Kusonga ya Yoane

19 Na nima, mono waka ndinga yina vandaka bonso ndinga ya kimvuka mosi ya nene ya bantu na zulu. Bo tubaka nde: “Beno kumisa Yah!*+ Luguluku, nkembo, mpi ngolo kele ya Nzambi na beto, 2 sambu yandi ke zengaka mambu na kieleka mpi na lunungu.+ Sambu Nzambi me sambisa nkento ya nene ya ndumba yina bebisaka ntoto na pite* na yandi, mpi Nzambi me vutula mbi sambu na menga ya bampika na yandi yina kele na maboko ya nkento yina.”*+ 3 Na mbala mosi, bo tubaka mbala ya zole nde: “Beno kumisa Yah!*+ Midinga yina ke basika na yandi ke landa kutombuka mvula na mvula.”+

4 Ebuna bankuluntu 24+ ti bigangwa iya ya moyo+ fukamaka mpi sambilaka Nzambi yina me vanda na kiti ya kimfumu, mpi bo tubaka nde: “Amen! Beno kumisa Yah!”*+

5 Diaka, ndinga mosi katukaka na kiti ya kimfumu mpi tubaka nde: “Beno kumisa Nzambi na beto, beno yonso bampika na yandi,+ beno bantu yina ke waka yandi boma, bantu ya kukonda mfunu mpi bantu ya mfunu.”+

6 Ebuna mono waka makelele bonso ndinga ya bantu mingi, bonso makelele ya bamasa mingi, mpi bonso makelele ya banzasi ya ngolo. Bo tubaka nde: “Beno kumisa Yah,*+ sambu Yehowa* Nzambi na beto, Nkwa-Ngolo Yonso,+ me yantika kuyala bonso ntotila!+ 7 Beto yangalala, beto vanda na kiese mingi, mpi beto pesa yandi nkembo, sambu makwela ya Mwana-Dimeme me kuma mpi nkento na yandi me kudibongisa. 8 Ee, bo me pesa yandi nswa ya kulwata bilele ya lino ya ke ngenga, ya bunkete, mpi ya kitoko—sambu lino ya kitoko ke monisa bisalu ya lunungu ya basantu.”+

9 Mpi yandi tubilaka mono nde, “Sonika: Kiese na bantu yina bo me binga na nkinsi ya makwela ya Mwana-Dimeme.”+ Yandi tubilaka mono diaka nde: “Yai mambu ya kieleka ya Nzambi ke tuba.” 10 Ebuna mono bwaka na makulu na yandi sambu na kusambila yandi. Kansi yandi tubilaka mono nde: “Keba! Kusala yo ve!+ Mono kele kaka mpika bonso nge mpi bonso bampangi na nge yina kele ti kisalu ya kuta kimbangi sambu na Yezu.+ Sambila Nzambi!+ Sambu kuta kimbangi sambu na Yezu kele lukanu ya mbikudulu.”+

11 Mono monaka zulu me kanguka, mpi mono monaka mpunda mosi ya mpembe.+ Muntu yina me vanda na zulu na yo, zina na yandi Kwikama+ mpi Kieleka;+ yandi ke sambisaka mpi ke nwanaka bitumba na lunungu.+ 12 Meso na yandi kele tiya ya ke pela,+ mpi yandi kele ti bampu mingi ya kimfumu* na zulu ya ntu na yandi. Yandi kele ti zina ya bo me sonika, yina muntu mosi ve me zaba katula kaka yandi mosi; 13 yandi me lwata lele ya zulu yina kele ti matono ya* menga, mpi zina na yandi Ndinga+ ya Nzambi. 14 Diaka, makesa ya zulu vandaka kulanda yandi na bampunda ya mpembe, mpi bo lwataka bilele ya lino ya mpembe, ya bunkete, mpi ya kitoko. 15 Mbele mosi ya bitumba ya makasi mpi ya nda+ ke basika na munoko na yandi, mpi yandi ta fwa makanda ti mbele yina; yandi ta gungula bo ti nti ya kibende.+ Diaka, yandi ke kamuna bambuma na kikamuninu ya vinu ya nganzi ya makasi ya Nzambi Nkwa-Ngolo Yonso.+ 16 Na lele na yandi ya zulu, ee, na dikulu na yandi, bo me sonikaka zina mosi, Ntotila ya bantotila mpi Mfumu ya bamfumu.+

17 Mono monaka mpi wanzio mosi me telama na kati ya ntangu, mpi yandi tubaka na ndinga ya ngolo mpi songaka bandeke yonso yina ke pumbukaka na kati-kati ya zulu* nde: “Beno kwisa awa, beno vukana sambu na nkinsi ya nene ya Nzambi,+ 18 sambu beno dia misuni ya bantotila, misuni ya bakomanda ya basoda, misuni ya bantu ya ngolo,+ misuni ya bampunda ti ya bantu yina me vanda na zulu na yo,+ mpi misuni ya bantu yonso, ya bantu yina kele na kimpwanza ti ya bampika, mpi ya bantu ya kukonda mfunu ti ya bantu ya mfunu.”

19 Mpi mono monaka mbisi ya mfinda, bantotila ya ntoto, mpi bimvuka na bo ya basoda, bo me vukana sambu na kunwana bitumba ti muntu yina me vanda na zulu ya mpunda mpi basoda na yandi.+ 20 Ebuna bo kangaka mbisi ya mfinda, kumosi ti mbikudi ya luvunu+ yina salaka bidimbu na ntwala na yo; na nzila ya bidimbu yina yandi kusaka bantu yina bakaka kidimbu ya mbisi ya mfinda+ mpi bantu yina ke sambilaka kifwani na yo.+ Bo losaka bo ya moyo na dizanga ya tiya yina ke pelaka ti sufre.+ 21 Kansi bantu yina bikalaka, bo fwaka bo ti mbele ya nda ya bitumba yina basikaka na munoko ya muntu yina me vanda na zulu ya mpunda.+ Mpi bandeke yonso fulukaka misuni na bo.+