Samuele ya Zole

5 Na nima, makanda yonso ya Izraele kwisaka na Davidi na Ebroni+ mpi tubaka nde: “Beto kele bampangi na nge ya menga.*+ 2 Ntete, ntangu Saule vandaka ntotila na beto, nge muntu vandaka kutwadisa Izraele na bitumba.*+ Ebuna Yehowa tubilaka nge nde: ‘Nge ta gungula bantu na mono Izraele, mpi nge ta kuma ntwadisi ya Izraele.’”+ 3 Yo yina bankuluntu yonso ya Izraele kwisaka na Ebroni kisika ntotila vandaka, ebuna ntotila Davidi salaka kuwakana ti bo+ na Ebroni na ntwala ya Yehowa. Ebuna bo tulaka Davidi mafuta sambu yandi kuma ntotila ya Izraele.+

4 Davidi vandaka ti bamvula 30 ntangu yandi kumaka ntotila, mpi yandi yalaka bamvula 40.+ 5 Yandi yalaka Yuda bamvula 7 ti bangonda 6 na Ebroni, mpi yandi yalaka Izraele ya mvimba mpi Yuda bamvula 33 na Yeruzalemi.+ 6 Ebuna ntotila ti bantu na yandi kwendaka na Yeruzalemi sambu na kunwanisa bantu ya Yebusi+ yina vandaka kuzinga na insi yina. Bo sosilaka Davidi nde: “Nge ta kota ve awa ata fioti! Ata kifwa-meso mpi muntu ya makulu-kifu ta kula nge.” Bo yindulaka nde, ‘Davidi ta kota awa ve ata fioti.’+ 7 Kansi Davidi botulaka kisika ya ngolo ya lutaninu ya Sioni, yina kele ntangu yai Mbanza ya Davidi.+ 8 Yo yina Davidi tubaka kilumbu yina nde: “Bantu yina ke nwanisa bantu ya Yebusi fwete luta na nzila ya masa yina bo timunaka sambu na kufwa ‘bantu ya makulu-kifu ti bifwa-meso,’ bayina Davidi* ke mengaka!” Yo yina bo ke tubaka nde: “Kifwa-meso ti muntu ya makulu-kifu ta kota ve ata fioti na nzo.” 9 Na nima, Davidi kumaka kuzinga na kisika yina ya ngolo ya lutaninu, mpi bo bingaka yo* Mbanza ya Davidi; mpi Davidi yantikaka kutunga na nziunga katuka na Mwa-Ngumba*+ tii na kati.+ 10 Ebuna Davidi vandaka kukuma kaka ngolo,+ mpi Yehowa Nzambi ya makesa vandaka ti yandi.+

11 Hirami+ ntotila ya Tire tindilaka Davidi binati-nsangu, yandi tindaka mpi banti ya sedre,+ bantu ya ke salaka kisalu ya mabaya, mpi bantu ya ke salaka kisalu ya matadi sambu na kutunga bibaka, mpi bo yantikaka kutunga nzo*+ sambu na Davidi. 12 Ebuna Davidi zabaka nde Yehowa tulaka yandi kibeni ntotila ya Izraele+ mpi tombulaka kimfumu na yandi+ sambu na mambote ya bantu na yandi Izraele.+

13 Davidi bakaka bamakangu mingi+ mpi kwelaka bankento mingi na Yeruzalemi na nima ya kukatuka na Ebroni, mpi yandi butaka diaka bana mingi ya babakala ti ya bankento.+ 14 Yai bazina ya bana yina yandi butaka na Yeruzalemi: Shamua, Shobabi, Natani,+ Salomo,+ 15 Yibare, Elishua, Nefegi, Yafia, 16 Elishama, Eliada, mpi Elifeleti.

17 Ntangu bantu ya Filistia waka nde bo me tula Davidi mafuta sambu yandi vanda ntotila ya Izraele,+ bantu yonso ya Filistia tombukaka sambu na kusosa Davidi.+ Ntangu Davidi waka yo, yandi kulumukaka na kisika ya ngolo ya lutaninu.+ 18 Ebuna bantu ya Filistia kwisaka mpi bo panzanaka na Muwanda* ya Refayimi.+ 19 Davidi yulaka Yehowa+ nde: “Keti mono fwete tombuka sambu na kunwanisa bantu ya Filistia? Keti nge ta pesa bo na maboko na mono?” Ebuna Yehowa tubilaka Davidi nde: “Tombuka, sambu mono ta pesa kibeni bantu ya Filistia na maboko na nge.”+ 20 Yo yina Davidi kwisaka na Baale-perazimi mpi Davidi fwaka bo kuna. Ebuna yandi tubaka nde: “Yehowa me pasula nzila na kati ya bambeni na mono+ na ntwala na mono, bonso nzila yina masa me pasula.” Yo yina yandi pesaka kisika yina zina Baale-perazimi.*+ 21 Bantu ya Filistia yambulaka biteki na bo kuna, ebuna Davidi ti bantu na yandi katulaka yo.

22 Na nima bantu ya Filistia tombukaka diaka mpi panzanaka na Muwanda* ya Refayimi.+ 23 Davidi yulaka Yehowa, kansi Yandi tubaka: “Kutombuka ve mbala mosi. Kansi, baluka na nima na bo, mpi kwisa kunwanisa bo na ntwala ya banti ya baka. 24 Ntangu nge ta wa makelele ya makulu ya bantu ya ke tambula na bansongi ya banti ya baka, sala mambu kukonda kusukinina, sambu Yehowa ta kwenda na ntwala na nge sambu na kufwa basoda ya Filistia.” 25 Yo yina Davidi salaka kaka mutindu Yehowa songaka yandi, mpi yandi fwaka bantu ya Filistia+ katuka na Geba+ nzila ya mvimba tii na Gezere.+