Ezekiele

43 Na nima yandi nataka mono na kielo yina ke tala na ndambu ya esti.+ 2 Kuna mono monaka nkembo ya Nzambi ya Izraele me katuka na ndambu ya esti ke kwisa,+ mpi ndinga na yandi vandaka kuwakana bonso makelele ya masa ya ke kulumuka ngolo;+ ebuna nkembo na yandi pesaka nsemo na ntoto.+ 3 Mambu yina mono monaka vandaka bonso mbona-meso yina mono monaka ntangu mono* kwisaka kubebisa mbanza, mpi yo vandaka kumonika bonso mambu yina mono monaka pene-pene ya nzadi Kebare;+ mpi mono fukamaka luse na ntoto.

4 Ebuna nkembo ya Yehowa kotaka na tempelo* na nzila ya kielo yina ke tala na ndambu ya esti.+ 5 Na nima mpeve mosi tombulaka mono mpi nataka mono na kibansala ya kati, mpi mono monaka nde tempelo me fuluka ti nkembo ya Yehowa.+ 6 Ebuna mono waka muntu mosi ke tuba na mono tuka na tempelo, ebuna muntu yina kwisaka mpi telamaka pene-pene na mono.+ 7 Yandi tubilaka mono nde:

“Mwana ya muntu, yai kele kisika ya kiti na mono ya kimfumu+ mpi kisika ya bitambi ya makulu na mono,+ kisika yina mono ta zinga kimakulu na kati ya bantu ya Izraele.+ Nzo ya Izraele ta kumisa diaka ve zina na mono ya santu mvindu,+ bo ti bantotila na bo, na nzila ya kindumba na bo ya kimpeve mpi ya bamvumbi ya bantotila na bo ntangu bo ta fwa. 8 Na ntangu bo tulaka munoko ya nzo na bo pene-pene ya munoko ya nzo na mono mpi dikunzi ya kielo na bo pene-pene ya dikunzi ya kielo na mono, mpi kibaka mosi mpamba vandaka kukabula mono ti bo,+ bo kumisaka zina na mono ya santu mvindu na mambu ya nzanzi yina bo salaka, yo yina mono manisaka bo na makasi na mono.+ 9 Ntangu yai, bika bo katula kindumba na bo ya kimpeve mpi bamvumbi ya bantotila na bo ntama ti mono, mpi mono ta zinga kimakulu na kati na bo.+

10 “Kansi nge, mwana ya muntu, tendudila nzo ya Izraele+ mutindu tempelo ta vanda, mpidina bo ta wa nsoni sambu na bifu na bo,+ mpi bo fwete longuka pula* na yo. 11 Kana bo wa nsoni sambu na mambu yonso yina bo me sala, nge fwete zabisa bo pula ya tempelo, mutindu bo ta yidika yo, bisika na yo ya kubasikila, mpi bakielo na yo.+ Songa bo bapula na yo yonso ti bansiku na yo ya kusonika, bapula na yo ti bansiku na yo, mpi sonika yo na meso na bo, na mpila nde bo landa pula na yo yonso mpi bo zitisa bansiku na yo ya kusonika.+ 12 Yai kele nsiku ya tempelo. Teritware ya mvimba na nziunga ya nsongi ya ngumba kele ya kuluta santu.+ Tala! Yai kele nsiku ya tempelo.

13 “Yai kele nda mpi nene ya mesa-kimenga na kutadila kitesilu ya maboko+ (na konso diboko, bo yikaka nene ya kipala-pala ya diboko mosi).* Nsi na yo kele diboko mosi mpi nene na yo diboko mosi. Mesa-kimenga yina kele ti ndilu mosi ya me ziunga ndilu yina, nene na yo kele ampan* mosi. Yai kele nsi ya mesa-kimenga. 14 Katuka na nsi tii na dibaya ya nziunga yina me landa ya me basika na lweka, yo kele maboko zole, mpi nene na yo kele diboko mosi. Katuka na dibaya ya fioti ya nziunga yina me landa ya me basika na lweka tii na dibaya ya nene ya nziunga yina me landa ya me basika na lweka, yo kele maboko iya, mpi nene na yo kele diboko mosi. 15 Kisika yina tiya ya mesa-kimenga ke pelaka, nda na yo katuka na ntoto tii na zulu kele maboko iya, mpi bibongo iya+ me basika katuka kisika tiya ya mesa-kimenga ke pelaka. 16 Bandambu yonso ya kisika tiya ya mesa-kimenga ke pelaka kele kiteso mosi, nda maboko 12 mpi nene maboko 12.+ 17 Bandambu yonso iya ya dibaya ya nziunga yina me basika na lweka kele nda maboko 14 mpi nene maboko 14; mpi ndilu ya nziunga kele kati-kati ya diboko, mpi nsi na yo kele diboko mosi na bandambu yonso.

“Mpi bima na yo ya kumatila ke tala na ndambu ya esti.”

18 Ebuna yandi tubilaka mono nde, “Mwana ya muntu, Yehowa Mfumu ya Kuluta Nene me tuba nde: ‘Yai kele bansiku ya kulanda ntangu bo ta tunga mesa-kimenga, sambu na kupesa makabu ya mvimba ya kuyoka mpi kumwanga menga na zulu na yo.’+

19 “‘Nge fwete pesa mwana-ngombe ya bakala ya kimvuka ya bangombe bonso dikabu sambu na disumu+ na banganga-nzambi yina kele Balevi na kati ya bana ya Zadoki,+ bayina ke pusanaka pene-pene na mono sambu na kusadila mono,’ Yehowa Mfumu ya Kuluta Nene muntu me tuba. 20 ‘Nge fwete baka ndambu ya menga na yo mpi kutula yo na bibongo yonso iya ya mesa-kimenga, na binkonko yonso iya ya dibaya ya nziunga ya me basika na lweka, mpi na ndilu yina kele na bandambu yonso, sambu na kukatula yo masumu yo kuma bunkete mpi kufika masumu sambu na yo.+ 21 Na nima, baka mwana-ngombe yina ya bakala, dikabu sambu na disumu, sambu na kuyoka yo na kisika ya bo me ponaka na tempelo, na nganda ya kisika ya santu.+ 22 Na kilumbu ya zole, nge ta pesa nkombo ya bakala ya kukonda kifu bonso dikabu sambu na disumu; ebuna bo ta kumisa mesa-kimenga bunkete* mutindu bo kumisaka yo bunkete ti mwana-ngombe ya bakala.’

23 “‘Ntangu nge ta manisa kukatula yo masumu sambu na kukumisa yo bunkete, nge ta pesa mwana-ngombe ya bakala ya kukonda kifu ya kimvuka ya bangombe mpi dimeme ya bakala ya kukonda kifu ya kimvuka ya mameme. 24 Nge fwete pesa yo na Yehowa, mpi banganga-nzambi fwete tiamuna mungwa na zulu na yo+ mpi kupesa yo bonso dikabu ya mvimba ya kuyoka na Yehowa. 25 Bilumbu nsambwadi nge ta pesa nkombo ya bakala bonso dikabu ya disumu ya konso kilumbu,+ mpi mwana-ngombe ya bakala ya kimvuka ya bangombe ti dimeme ya bakala ya kimvuka ya mameme; nge ta pesa bambisi ya kukonda mvindu.* 26 Bilumbu nsambwadi bo fwete fika masumu sambu na mesa-kimenga, mpi bo fwete kumisa yo bunkete mpi kutula yo sambu na kisalu. 27 Ntangu bilumbu yina ta kuma na nsuka, na kilumbu ya nana+ mpi na nima, banganga-nzambi ta pesa na zulu ya mesa-kimenga makabu na nge* ya mvimba ya kuyoka mpi bimenga ya kinduku; ebuna mono ta zola nge,’+ Yehowa Mfumu ya Kuluta Nene muntu me tuba.”