Nkunga

107 Beno pesa Yehowa matondo, sambu yandi kele mbote;+

Zola na yandi ya kwikama ke zingaka kimakulu.+

 2 Bika bantu yina Yehowa me gulusa* kutuba diambu yai,

Bantu yina yandi katulaka na maboko* ya mbeni,+

 3 Yina yandi vukisaka kumosi katuka na bansi,+

Katuka na esti mpi katuka na westi,*

Katuka na nordi mpi katuka na sudi.+

 4 Bo yunganaka na ntoto-makanga, na ntoto ya zelo na zelo;

Bo monaka ve nzila ya ke nata na mbanza yina bo lenda zinga.

 5 Bo waka nzala ya madia mpi ya masa;

Bo* lembaka mpi kumaka pene-pene ya kufwa.

 6 Bo landaka kudidila Yehowa na bampasi na bo;+

Yandi gulusaka bo na bampasi na bo.+

 7 Yandi salaka nde bo tambula na nzila ya mbote+

Sambu bo kwisa na mbanza yina bo lenda zinga.+

 8 Bika bantu kupesa Yehowa matondo+ sambu na zola na yandi ya kwikama

Mpi sambu na mambu na yandi ya kuyituka yina yandi me salaka sambu na bana ya bantu.+

 9 Sambu yandi me pesa masa na muntu yina kele na kiwina,*

Mpi me pesa bima mingi ya mbote na muntu yina kele na nzala.*+

10 Bankaka vandaka kuzinga na mpimpa ya ngolo kibeni,

Bo vandaka bantu ya boloko yina vandaka kumona mpasi mpi yina bo kangaka na bibende.

11 Sambu bo kolamaka na ndinga ya Nzambi;

Bo zitisaka ve ndongisila ya Muntu ya Kuluta Zulu.+

12 Yo yina, yandi kulumusaka bantima na bo na nzila ya bampasi;+

Bo bulaka sakuba, mpi muntu ya kusadisa bo vandaka ve.

13 Bo bingaka Yehowa sambu yandi sadisa bo na bampasi na bo,

Yandi gulusaka bo na bampasi na bo.

14 Yandi basisaka bo na mudidi ya ngolo kibeni,

Mpi yandi zengaka miniololo na bo.+

15 Bika bantu kupesa Yehowa matondo sambu na zola na yandi ya kwikama+

Mpi sambu na mambu na yandi ya kuyituka yina yandi me salaka sambu na bana ya bantu.

16 Sambu yandi me bwisa bakielo ya kwivre

Mpi yandi me zenga bima ya kukangila ya bibende.+

17 Bo vandaka bazoba mpi bo monaka mpasi,+

Sambu na mambu na bo ya mbi mpi bifu na bo.+

18 Bo vandaka diaka ve na nzala ya kudia* konso madia yina;

Bo kumaka pene-pene ya bakielo ya lufwa.

19 Bo vandaka kubinga Yehowa sambu yandi sadisa bo na bampasi na bo;

Yandi vandaka kugulusa bo na bampasi na bo.

20 Yandi vandaka kutinda ndinga na yandi mpi kubelula bo+

Mpi kukatula bo na mabulu yina bo kangamaka.

21 Bika bantu kupesa Yehowa matondo sambu na zola na yandi ya kwikama

Mpi sambu na mambu na yandi ya kuyituka yina yandi me salaka sambu na bana ya bantu.

22 Bika bo pesa bimenga ya kupesa matondo+

Mpi bo zabisa bisalu na yandi ti milolo ya kiese.

23 Bayina ke salaka nzietelo na nzadi-mungwa na bamaswa,

Bayina ke salaka mumbongo na bo na bamasa ya nene,+

24 Bo me monaka bisalu ya Yehowa

Mpi bisalu na yandi ya kuyituka na mudindu;+

25 Mutindu yandi ke tubaka ngogo mpi yo ke salaka nde mupepe ya ngolo kubula,+

Mpi yo tombula bitembo ya nzadi-mungwa.

26 Bo ke tombuka tii na zulu;

Bo ke bwa tii na bisika ya mudindu.

27 Bo kele na lunziungu mpi bo ke tambula kisaka-saka bonso muntu ya me lawuka malafu,

Mpi mayele na bo yonso kele na mfunu ve.+

28 Ebuna bo ke didila Yehowa na bampasi na bo,+

Mpi yandi ke gulusa bo na bampasi na bo.

29 Yandi ke lembika mupepe ya ngolo;

Ebuna bitembo ya nzadi-mungwa ke kuma pima.+

30 Bo ke yangalala ntangu bima yai ke kuma pima,

Mpi yandi ke nata bo na dibungu yina bo me zola.

31 Bika bantu kupesa Yehowa matondo sambu na zola na yandi ya kwikama

Mpi sambu na mambu na yandi ya kuyituka yina yandi me salaka sambu na bana ya bantu.+

32 Bika bo kumisa yandi na kati ya kimvuka ya bantu,+

Mpi bika bo pesa yandi lukumu na lukutakanu* ya bankuluntu.

33 Yandi ke kumisaka banzadi ntoto ya zelo na zelo

Mpi yandi ke kumisaka banto ya masa ntoto ya kuyuma,+

34 Yandi ke kumisaka ntoto yina ke butaka ntoto ya mpamba ya mungwa,+

Sambu na mambu ya mbi ya bantu yina ke zingaka kuna.

35 Yandi ke kumisaka ntoto ya zelo na zelo mazanga ya masa ya me fuluka ti balukengi,

Mpi ke kumisaka ntoto ya kuyuma ba-ntoto ya masa.+

36 Yandi ke sala nde bantu yina kele na nzala kuzinga kuna,+

Sambu bo tunga mbanza yina bo lenda zinga.+

37 Bo ke kuna bilanga mpi bilanga ya vinu+

Yina ke buta bambuma mingi.+

38 Yandi ke sakumuna bo mpi bo ke kuma mingi kibeni;

Yandi ke bika ve nde bimvuka na bo ya bangombe kukuma fioti.+

39 Kansi bo ke kuma diaka fioti mpi ke wa nsoni

Sambu bo ke niokula bo, mpi sambu na mpasi ti mawa.

40 Yandi ke pesaka bantu ya lukumu nsoni,

Mpi ke salaka nde bo yungana na bantoto ya mpamba ya me konda banzila.+

41 Kansi yandi ke taninaka nsukami sambu bo monisa yandi ve mpasi+

Mpi ke kumisaka mabuta na bo mingi bonso bitwisi.

42 Bantu ya mbote ke mona diambu yai mpi ke yangalala;+

Kansi bantu yonso ya kukonda lunungu ke kanga minoko na bo.+

43 Konso muntu yina kele mayele ta mona mambu yai,+

Mpi yandi ta tadila mbote- mbote mambu ya Yehowa ya ke monisa zola ya kwikama.+