Ya Ntete na Bakorinto
5 Ya kieleka, bantu ke tubila pite*+ na kati na beno, mpi pite* ya mutindu yina kele nkutu ve na kati ya makanda—bakala mosi ke zinga ti* nkento ya tata na yandi.+ 2 Keti beno ke tudila yo lulendo? Keti yo lombaka ve nde beno dila+ mpi beno katula muntu yina me sala diambu yai na kati na beno?+ 3 Ata mono kele ve ti beno na nitu, mono kele ti beno na mpeve, mpi mono me sambisa ntama muntu yina me sala diambu yai, bonso nde mono vandaka kibeni ti beno. 4 Ntangu beno ta vukana na zina ya Mfumu na beto Yezu, beno ta zaba nde mono kele ti beno na mpeve kumosi ti ngolo ya Mfumu na beto Yezu, 5 beno fwete pesa muntu ya mutindu yina na Satana+ sambu nitu kufwa, mpidina mpeve lenda guluka na kilumbu ya Mfumu.+
6 Kudikumisa na beno kele mbote ve. Keti beno me zaba ve nde ndambu ya levire ke vimbisaka pate yonso ya fufu?+ 7 Beno katula levire ya ntama, sambu beno vanda pate ya mpa, yina me konda levire, mutindu beno kele. Sambu ya kieleka, bo me tambikaka+ Kristu mwana-dimeme+ na beto ya Paki. 8 Yo yina beto ta ve nkinsi+ ti levire ya ntama to ti levire ya masumu mpi ya mambu ya mbi, kansi beto ta yo ti mampa ya kukonda levire, mampa ya masonga mpi ya kieleka.
9 Na mukanda na mono, mono sonikilaka beno na kuyambula kuvukana ti bantu yina ke salaka pite,* 10 yo ke tendula ve kuyambula kuvukana na mambu yonso ti bantu ya nsi-ntoto yai+ ya ke salaka pite* to bantu ya lukasi to bantu ya ke botulaka bima ya bantu ya nkaka to bantu ya ke sambilaka biteki. Kana ve, yo zolaka kulomba nde beno katuka kibeni na nsi-ntoto.+ 11 Kansi ntangu yai, mono ke sonikila beno na kuyambula kuvukana+ ti muntu yina ke tubaka nde yandi kele mpangi, kansi yandi ke salaka pite,* yandi kele muntu ya lukasi,+ yandi ke sambilaka biteki, yandi ke fingaka, yandi ke lawukaka malafu,+ to yandi ke botulaka bima ya bantu ya nkaka,+ mpi na kudia nkutu ve ti muntu ya mutindu yina. 12 Keti kusambisa bantu yina kele na nganda kele mambu na mono? Keti beno ke sambisaka ve bantu yina kele na kati, 13 ntangu Nzambi ke sambisa bantu yina kele na nganda?+ “Beno katula muntu ya mbi na kati na beno.”+