Kulonga

29 Yai mambu ya kuwakana yina Yehowa songaka Moize na kusala ti bantu ya Izraele na insi ya Moabi, katula kuwakana yina yandi salaka ti bo na Orebi.+

2 Ebuna Moize bingaka bantu yonso ya Izraele mpi zabisaka bo nde: “Beno monaka mambu yonso yina Yehowa salaka na meso na beno na insi ya Ezipte, na Farao, na bansadi na yandi yonso mpi na insi na yandi ya mvimba,+ 3 balusambisu* ya nene yina meso na nge monaka, bidimbu yina ya nene ti bimangu.+ 4 Kansi tii bubu yai,+ Yehowa me pesaka beno ve ntima sambu na kubakisa, meso sambu na kumona, mpi makutu sambu na kuwa. 5 ‘Ntangu mono vandaka kutwadisa beno na ntoto-makanga+ bamvula 40, bilele na beno bebaka ve na nitu na beno mpi basandale na nge bebaka ve na makulu na nge.+ 6 Beno diaka ve dimpa, mpi beno nwaka ve vinu to konso kima yina ke lawusaka, sambu beno zaba nde mono kele Yehowa Nzambi na beno.’ 7 Nsuka-nsuka beno kwisaka na kisika yai, ebuna Sihoni ntotila ya Eshboni+ mpi Ogi ntotila ya Bashani+ kwisaka sambu na kunwanisa beto, kansi beto bedisaka bo.+ 8 Na nima, beto bakaka insi na bo mpi pesaka yo bonso dikabu na bana ya Rubeni, na bana ya Gadi, mpi na ndambu ya dikanda ya bana ya Manase.+ 9 Yo yina, beno zitisa mambu ya kuwakana yai mpi beno lemfukila yo, mpidina mambu yonso yina beno ke sala ta kwendila mbote.+

10 “Bubu yai beno yonso me telama na ntwala ya Yehowa Nzambi na beno, bamfumu ya makanda na beno, bankuluntu na beno, bakapita na beno, babakala yonso ya Izraele, 11 bana na beno, bankento na beno,+ munzenza+ na nge yina kele na kati ya camp na nge, yantika na muntu yina ke lokutaka bankuni na nge tii na muntu yina ke bakaka masa na nge. 12 Nge kele awa sambu na kukota na kuwakana ya Yehowa Nzambi na nge mpi na ndefi na yandi, yina Yehowa Nzambi na nge ke sala ti nge bubu yai+ 13 sambu yandi tula beno bubu yai na kuvanda bantu na yandi+ mpi yandi vanda Nzambi na nge,+ kaka mutindu yandi silaka nge mpi kaka mutindu yandi diaka ndefi na ba-nkaka na nge Abrahami,+ Izaki,+ mpi Yakobi.+

14 “Ntangu yai, mono ke sala kuwakana yai mpi ndefi yai ti beno mpamba ve, 15 kansi mono ke sala yo mpi ti bantu yina me telama awa ti beto bubu yai na ntwala ya Yehowa Nzambi na beto mpi ti bantu yina kele ve ti beto awa bubu yai. 16 (Sambu beno me zaba mbote mutindu beto vandaka kuzinga na insi ya Ezipte mpi mutindu beto lutaka na kati-kati ya makanda ya mitindu na mitindu na nzietelo na beto.+ 17 Beno vandaka kumona bima na bo ya nzanzi mpi biteki na bo ya nzanzi*+ ya bo me salaka na mabaya, na matadi, na arza, mpi na wolo, yina vandaka na kati na bo.) 18 Beno keba na mpila nde na kati na beno bubu yai kuvanda ve ti bakala, nkento, dibuta, to dikanda mosi, yina ntima na yandi ke yambula Yehowa Nzambi na beto sambu na kukwenda kusadila banzambi ya makanda yina,+ na mpila nde na kati na beno kuvanda ve ti musisa mosi ya ke buta mbuma ya ndikila mpi nti ya bululu.+

19 “Kansi kana muntu mosi kuwa mambu ya ndefi yai, ebuna yandi tula lulendo na ntima na yandi mpi kutuba nde, ‘Mono ta vanda na ngemba, ata mono landa kutambula na banzila ya ntima na mono mosi,’ na mutindu yina yandi ke bebisa bima yonso na nzila na yandi, 20 Yehowa ta zola ve kulolula yandi.+ Kansi, Yehowa ta wila muntu yina makasi ya ngolo, ebuna kusinga yonso ya bo me sonikaka na mukanda yai ta kwisila yandi kibeni,+ mpi Yehowa ta fwanza kibeni zina na yandi na zulu ya ntoto. 21 Ebuna Yehowa ta katula yandi na kati ya makanda yonso ya Izraele sambu na mpasi na kuwakana ti lusilu yonso ya kuwakana yina bo me sonikaka na mukanda yai ya Nsiku.

22 “Ntangu ndonga ya bantu yina ke kwisa ya bana na nge mpi munzenza yina me katuka na insi ya ntama ta mona bampasi ya insi yina, bamaladi yina Yehowa me natila yo— 23 sufre, mungwa, ti tiya, na mpila nde bo ta kuna ve ata kima na insi na yo ya mvimba mpi yo ta basisa ve mbuma, ata matiti ta basika mpi ve, bonso ntangu bo bwisaka Sodome ti Gomore,+ Adma ti Seboyimi,+ yina Yehowa bwisaka na makasi na yandi mpi na nganzi na yandi— 24 bo ti makanda yonso ta tuba nde, ‘Sambu na nki Yehowa salaka mambu yai na insi yai?+ Inki nataka makasi yai ya nene mpi ya ngolo?’ 25 Ebuna bo ta tuba nde, ‘Yo vandaka sambu bo yambulaka kuwakana ya Yehowa,+ Nzambi ya ba-nkaka na bo, yina yandi salaka ti bo ntangu yandi basisaka bo na insi ya Ezipte.+ 26 Kansi bo kwendaka mpi sadilaka banzambi ya nkaka mpi fukiminaka bo, banzambi yina bo zabaka ve mpi yina yandi pesaka bo ve nswa ya kusambila.*+ 27 Ebuna makasi ya ngolo ya Yehowa kwisilaka insi yina, yo natilaka yo lusingu yonso ya bo me sonikaka na mukanda yai.+ 28 Yo yina, na makasi na yandi ya mingi+ mpi na nganzi na yandi, Yehowa tumunaka bo na ntoto na bo mpi nataka bo na insi ya nkaka, kisika bo kele bubu yai.’+

29 “Mambu ya kubumbana kele ya Yehowa Nzambi na beto,+ kansi mambu yina bo me monisaka kele ya beto ti bana na beto kimakulu, na mpila nde beto zitisa mambu yonso ya Nsiku yai.+