Bansangu ya Zole

23 Na mvula ya nsambwadi, Yehoyada salaka mambu na kikesa mpi salaka kuwakana ti bamfumu ya bankama,+ disongidila, Azaria mwana ya Yerohami, Ismaele mwana ya Yehohanani, Azaria mwana ya Obedi, Maaseya mwana ya Adaya, mpi Elishafati mwana ya Zikri. 2 Na nima bo kwendaka na Yuda ya mvimba mpi bo vukisaka Balevi+ ya bambanza yonso ya Yuda ti bamfumu ya banzo ya batata ya Izraele. Ntangu bo kwisaka na Yeruzalemi, 3 dibundu ya mvimba salaka kuwakana+ ti ntotila na nzo ya Nzambi ya kieleka, na nima Yehoyada tubilaka bo nde:

“Beno tala! Mwana ya ntotila ta yala, kaka mutindu Yehowa silaka sambu na bana ya Davidi.+ 4 Beno fwete sala mutindu yai: Kimvuka mosi na kati ya bimvuka tatu ya banganga-nzambi mpi ya Balevi yina ta sala kisalu+ na Kisabatu ta vanda bankengidi ya bakielo;+ 5 kimvuka ya nkaka na kati ya bimvuka yina tatu ta vanda na nzo ya ntotila,+ mpi kimvuka ya nkaka na kati ya bimvuka yina tatu ta vanda na Kielo ya Fondasio, mpi bantu yonso ta vanda na bibansala ya nzo ya Yehowa.+ 6 Beno pesa muntu mosi ve nzila ya kukota na nzo ya Yehowa katula kaka banganga-nzambi ti Balevi yina ke sala kisalu.+ Bo bantu lenda kota, sambu bo kele kimvuka ya santu, ebuna bantu yonso ta sala mambu yina Yehowa ke lomba. 7 Balevi fwete ziunga ntotila na bandambu yonso, konso muntu ti binwaninu na yandi na maboko. Konso muntu yina ta kota na nzo bo ta fwa yandi. Beno vanda ti ntotila konso kisika yina yandi ke kwenda.”*

8 Balevi mpi bantu yonso ya Yuda salaka kaka mutindu nganga-nzambi Yehoyada songaka bo. Yo yina konso muntu bakaka bantu na yandi yina vandaka na kisalu na Kisabatu, ti bayina vandaka ve na kisalu na Kisabatu,+ sambu nganga-nzambi Yehoyada pesaka ve bimvuka+ nzila ya kubikisa kisalu na bo mpi kukwenda. 9 Ebuna nganga-nzambi Yehoyada pesaka bamfumu ya bankama+ makonga, bitaninu ya fioti,* mpi bitaninu ya ntotila Davidi+ yina kele bonso dimbuma, mpi yina vandaka na nzo ya Nzambi ya kieleka.+ 10 Ebuna yandi tulaka bantu yonso, konso muntu ti kinwaninu na yandi na maboko, yantika na diboko ya kitata ya nzo tii na diboko ya kimama ya nzo, pene-pene ya mesa-kimenga mpi pene-pene ya nzo, na nziunga ya ntotila. 11 Na nima, bo basisaka mwana ya ntotila,+ bo lwatisaka yandi mpu ya kimfumu mpi tulaka Kimbangi*+ na zulu na yandi, ebuna bo kumisaka yandi ntotila mpi Yehoyada ti bana na yandi tulaka yandi mafuta. Na nima, bo tubaka nde: “Luzingu ya nda na ntotila!”+

12 Ntangu Atalia waka makelele ya bantu ya ke baka ntinu mpi ke kumisa ntotila, na mbala mosi yandi kwisaka na nzo ya Yehowa+ kisika bantu vandaka. 13 Ebuna yandi monaka ntotila me telama kuna pene-pene ya dikunzi na yandi na kisika ya kukotila. Bamfumu+ ti bantu ya ke bulaka bampungi vandaka ti ntotila, mpi bantu yonso ya insi vandaka kuyangalala+ mpi kubula bampungi, mpi miyimbi-bankunga yina vandaka ti bima ya kubudila miziki vandaka kutwadisa* bankunga ya kukumisa Nzambi. Ebuna Atalia pasulaka bilele na yandi mpi bokaka nde: “Komplo! Komplo!” 14 Kansi nganga-nzambi Yehoyada basisaka bamfumu ya bankama, bantu yina bo tulaka bamfumu ya basoda, mpi yandi tubilaka bo nde: “Beno katula yandi na bandonga, mpi kana muntu kulanda yandi, beno fwa yandi na mbele ya bitumba!” Sambu nganga-nzambi tubaka nde: “Beno fwa yandi ve na nzo ya Yehowa.” 15 Yo yina bo simbaka yandi, mpi ntangu yandi kumaka na munoko ya Kielo ya Bampunda ya nzo ya ntotila, bo fwaka yandi pana na mbala mosi.

16 Ebuna Yehoyada salaka kuwakana na kati na yandi ti bantu yonso mpi ti ntotila, nde bo ta landa kuvanda bantu ya Yehowa.+ 17 Na nima, bantu yonso kwisaka na nzo* ya Baale mpi bwisaka yo,+ bo panzaka bamesa-kimenga na yandi ti biteki na yandi,+ mpi bo fwaka Matani nganga-nzambi ya Baale+ na ntwala ya bamesa-kimenga yina. 18 Ebuna Yehoyada pesaka kisalu ya kutala nzo ya Yehowa na maboko ya banganga-nzambi mpi ya Balevi, yina Davidi tulaka na bimvuka na bo na nzo ya Yehowa sambu na kupesa Yehowa bimenga ya kuyoka+ na kuwakana ti mambu yina bo me sonikaka na Nsiku ya Moize,+ na kiese mpi ti bankunga, mutindu Davidi tubaka.* 19 Yandi tulaka mpi bankengidi ya bakielo+ na bakielo ya nzo ya Yehowa, sambu ata muntu mosi ve ya kele mvindu na konso mutindu yina kukota. 20 Ntangu yai, yandi bakaka bamfumu ya bankama,+ bantu ya lukumu, bamfumu ya bantu, mpi bantu yonso ya insi, ebuna yandi bakaka ntotila na nzo ya Yehowa sambu na kukulumuka ti yandi. Na nima bo lutilaka na kielo ya zulu sambu na kukwisa na nzo ya ntotila mpi bo tulaka ntotila na kiti ya kimfumu.+ 21 Yo yina bantu yonso ya insi waka kiese mpi mbanza kumaka pima, sambu bo fwaka Atalia na mbele ya bitumba.