Kulonga

26 “Nsuka-nsuka ntangu nge ta kota na insi yina Yehowa Nzambi na nge ke pesa nge bonso dikabu mpi nge ta baka yo mpi ta zinga kuna, 2 nge fwete baka ndambu ya bambuma ya ntete na kati ya bima* yonso ya ntoto, yina nge ta katula na insi na nge yina Yehowa Nzambi na nge ke pesa nge, mpi kutula yo na kitunga mosi mpi kukwenda na kisika yina Yehowa Nzambi na nge ta pona sambu zina na yandi kuvanda.+ 3 Nge fwete kwenda na nganga-nzambi yina ta vanda ke sala na bilumbu yina mpi kutubila yandi nde, ‘Bubu yai mono ke zabisa Yehowa Nzambi na nge nde mono me kota na insi yina Yehowa diaka ndefi na ba-nkaka na beto na kupesa beto.’+

4 Ebuna nganga-nzambi ta baka kitunga yina na diboko na nge mpi ta tula yo na ntwala ya mesa-kimenga ya Yehowa Nzambi na nge. 5 Ebuna nge fwete tuba na ntwala ya Yehowa Nzambi na nge nde, ‘Tata na mono vandaka muntu ya Arami+ yina vandaka kuyungana-yungana,* yandi kulumukaka na Ezipte+ mpi zingaka kuna bonso munzenza, ti bantu fioti ya nzo na yandi.+ Kansi kuna, yandi kumaka dikanda mosi ya nene, ya ngolo mpi ya bantu mingi.+ 6 Ebuna bantu ya Ezipte niokulaka beto, monisaka beto mpasi mpi kotisaka beto na kimpika ya ngolo.+ 7 Yo yina beto yantikaka kudidila Yehowa, Nzambi ya ba-nkaka na beto, ebuna Yehowa waka ndinga na beto mpi monaka bampasi na beto, basusi na beto, mpi kuniokwama na beto.+ 8 Nsuka-nsuka Yehowa basisaka beto na Ezipte ti diboko ya ngolo mpi ya kutandula,+ ti mambu ya ke pesa boma, ti bidimbu mpi bimangu.+ 9 Ebuna yandi nataka beto na kisika yai mpi pesaka beto insi yai, insi yina miliki* ti bwiki kele mingi.+ 10 Ntangu yai mono me nata bambuma ya ntete na kati ya bima ya ntoto yina Yehowa me pesaka mono.’+

“Nge fwete tula yo na ntwala ya Yehowa Nzambi na nge mpi kufukama na ntwala ya Yehowa Nzambi na nge. 11 Ebuna nge ta vanda na kiese sambu na mambu yonso ya mbote yina Yehowa Nzambi na nge me pesa nge ti bantu ya nzo na nge, nge ti Mulevi ti munzenza yina ke zinga na kati na beno.+

12 “Ntangu nge ta manisa kubaka+ ndambu mosi na kati ya bandambu kumi ya bima na nge yonso ya bilanga na mvula ya tatu, mvula ya dikumi, nge ta pesa yo na Mulevi, na munzenza, na mwana ya me konda tata,* mpi na mufwidi ya nkento, bo ta dia na kati ya bambanza* na nge tii kuna bo ta fuluka.+ 13 Na nima nge ta tuba na ntwala ya Yehowa Nzambi na nge nde, ‘Mono me katula kitini ya santu na nzo na mono mpi mono me pesa yo na Mulevi, na munzenza, na mwana ya me konda tata, mpi na mufwidi ya nkento,+ kaka mutindu nge songaka mono. Mono me fwa ve bansiku na nge mpi mono me mona yo ve mpamba. 14 Mono diaka yo ve ntangu mono vandaka na mafwa, mono katulaka ve ata ndambu ntangu mono vandaka mvindu, mpi mono pesaka yo ve sambu na muntu ya kufwa. Mono lemfukilaka ndinga ya Yehowa Nzambi na mono mpi mono salaka mambu yonso yina nge songaka mono. 15 Ntangu yai, katuka kisika ya santu yina nge ke zingaka, na zulu, tala na ntoto mpi sakumuna bantu na nge Izraele mpi insi yina nge me pesaka beto,+ kaka mutindu nge zengaka kieleka na ba-nkaka na beto,+ insi yina miliki* ti bwiki kele mingi.’+

16 “Bubu yai Yehowa Nzambi na nge ke songa nge na kuzitisa bansiku yai mpi bankanu yai. Nge fwete zitisa yo mpi kulanda yo na ntima na nge+ ya mvimba mpi na moyo* na nge ya mvimba. 17 Bubu yai Yehowa me tubila nge nde yandi ta kuma Nzambi na nge kana nge tambula na banzila na yandi, nge zitisa bansiku na yandi,+ bantuma na yandi,+ ti bankanu na yandi,+ mpi kana nge wa ndinga na yandi. 18 Mpi bubu yai nge me tubila Yehowa nde nge ta kuma muntu na yandi, kima na yandi ya mfunu mingi,*+ kaka mutindu yandi silaka nge, nde nge ta zitisa bansiku na yandi yonso, 19 mpi nde yandi ta tula nge na zulu ya makanda yonso ya nkaka yina yandi salaka,+ yandi ta pesa nge lukumu, ta sala nde nge zabana, mpi ta pesa nge nkembo kana nge ke monisa nde nge kele muntu ya santu sambu na Yehowa Nzambi na nge,+ kaka mutindu yandi silaka.”