Ezekiele

10 Ntangu mono vandaka kutala, mono monaka na zulu ya kisika ya nene yina vandaka na zulu ya ba-ntu ya basherube kima mosi bonso ditadi ya safire ke basika na zulu na bo, mpi yo vandaka kumonika bonso kiti ya kimfumu.+ 2 Ebuna yandi tubilaka muntu yina lwataka lele ya lino nde:+ “Kota na kati-kati ya makulu yina ke baluka,+ na nsi ya basherube, mpi fulusa maboko na nge yonso zole ti makala ya tiya+ yina kele na kati-kati ya basherube mpi losa-losa yo na mbanza.”+ Yo yina yandi kotaka na ntangu mono vandaka kutala.

3 Basherube telamaka na diboko ya kitata ya nzo ntangu muntu yina kotaka, ebuna dituti fulukaka na kibansala ya kati. 4 Nkembo ya Yehowa+ telamaka na zulu ya basherube mpi kwendaka na munoko ya kielo ya nzo, mpi dituti fulukaka malembe-malembe na nzo,+ ebuna kibansala fulukaka ti nsemo ya nkembo ya Yehowa. 5 Makelele ya mapapu ya basherube vandaka kuwakana na kibansala ya nganda, bonso makelele ya Nzambi Nkwa-Ngolo Yonso ntangu yandi ke tubaka.+

6 Na nima yandi songaka muntu yina lwataka lele ya lino nde: “Baka tiya na kati-kati ya makulu yina ke baluka, na kati-kati ya basherube,” ebuna yandi kotaka mpi telamaka pene-pene ya dikulu yina. 7 Ebuna Sherube mosi tandulaka diboko na yandi na ndambu ya tiya yina vandaka na kati-kati ya basherube.+ Yandi bakaka ndambu mpi tulaka yo na maboko yonso zole ya muntu yina lwataka lele ya lino,+ mpi muntu yina bakaka yo mpi basikaka. 8 Basherube vandaka ti kima mosi na nsi ya mapapu na bo+ yina vandaka kumonika bonso maboko ya muntu.

9 Ntangu mono vandaka kutala, mono monaka makulu iya pene-pene ya basherube, dikulu mosi pene-pene ya konso sherube, mpi makulu yina vandaka kusema bonso ditadi ya krisolite.+ 10 Na yina me tala mutindu yo vandaka kumonika, yo yonso iya vandaka kiteso mosi, mpi yo vandaka kumonana bonso nde dikulu mosi vandaka na kati ya dikulu ya nkaka. 11 Ntangu yo vandaka kutambula, yo lendaka kukwenda na bandambu yonso iya kukonda kusoba nzila, sambu yo vandaka kukwenda na ndambu yina ntu vandaka kutala kukonda kusoba nzila. 12 Nitu na bo ya mvimba, nima na bo, maboko na bo, mapapu na bo, ti makulu, makulu yonso iya yina vandaka pene-pene na bo, vandaka ya kufuluka ti meso bandambu yonso.+ 13 Na yina me tala makulu, mono waka ndinga mosi ke binga yo nde, “Makulu ya ke baluka!”

14 Konso kigangwa* vandaka ti baluse iya. Luse ya ntete vandaka luse ya sherube, luse ya zole vandaka luse ya muntu, ya tatu vandaka luse ya ntambu, mpi ya iya vandaka luse ya ngo-zulu.+

15 Ebuna basherube vandaka kutombuka—yo vandaka bigangwa iya ya moyo* yina mono monaka na nzadi Kebare+— 16 mpi ntangu basherube vandaka kutambula, makulu vandaka kutambula na lweka na bo; mpi ntangu basherube vandaka kutedimisa mapapu na bo sambu yo vanda ya kunanguka na zulu ya ntoto, makulu vandaka ve kusoba nzila to kukatuka na lweka na bo.+ 17 Ntangu bigangwa yai vandaka kutelama, makulu mpi vandaka kutelama; mpi ntangu bayai vandaka kutombuka, yo vandaka kutombuka ti bo, sambu mpeve yina ke salaka na zulu ya bigangwa ya moyo* vandaka na kati na yo.

18 Na nima, nkembo ya Yehowa+ katukaka na zulu ya munoko ya kielo ya nzo mpi telamaka na zulu ya basherube.+ 19 Ntangu yai, ntangu mono vandaka kutala, basherube tedimisaka mapapu na bo mpi bo katukaka na ntoto mpi tombukaka. Makulu mpi vandaka na lweka na bo ntangu bo vandaka kukwenda. Bo telamaka na munoko ya kielo ya esti ya nzo ya Yehowa, mpi nkembo ya Nzambi ya Izraele vandaka na zulu na bo.+

20 Yo vandaka bigangwa ya moyo* yina mono monaka na nsi ya Nzambi ya Izraele na nzadi Kebare,+ yo yina mono zabaka nde bo vandaka basherube. 21 Bo yonso iya vandaka ti baluse iya, mapapu iya, mpi kima mosi yina vandaka kumonika na nsi ya mapapu na bo+ bonso maboko ya muntu. 22 Ebuna baluse na bo vandaka kumonika bonso baluse yina mono monaka pene-pene ya nzadi Kebare.+ Konso kigangwa vandaka kukwenda kaka na ntwala.+