Nkunga

Ya Davidi. Nkunga.

101 Mono ta yimba sambu na zola ya kwikama mpi lunungu.

O Yehowa, mono ta yimba bankunga* sambu na kukumisa nge.

2 Mono ta sala mambu ti ngangu mpi kukonda kifu.*

Inki ntangu nge ta kwisila mono?

Mono ta tambula ti ntima ya kwikama+ na kati ya nzo na mono.

3 Mono ta tula ve ata kima mosi ya kukonda mfunu* na ntwala ya meso na mono.

Mono ke mengaka bisalu ya bantu yina ke yambulaka mambu ya mbote;+

Mono ta vanda ve ti kima ya kusala ti bo.*

4 Ntima ya mbi kele ntama ti mono;

Mono ta ndima* ve mambu ya mbi.

5 Konso muntu yina ke kusilaka nkweno na yandi makambu na kinsweki,+

Mono ta kanga yandi munoko.*

Konso muntu yina kele ti meso ya lulendo mpi ntima ya kudisonga,

Mono ta ndima yandi ve.

6 Mono ta tala bantu ya kwikama ya ntoto,

Sambu bo zinga ti mono.

Muntu yina ke tambulaka kukonda kifu* ta sadila mono.

7 Muntu mosi ve ya ke kusaka ta zinga na nzo na mono,

Mpi muntu mosi ve ya luvunu ta telama na ntwala na mono.*

8 Konso suka, mono ta kanga munoko ya* bantu yonso ya mbi ya ntoto,

Sambu na kukatula bantu yonso ya ke salaka mambu ya mbi na mbanza ya Yehowa.+