Esdrasi

10 Ntangu Esdrasi vandaka kusamba+ mpi kufunguna masumu, mpi vandaka kudila mpi kulala luse na ntoto na ntwala ya nzo ya Nzambi ya kieleka, kimvuka mosi ya nene ya babakala, ya bankento, ti ya bana ya Izraele vukanaka na nziunga na yandi, sambu bantu vandaka kudila mingi kibeni. 2 Ebuna Shekania mwana ya Yehiele+ ya bana ya Elami+ tubilaka Esdrasi nde: “Beto me sadila Nzambi na beto mambu kukonda kwikama na mutindu beto me kwela* bankento ya banzenza ya bantu ya insi.+ Ata mpidina, kivuvu kele kaka sambu na Izraele. 3 Ntangu yai, bika beto sala kuwakana ti Nzambi na beto+ sambu na kukula bankento yonso mpi bana yina bo butaka, na kuwakana ti lutwadisu ya Yehowa mpi ya bantu yina ke zitisaka* nsiku ya Nzambi na beto.+ Bika beto sala mambu na kuwakana ti Nsiku. 4 Telama, sambu diambu yai kele kiyeka na nge, mpi beto kele ti nge. Vanda ngolo mpi sala yo.”

5 Ebuna Esdrasi telamaka mpi lombaka bamfumu ya banganga-nzambi, Balevi, ti Izraele ya mvimba na kudia ndefi sambu na kusala mambu yina bo tubaka.+ Yo yina bo diaka ndefi. 6 Ntangu yai Esdrasi telamaka, yandi katukaka na ntwala ya nzo ya Nzambi ya kieleka mpi kwendaka na suku* ya Yehohanani mwana ya Eliashibi. Ata yandi kwendaka kuna, yandi diaka kima ve mpi nwaka masa ve, sambu yandi vandaka kudila sambu na kukonda kwikama ya bantu yina katukaka na kimpika.+

7 Ebuna bo tindaka nsangu na Yuda ya mvimba ti na Yeruzalemi sambu bantu yonso yina vandaka ntete bampika kuvukana na Yeruzalemi; 8 mpi na kutadila lukanu ya bamfumu ti ya bankuluntu, konso muntu yina ta kwisa ve na nsungi ya bilumbu tatu, bo ta botula* bima na yandi yonso mpi bo ta kula yandi na kimvuka ya bantu yina katukaka na kimpika.+ 9 Yo yina babakala yonso ya Yuda ti ya Benyamini vukanaka na Yeruzalemi na nsungi ya bilumbu tatu, disongidila, na ngonda ya uvwa, na kilumbu ya 20 ya ngonda. Bantu yonso vandaka ya kuvanda na kibansala ya nzo ya Nzambi ya kieleka, bo vandaka kutekita sambu na diambu yina mpi sambu na mvula ya ngolo yina vandaka kunoka.

10 Ebuna nganga-nzambi Esdrasi telamaka mpi tubilaka bo nde: “Beno me sala mambu kukonda kwikama na mutindu beno me kwela bankento ya banzenza+ mpi na mutindu yina beno me yika mbi na mbi ya Izraele. 11 Ntangu yai, beno funguna masumu na beno na Yehowa Nzambi ya ba-nkaka na beno mpi beno sala luzolo na yandi. Beno kabwana ti bantu ya insi yai mpi ti bankento yai ya banzenza.”+ 12 Ebuna dibundu ya mvimba pesaka mvutu na ndinga ya ngolo nde: “Kisalu na beto kele ya kusala kaka mutindu nge me tuba. 13 Kansi, bantu kele mingi, mpi yo kele nsungi ya mvula. Yo kele mpasi na kutelama na nganda, mpi diambu yai ta baka kaka ve kilumbu mosi to bilumbu zole, sambu beto me kolama na kiteso mosi ya nene na diambu yai. 14 Yo yina, pardo, bika nde bamfumu na beto kumonisa dibundu ya mvimba;+ bika nde bantu yonso yina kele na bambanza na beto bayina me kwelaka bankento ya banzenza bo kwisa na ntangu mosi buna kumosi ti bankuluntu mpi bazuzi ya konso mbanza, tii kuna beto ta sala nde makasi yina Nzambi na beto wilaka beto sambu na diambu yai kumana.”

15 Kansi, Yonatani mwana ya Asaele ti Yazeya mwana ya Tikva buyaka diambu yai, mpi Meshulami ti Shabetai+ yina vandaka Balevi, pesaka bo maboko. 16 Kansi bantu yina vandaka ntete bampika salaka mambu yina bo wakanaka; ebuna nganga-nzambi Esdrasi ti bamfumu ya mabuta ya banzo ya batata na bo, bo yonso yina bo bingaka na bazina, wakanaka bantu na bantu na ndambu na bo na kilumbu ya ntete ya ngonda ya kumi sambu na kutadila diambu yina; 17 ebuna na kilumbu ya ntete ya ngonda ya ntete, bo manisaka mambu ya babakala yonso yina kwelaka bankento ya banzenza. 18 Mpi bo monaka nde bana ya nkaka na kati ya bana ya banganga-nzambi kwelaka bankento ya banzenza:+ na bana ya Yeshua+ mwana ya Yehosadaki ti bampangi na yandi, Maaseya, Eliezere, Yaribi, ti Gedalia. 19 Kansi bo silaka* na kukula bankento na bo, mpi sambu bo salaka mbi, bo ta pesa sambu na mbi na bo dimeme ya bakala yina ta katuka na kimvuka ya mameme.+

20 Na bana ya Imere:+ Hanani ti Zebadia; 21 na bana ya Arimi:+ Maaseya, Eliya, Shemaya, Yehiele, ti Uziya; 22 na bana ya Pashure:+ Elioenai, Maaseya, Ismaele, Netanele, Yozabadi, ti Eleasa. 23 Na Balevi: Yozabadi, Shimei, Kelaya (disongidila, Kelita), Petaya, Yuda, ti Eliezere; 24 na miyimbi-bankunga: Eliashibi; mpi na bankengidi ya bakielo: Shalumi, Telemi, ti Uri.

25 Na Izraele, na bana ya Paroshi:+ Ramia, Yiziya, Malkiya, Miyamini, Eleazare, Malkiya, ti Benaya; 26 na bana ya Elami:+ Matania, Zekaria, Yehiele,+ Abdi, Yeremoti, ti Eliya; 27 na bana ya Zatu:+ Elioenai, Eliashibi, Matania, Yeremoti, Zabadi, ti Aziza; 28 na bana ya Bebai:+ Yehohanani, Hanania, Zabai, ti Atelai; 29 na bana ya Bani: Meshulami, Maluke, Adaya, Yashubi, Sheale, ti Yeremoti; 30 na bana ya Pahati-moabi:+ Adna, Kelale, Benaya, Maaseya, Matania, Besalele, Binwi, ti Manase; 31 na bana ya Arimi:+ Eliezere, Yishiya, Malkiya,+ Shemaya, Shimeoni, 32 Benyamini, Maluke, ti Shemaria; 33 na bana ya Ashumi:+ Matenai, Matata, Zabadi, Elifeleti, Yeremai, Manase, ti Shimei; 34 na bana ya Bani: Maadai, Amrami, Wele, 35 Benaya, Bedeya, Keluhi, 36 Wania, Meremoti, Eliashibi, 37 Matania, Matenai, ti Yaasu; 38 na bana ya Binwi: Shimei, 39 Shelemia, Natani, Adaya, 40 Maknadebai, Shashai, Sharai, 41 Azarele, Shelemia, Shemaria, 42 Shalumi, Amaria, ti Yozefi; 43 mpi na bana ya Nebo: Yeyele, Matitia, Zabadi, Zebina, Yadai, Yoele, ti Benaya. 44 Bantu yai yonso bakaka bankento ya banzenza,+ mpi bo kulaka bankento na bo kumosi ti bana na bo.+