka na ndilu ya esti tii na ndilu ya westi. 25 Kitini ya ntoto+ ya Isakare kele pene-pene ya ndilu ya Simeoni, katuka na ndilu ya esti tii na ndilu ya westi. 26 Kitini ya ntoto ya Zebuloni kele pene-pene ya ndilu ya Isakare,+ katuka na ndilu ya esti tii na ndilu ya westi.+ 27 Kitini ya ntoto ya Gadi kele pene-pene ya ndilu ya Zebuloni,+ katuka na ndilu ya esti tii na ndilu ya westi. 28 Ndilu ya sudi pene-pene ya ndilu ya Gadi ta yantika na Tamare+ tii na bamasa ya Meribati-kadeshi,+ na Muwanda*+ mpi tii na Nzadi-Mungwa ya Nene.*

29 “Yina kele insi yina beno fwete kabisila makanda ya Izraele bonso dikabu,+ mpi yo ta vanda bitini ya ntoto na bo,”+ Yehowa Mfumu ya Kuluta Nene muntu me tuba.

30 “Yai ta vanda bisika ya kubasikila ya mbanza: Ndambu ya nordi ta vanda maboko 4 500.+

31 Bo ta pesa bakielo ya mbanza bazina ya makanda ya Izraele. Na bakielo tatu yina kele na ndambu ya nordi, yo kele ti kielo mosi sambu na Rubeni, kielo mosi sambu na Yuda, mpi kielo mosi sambu na Levi.

32 Ndambu ya esti ta vanda nda maboko 4 500, mpi bakielo kele tatu: kielo mosi sambu na Yozefi, kielo mosi sambu na Benyamini, mpi kielo mosi sambu na Dani.

33 Ndambu ya sudi ta vanda maboko 4 500, ti bakielo tatu: kielo mosi sambu na Simeoni, kielo mosi sambu na Isakare, mpi kielo mosi sambu na Zebuloni.

34 Ndambu ya westi ta vanda nda maboko 4 500, ti bakielo tatu: kielo mosi sambu na Gadi, kielo mosi sambu na Asere, mpi kielo mosi sambu na Naftali.

35 “Ndilu na yo yonso ta vanda maboko 18 000. Mpi yantika kilumbu yina zina ya mbanza ta vanda Yehowa Kele Kuna.”+