OZEA
1 Yai ndinga ya Yehowa yina kwisilaka Ozea* mwana ya Beeri na bilumbu ya Uziya,+ ya Yotami,+ ya Ahazi,+ mpi ya Ezekiasi,+ bantotila ya Yuda,+ mpi na bilumbu ya Yeroboami+ mwana ya Yoashi,+ ntotila ya Izraele. 2 Ntangu Yehowa yantikaka kutuba ndinga na yandi na nzila ya Ozea, Yehowa tubilaka Ozea nde: “Kwenda kukwela nkento yina ta sala kindumba* mpi baka bana yina yandi ta buta na kindumba* na yandi, mpamba ve insi me yambula kulanda Yehowa kimakulu sambu na kindumba.”*+
3 Yo yina yandi kwendaka mpi kwelaka Gomere mwana ya Diblayimi, na nima Gomere bakaka divumu mpi butilaka yandi mwana-bakala.
4 Ebuna Yehowa tubilaka yandi nde: “Pesa yandi zina Yizreele,* sambu na nima ya ntangu fioti mono ta sambisa nzo ya Yehu+ sambu na menga yina Yizreele tiamunaka, mpi mono ta sukisa luyalu ya nzo ya Izraele.+ 5 Na kilumbu yina mono ta buka munduki ya tolo-tolo ya Izraele na Muwanda* ya Yizreele.”
6 Gomere bakaka diaka divumu mpi yandi butaka mwana-nkento. Ebuna Nzambi songaka Ozea nde: “Pesa yandi zina Lo-ruhama,* sambu mono ta wila diaka ve nzo ya Izraele mawa,+ sambu mono ta kula bo kibeni.+ 7 Kansi mono ta wila nzo ya Yuda+ mawa, mpi mono ta gulusa bo na nzila ya Yehowa Nzambi na bo;+ mono ta gulusa bo ve na nzila ya munduki ya tolo-tolo to ya mbele ya bitumba to ya bampunda to ya bantu yina ke tambusaka bampunda.”+
8 Ntangu Gomere katulaka Lo-ruhama na mabele, yandi bakaka divumu mpi butaka mwana-bakala. 9 Ebuna Nzambi tubaka nde: “Pesa yandi zina Lo-ami,* sambu beno kele ve bantu na mono mpi mono ta vanda ve Nzambi na beno.
10 “Ntalu ya bantu* ya Izraele ta vanda bonso bambuma ya zelo ya nzadi-mungwa, yina bo lenda tesa ve mpi bo lenda tanga ve.+ Mpi na kisika yina bo tubilaka bo nde, ‘Beno kele ve bantu na mono,’+ bo ta tubila bo nde, ‘Bana ya Nzambi ya moyo.’+ 11 Ebuna bantu ya Yuda ti ya Izraele ta vukana na bumosi,+ bo ta sola mfumu mosi sambu na bo mpi bo ta basika na insi yina, sambu kilumbu ya Yizreele+ ta vanda kilumbu ya nene.
2 “Beno tuba na bampangi na beno ya babakala nde, ‘Bantu na mono!’*+
Mpi na bampangi na beno ya bankento nde, ‘O nkento yina bo me wila mawa!’*+
2 Beno funda mama na beno; beno funda yandi,
Sambu yandi kele ve nkento na mono+ mpi mono kele ve bakala na yandi.
Yandi fwete yambula kindumba* na yandi
Mpi yandi fwete katula bizumba na yandi na kati-kati ya mabele na yandi,
3 Kana ve mono ta bikisa yandi kinkonga mpi mono ta kumisa yandi bonso na kilumbu yina yandi butukaka,
Mono ta kumisa yandi bonso ntoto-makanga,
Mono ta kumisa yandi bonso ntoto yina me konda masa,
Mpi mono ta fwisa yandi na nzala ya masa.
4 Mono ta wila ve bana na yandi mawa,
Sambu bo kele bana ya makangu.*
5 Sambu mama na bo me sala kindumba.*+
Nkento yina bakaka divumu na bo me sala mambu ya nsoni,+ sambu yandi tubaka nde,
‘Mono ta landa bantu yina ke zolaka mono ti nzala ya ngolo,+
Bantu yina ke pesaka mono dimpa mpi masa,
Lene ti lino, mafuta mpi malafu.’
6 Yo yina mono ta kanga nzila na nge ti lupangu ya bansende;
Mpi mono ta sala kibaka ya matadi sambu na kuziunga yandi,
Na mpila nde yandi ta mona ve banzila na yandi.
7 Yandi ta landa bantu yina ke zolaka yandi ti nzala ya ngolo, kansi yandi ta kuta bo ve;+
Yandi ta sosa bo, kansi yandi ta mona bo ve.
Ebuna yandi ta tuba nde, ‘Mono ta vutukila bakala na mono ya ntete,+
Sambu na ntangu yina mono vandaka mbote kuluta ntangu yai.’+
8 Yandi zabaka ve nde mono muntu vandaka kupesa yandi bambuma,+ vinu ya mpa, ti mafuta,
Mpi mono muntu vandaka kupesa yandi arza mingi
Ti wolo, yina bo vandaka kusadila sambu na Baale.+
9 ‘Yo yina, mono ta vutuka mpi ta katula bambuma na mono na ntangu na yo
Mpi vinu na mono ya mpa na nsungi na yo,+
Ebuna mono ta botula lene mpi lino na mono yina yandi vandaka kufika kinkonga na yandi.
10 Ntangu yai mono ta songa kinkonga na yandi na meso ya bantu yina ke zolaka yandi ti nzala ya ngolo,
Mpi muntu mosi ve ta gulusa yandi na maboko na mono.+
11 Mono ta sukisa kiese na yandi yonso,
Bankinsi na yandi,+ bangonda na yandi ya mpa, bisabatu na yandi, mpi bansungi na yandi yonso ya bankinsi.
12 Mono ta bebisa banti na yandi ya vinu mpi ya bafige, yina yandi tubaka sambu na yo nde:
“Yai lufutu na mono, yina bantu ya ke zolaka mono ti nzala ya ngolo pesaka mono”;
Mono ta kumisa yo mfinda,
Mpi bambisi ya mfinda ta dia yo.
13 Mono ta sambisa yandi sambu na bilumbu yina yandi pesaka biteki ya Baale+ bimenga,
Ntangu yandi vandaka kudikumisa kitoko ti balupetu mpi bima ya ke kumisaka nitu kitoko mpi yandi vandaka kulanda bantu yina ke zolaka yandi ti nzala ya ngolo,
Mpi mono vandaka muntu yina yandi vilaka,’+ Yehowa muntu me tuba.
14 ‘Yo yina mono ta ndimisa yandi,
Mono ta nata yandi na ntoto-makanga,
Mpi mono ta tuba sambu na kununga ntima na yandi.
15 Mono ta vutudila yandi bilanga na yandi ya vinu yantika na ntangu yina,+
Mpi Muwanda* ya Akore+ bonso nzila ya ke nata na kivuvu;
Yandi ta pesa mvutu kuna, bonso na bilumbu ya kileke na yandi,
Bonso na kilumbu yina yandi basikaka na insi ya Ezipte.+
16 Mpi na bilumbu yina,’ Yehowa muntu me tuba,
‘Nge ta binga mono bakala na Mono, kansi nge ta binga mono diaka ve mfumu na Mono.’*
17 ‘Mono ta katula bazina ya biteki ya Baale na munoko na yandi,+
Mpi bantu ta yibuka diaka ve bazina na yo.+
18 Na kilumbu yina mono ta sadila bo kuwakana ti bambisi ya mfinda,+
Mpi ti bandeke ya zulu mpi bambisi yina ke tambulaka divumu na ntoto;+
Mono ta katula munduki ya tolo-tolo, mbele ya bitumba, mpi bitumba na insi,+
19 Mono ta sila nge makwela kimakulu;
Mpi mono ta sila nge makwela na lunungu mpi na kieleka,
Na zola ya kwikama mpi na mawa.+
20 Mono ta sila nge makwela na kwikama,
Mpi nge ta zaba kibeni Yehowa.’+
21 ‘Na kilumbu yina mono ta pesa mvutu,’ Yehowa muntu me tuba,
‘Mono ta pesa zulu mvutu,
Mpi yo ta pesa ntoto mvutu;+
22 Ntoto ta pesa mvutu na bambuma, na vinu ya mpa, mpi na mafuta;
23 Mono ta kuna yandi na ntoto+ bonso nkeni sambu na mono mosi,
Mpi muntu yina bo wilaka ve mawa, mono ta wila yandi mawa;*
Mono ta tubila bantu yina kele ve bantu na mono* nde: “Beno kele bantu na mono,”+
Mpi bo ta tuba nde: “Nge kele Nzambi na mono.”’”+
3 Ebuna Yehowa tubilaka mono nde: “Kwenda diaka, mpi zola nkento yina bakala ya nkaka ke zola mpi yina ke sala bizumba,+ kaka mutindu Yehowa ke zolaka bantu ya Izraele+ ata bo ke kwendaka na banzambi ya nkaka+ mpi ke zolaka bagato ya bambuma ya vinu.”*
2 Yo yina mono sumbaka yandi sambu na mono mosi na mbongo 15 ya bibende, homere* mosi ya orze ti ndambu. 3 Ebuna mono tubilaka yandi nde: “Nge ta vanda nkento na mono bilumbu mingi. Nge fwete sala ve kindumba,* nge fwete vukisa ve nitu ti bakala ya nkaka, mpi mono ta sala mutindu mosi sambu na nge.”*
4 Sambu bantu ya Izraele ta zinga ntangu* mingi kukonda ntotila,+ kukonda mfumu, kukonda kimenga, kukonda dikunzi, mpi kukonda efodi+ ti biteki ya terafimi.*+ 5 Na nima, bantu ya Izraele ta vutuka mpi ta sosa Yehowa Nzambi na bo+ mpi Davidi ntotila na bo,+ ebuna bo ta kwisa ti matekita na Yehowa mpi na bumbote na yandi na kitini ya nsuka ya bilumbu.+
4 O bantu ya Izraele, beno wa ndinga ya Yehowa,
Sambu Yehowa kele ti diambu na bantu ya insi yai,+
Sambu kieleka, zola ya kwikama, mpi nzayilu ya Nzambi kele ve na insi yai.+
2 Bandefi ya luvunu, kukusa,+ kufwa bantu,+
Kuyiba, mpi bizumba+ me panzana mingi,
Mpi bo ke tiamuna menga ya muntu mosi na nima bo ke tiamuna menga ya muntu ya nkaka.+
3 Yo yina insi yai ta dila+
Mpi bantu yonso ya ke zingaka kuna ta mana;
Bambisi ya mfinda mpi bandeke ya zulu,
Ata nkutu bambisi ya masa ya nzadi-mungwa, ta fwa.
4 “Kansi, bika nde muntu mosi ve kunwana to kunganina muntu,+
Sambu bantu na nge kele bonso bantu yina ke nwana ti nganga-nzambi.+
5 Yo yina nge ta bula sakuba na kati-kati ya ntangu,
Mpi mbikudi ta bula sakuba ti nge, bonso nde yo vandaka na mpimpa.
Ebuna mono ta kanga mama na nge munoko.*
6 Bo ta kanga bantu na mono munoko,* sambu nzayilu kele ve.
Sambu nge me buya nzayilu,+
Mono mpi ta buya nge, ebuna nge ta vanda diaka ve nganga-nzambi na mono;
Mpi sambu nge me vila nsiku* ya Nzambi na nge,+
Mono ta vila bana na nge.
7 Ntangu bo vandaka kukuma mingi, bo vandaka kusala masumu mingi na ntwala na mono.+
Mono ta kumisa nkembo na bo nsoni.*
8 Bo ke dia disumu ya bantu na mono,
Mpi bo kele lukasi sambu na* kifu na bo.
9 Yo ta vanda mutindu mosi sambu na bantu mpi sambu na nganga-nzambi;
Mono ta sambisa bo sambu na banzila na bo,
Mpi mono ta sala nde bo buka mbuma ya bisalu na bo.+
10 Bo ta dia kansi bo ta fuluka ve.+
Bo ta vukisa nitu ti bantu mingi,* kansi bo ta kuma ve mingi,+
Sambu bo me zitisa ve Yehowa ata fioti.
12 Bantu na mono ke yula biteki na bo ya banti,
Bo ke sala mambu yina nti* na bo ke songa bo;
Sambu mpeve ya kindumba* ke vidisa bo nzila,
Mpi sambu na kindumba* na bo, bo ke buya kulemfukila Nzambi na bo.
13 Bo ke pesa bimenga na bansongi ya bangumba ya nene,+
Mpi bo ke yoka bimenga na zulu ya bangumba ya fioti sambu yo basisa midinga,
Na nsi ya banti ya bo ke bingaka shene, mpi na nsi ya banti ya stirakse,* mpi na nsi ya konso nti ya nene,+
Sambu madidi na yo kele mbote.
Yo yina bana na beno ya bankento ke sala kindumba*
Mpi bankento ya bana na beno ke sala bizumba.
14 Mono ta sambisa ve bana na beno ya bankento sambu na kindumba* na bo,
Mpi mono ta sambisa ve bankento ya bana na beno sambu na bizumba na bo.
Sambu babakala ke kwenda na lweka ti bankento ya ndumba
Mpi bo ke pesa bimenga ti bandumba ya tempelo;
Bantu ya mutindu yina ya me konda mayele ya kubakisa mambu+ ta fwa.
Beno kwisa ve na Gilgale+ to na Bete-avene,+
Mpi beno zenga ve kieleka nde, ‘Ya kieleka mutindu Yehowa kele na luzingu!’+
16 Sambu bonso ngombe ya nkento ya ntu-ngolo, Izraele me kuma ntu-ngolo.+
Keti Yehowa ta gungula bo ntangu yai bonso mwana-dimeme ya bakala na nseke?*
17 Efrayimi me vukana ti biteki.+
Beno bika yandi, yandi mosi!
Mpi bamfumu* na yandi ke zolaka nsoni mingi.+
19 Mupepe ta ziunga yandi* na mapapu na yo,
Mpi bo ta wa nsoni ya bimenga na bo.”
5 “Beno banganga-nzambi,+ beno wa diambu yai,
O nzo ya Izraele, beno tula dikebi,
O nzo ya ntotila, beno wa,
Sambu lusambisu ke tadila beno;
Sambu beno kele mutambu na Mispa
Mpi bukondi yina bo me yalumuna na Tabore.+
3 Mono me zaba Efrayimi,
Mpi Izraele kele ve ya kubumbana na ntwala na mono.
Sambu ntangu yai, O Efrayimi, nge me kuma kuvukisa nitu ti bantu mingi;*
Izraele me kudikumisa mvindu.+
4 Bisalu na bo ke pesa bo ve nzila ya kuvutukila Nzambi na bo,
Sambu mpeve ya kindumba* kele na kati na bo;+
Mpi bo ke ndima ve Yehowa.
5 Lulendo ya Izraele ke ta kimbangi sambu na kubedisa yandi;*+
Izraele ti Efrayimi me bula sakuba na kifu na bo,
Mpi Yuda me bula sakuba ti bo.+
6 Bo kwendaka kusosa Yehowa ti mameme na bo mpi bangombe na bo,
Kansi bo monaka yandi ve.
Yandi bikisaka bo mpi kwendaka ntama ti bo.+
7 Bo me yekula Yehowa,+
Sambu bo me buta bana ya banzenza.
Ntangu yai, ngonda mosi ta dia bo* ti bima* na bo.
8 Beno bula kibongo+ na Gibea, beno bula mpungi na Rama!+
Beno tula mulolo ya bitumba na Bete-avene+—na nima na nge, O Benyamini!
9 O Efrayimi, nge ta kuma kima ya ke pesa boma na kilumbu ya ndola.+
Mono me zabisa mambu yina ta salama kibeni na kati ya makanda ya Izraele.
10 Bamfumu ya Yuda kele bonso bantu yina ke pusaka ndilu.+
Mono ta monisila bo makasi na mono bonso masa.
11 Bo ke niokula Efrayimi, lusambisu ke bedisa yandi,
Sambu yandi vandaka ti lukanu ya kulanda bambeni na yandi.+
12 Yo yina mono vandaka bonso mukuni sambu na Efrayimi
Mpi bonso ka-niama mosi ya ke diaka bima sambu na nzo ya Yuda.
13 Ntangu Efrayimi monaka maladi na yandi, mpi Yuda monaka mputa na yandi,
Efrayimi kwendaka na Asiria+ mpi tindilaka ntotila mosi ya nene bantu.
Kansi yandi kukaka ve kubelula nge,
Mpi yandi lendaka ve kubelula mputa na nge.
14 Sambu mono ta vanda bonso mwana-ntambu sambu na Efrayimi,
Mpi bonso ntambu ya ngolo* sambu na nzo ya Yuda.
Mono mosi ta pasula bo bitini-bitini mpi mono ta kwenda;+
Mono ta nata bo, mpi muntu mosi ve ta gulusa bo.+
15 Mono ta kwenda mpi mono ta vutuka na kisika na mono tii kuna bo ta buka mbuma ya mambu na bo ya mbi,
Ntangu bo ta vanda na mpasi, bo ta sosa mono.”+
6 “Beno kwisa, beto vutukila Yehowa,
Sambu yandi me pasula beto bitini-bitini,+ kansi yandi ta belula beto.
Yandi bulaka beto, kansi yandi ta kanga bamputa na beto.
2 Yandi ta vutula beto na luzingu na nima ya bilumbu zole.
Na kilumbu ya tatu yandi ta tedimisa beto,
Ebuna beto ta zinga na ntwala na yandi.
3 Beto ta zaba, beto ta sosa kuzaba Yehowa na masonga yonso.
Yandi ta basika kibeni bonso ntongo ke tanaka;
Yandi ta kwisila beto bonso mvula ya ngolo,
Bonso mvula ya nsuka yina ke podisaka ntoto.”
4 “Mono ta sala nge inki Efrayimi?
Mono ta sala nge inki Yuda?
Sambu zola na beno ya kwikama kele bonso matuti ya suka,
Bonso malulu yina ke vilaka nswalu.
Mpi kusambisa yina bo ta sambisa nge ta sema bonso nsemo.+
6 Sambu mono ke waka kiese na zola ya kwikama* kansi na kimenga ve,
Mpi mono ke waka kiese na nzayilu ya Nzambi kuluta na makabu ya kuyoka ya mvimba.+
7 Kansi bo, bonso bantu, bo me fwaka kuwakana.+
Bo me yekulaka mono kuna.
9 Kimvuka ya banganga-nzambi kele bonso kimvuka ya miyibi yina me bumbana sambu na kusala muntu mbi.
Bo ke fwa bantu na nzila ya Shekemi,+
Sambu bikalulu na bo kele ya nsoni.
10 Mono me mona diambu mosi ya boma na nzo ya Izraele.
11 Diaka, O Yuda, bo me tudila nge nsungi ya kukatula bima na bilanga,
Ntangu mono ta vutula bantu na mono yina kwendaka na kimpika.”+
7 “Na ntangu yina mono ke zola kubelula Izraele,
Kifu ya Efrayimi mpi me monana pwelele,+
Mpi mambu ya mbi ya Samaria.+
Sambu bo kele ti kikalulu ya kukusa bantu;+
Miyibi ke kota na banzo mpi bimvuka ya miyibi ke yiba na nganda.+
2 Kansi bo ke tuba ve na ntima na bo nde mono ta yibuka mambu na bo yonso ya mbi.+
Ntangu yai bisalu na bo kele na nziunga na bo;
Yo kele na ntwala ya luse na mono.
3 Bo ke pesa ntotila kiese na mambu na bo ya mbi,
Mpi bo ke pesa bamfumu kiese na luvunu na bo.
4 Bo yonso kele bantu ya ke salaka bizumba,
Bo ke pela bonso fulu yina muntu ya ke salaka mampa me pedisa,
Yina ke yambulaka kuyika tiya na nima ya kubula pate tii kuna yo ta vimba.
5 Na kilumbu ya ntotila na beto, bamfumu me bela
—Bo kele na makasi ya ngolo sambu na vinu.+
Yandi me tandudila bantu yina ke sekaka bantu diboko na yandi.
6 Sambu bo ke pusana ti bantima yina ke pela bonso fulu.*
Muntu ya ke salaka mampa ke lala mpimpa ya mvimba;
Na suka, fulu ke pela bonso tiya yina ke pela ngolo.
7 Bo yonso kele tiya bonso fulu,
Mpi bo ke dia bamfumu* na bo.
8 Efrayimi me vukana ti makanda.+
Efrayimi kele bonso gato yina kele bonso dimbuma mpi yina bo me balula ve.
9 Banzenza me dia ngolo na yandi,+ kansi yandi ke zaba ve.
Mpi nsuki na yandi me kuma mpembe, kansi yandi ke bakisa ve.
10 Lulendo ya Izraele me ta kimbangi sambu na kubedisa yandi,+
Kansi bo me vutukila ve Yehowa Nzambi na bo,+
Mpi bo me sosa yandi ve ata bo me kutana ti mambu yai yonso.
11 Efrayimi kele bonso pizio ya buzoba, yina me konda mabanza ya mbote.*+
Bo me binga Ezipte;+ bo me kwenda na Asiria.+
12 Konso kisika ya bo ke kwenda, mono ta yalumuna bukondi na mono na zulu na bo.
Mono ta kulumusa bo bonso bandeke ya zulu.
Mono ta pesa bo ndola na kuwakana ti lukebisu yina bo pesaka na kimvuka na bo ya bantu.+
13 Mawa na bo, sambu bo me tina mono!
Bo ta fwa, sambu bo me sala mambu ya mbi na ntwala na mono!
Mono vandaka ya kuyilama sambu na kusumba bo diaka, kansi bo me tuba mambu ya luvunu sambu na mono.+
14 Bo bingaka mono ve na bantima na bo sambu mono sadisa bo,+
Ata bo landaka kudila na zulu ya bambeto na bo.
Sambu na bambuma na bo mpi vinu ya mpa, bo vandaka kudizenga-zenga;
Bo me balukila mono.
15 Ata mono pesaka bo ndola mpi kumisaka maboko na bo ngolo,
Bo ke nwanisa mono, bo ke kana mambu ya mbi.
16 Bo sobaka nzila, kansi ve na kima ya kunanguka;*
Bo vandaka bantu yina bo lenda tudila ve ntima bonso munduki ya tolo-tolo yina nsinga na yo me lemba.+
Bamfumu na bo ta bwa na mbele ya bitumba sambu na baludimi na bo ya kukonda luzitu.
Sambu na yo, bo ta vanda kima ya bo ke seka na insi ya Ezipte.”+
8 “Tula kibongo na munoko na nge!+
Muntu mosi ke kwisa bonso ngo-zulu sambu na kunwanisa nzo ya Yehowa,+
Sambu bo me bebisa kuwakana na mono+ mpi bo me fwa nsiku na mono.+
2 Bo ke binga mono nde, ‘Nzambi na mono, beto, bantu ya Izraele, beto me zaba nge!’+
3 Izraele me buya mambu ya mbote.+
Bika mbeni kulanda yandi.
4 Bo me tula bantotila, kansi na nzila na mono ve.
Bo me tula bamfumu, kansi mono zabaka bo ve.
5 O Samaria,+ bo me losa mwana-ngombe na nge.
Mono me wila bo makasi ya ngolo.+
Tii nki ntangu bo ta kuka ve kuvanda bantu yina me sala mbi ve?*
6 Sambu yo me katuka na Izraele.
Muntu ya ke salaka bisalu ya maboko salaka yo, kansi Nzambi ve;
Mwana-ngombe ya Samaria ta kuma mfututu.
Kana yo basisa yo, banzenza ta dia yo.+
8 Bo ta mina Izraele.+
Ntangu yai bo ta vanda na kati ya makanda,+
Bonso dibungu yina bantu ke zolaka ve.
9 Sambu bo me kwenda na Asiria,+ bonso mpunda ya mfinda yina kele yo mosi.
Efrayimi me futa bankento sambu bo vanda bamakangu na bo.+
10 Ata bamakangu yina bo me futa me katuka na makanda,
Ntangu yai, mono ta vukisa bo,
Bo ta yantika kumona mpasi+ sambu na kizitu yina ntotila ti bamfumu tulaka na zulu na bo.
11 Efrayimi me kumisa bamesa-kimenga mingi sambu na kusala masumu.+
Yo me kuma bamesa-kimenga na yandi sambu na kusala masumu.+
12 Mono sonikilaka yandi mambu mingi ya nsiku* na mono,
Kansi bo vandaka kubaka yo bonso kima ya munzenza.+
13 Bo ke pesa mono bimenga bonso makabu, mpi bo ke dia misuni,
Kansi yo ke pesa ve Yehowa kiese.+
Ntangu yai, yandi ta yibuka kifu na bo mpi yandi ta pesa bo ndola sambu na masumu na bo.+
14 Izraele me vila Muntu yina salaka yandi+ ebuna yandi me tunga batempelo,+
Mpi Yuda me yika bambanza mingi ya ngolo.+
Kansi mono ta tinda tiya na bambanza na yandi,
Mpi yo ta yoka banzo-zulu ya konso muntu.”+
9 “Kuwa ve kiese, O Izraele,+
Kusala ve mambu na kiese bonso bantu ya nkaka.
Sambu na kindumba,* nge me yambula Nzambi na nge.+
Nge me zola lufutu ya nkento ya ndumba na konso kisika ya bo ke tutaka bambuma sambu na kukatula yo bampusu.+
2 Kansi kisika ya bo ke tutaka bambuma sambu na kukatula yo bampusu mpi kikamuninu ya vinu ta disa bo ve,
Mpi vinu ya mpa ta vanda diaka ve.+
3 Bo ta landa ve kuzinga na insi ya Yehowa;+
Kansi, Efrayimi ta vutuka na Ezipte,
Mpi bo ta dia bima ya mvindu na Asiria.+
Bo kele bonso mampa ya mafwa;
Bantu yonso yina ke dia yo ta kudikumisa mvindu.
Sambu mampa na bo kele sambu na bo mosi;*
Yo ta kota ve na nzo ya Yehowa.
5 Beno ta sala nki na kilumbu ya lukutakanu,*
Na kilumbu ya nkinsi ya Yehowa?
6 Sambu yo ta lomba nde bo tina sambu na lufwa.+
Ezipte ta vukisa bo,+ mpi Memfisi ta zika bo.+
Matiti ya bansende ta baka bima na bo ya kitoko ya arza,
Mpi banti ya bansende ta mena na batenta na bo.
Mbikudi na bo ta kuma zoba, mpi muntu ya ke bikulaka ta kuma kilawu;
Sambu kifu na nge kele mingi, kimbeni sambu na nge kele mingi.”
8 Nkengidi+ ya Efrayimi vandaka ti Nzambi na mono.+
Kansi ntangu yai banzila yonso ya bambikudi+ na yandi kele bonso mitambu ya muntu ya ke kangaka bandeke;
Kimbeni kele na nzo ya Nzambi na yandi.
9 Bo me kudipesa na mambu yina ke nataka lufwa, bonso na bilumbu ya Gibea.+
Yandi ta yibuka kifu na bo mpi ta pesa bo ndola sambu na masumu na bo.+
10 “Bonso bambuma ya vinu na ntoto-makanga, mono monaka Izraele.+
Bonso bambuma ya ntete ya bafige ya luyantiku na nti ya bafige, mono monaka ba-nkaka na beno.
Kansi bo kwendaka na Baale ya Peore;+
Bo kudipesaka na kima ya nsoni,*+
Mpi bo kumaka nzanzi bonso kima yina bo vandaka kuzola.
11 Nkembo ya Efrayimi me pumbuka bonso ndeke;
Bo ke buta ve, bankento kele na mavumu ve, mpi bo ke baka ve mavumu.+
12 Ata bo sansa bana,
Mono ta bika bo kukonda bana tii kuna muntu mosi ve ta bikala;+
Ee, mawa na bo ntangu mono ta pesa bo mukongo!+
13 Efrayimi, yina bo kunaka na nseke, vandaka bonso Tire sambu na mono;+
Ntangu yai, Efrayimi fwete basisa bana na yandi sambu bo fwa bo.”
14 O Yehowa, pesa bo yina nge fwete pesa bo;
Divumu yina mavumu ke basikaka mpi mabele ya kuyuma.*
15 “Mambu na bo yonso ya mbi vandaka na Gilgale,+ sambu kuna mono kumaka kumenga bo.
Mono ta kula bo na nzo na mono sambu na bisalu na bo ya mbi.+
Mono ta zola bo diaka ve;+
Bamfumu na bo yonso kele ntu-ngolo.
16 Bo ta fwa Efrayimi.+
Musisa na bo ta yuma, mpi bo ta buta ve mbuma.
Ata kana bo buta, mono ta fwa bana na bo yina bo ke zolaka mingi.”
17 Nzambi na mono ta buya bo,
Sambu bo wilaka yandi ve,+
Mpi bo ta kuma bantu yina ke tina-tina na kati ya makanda.+
10 “Izraele kele nti ya vinu ya kubeba* yina ke buta bambuma.+
Ntangu bambuma na yandi ke kuma mingi, yandi ke kumisa mpi bamesa-kimenga na yandi mingi;+
Ntangu ntoto na yandi ke buta mbote, yandi ke kumisa mpi makunzi na yandi ya santu kitoko mingi.+
Kele ti muntu yina ta bwisa bamesa-kimenga na bo mpi ta fwa makunzi na bo.
3 Ntangu yai bo ta tuba nde, ‘Beto kele ve na ntotila,+ sambu beto waka ve Yehowa boma.
Mpi ntotila ta sadila beto nki?’
4 Bo ke tuba bangogo ya kukonda mfunu, bo ke dia bandefi ya luvunu,+ mpi bo ke sala bangwakana;
Yo yina lusambisu yina ke basika kele bonso matiti ya ndikila na banzila ya mikala ya kilanga.+
5 Bantu ya Samaria ta wa boma sambu na kiteki ya mwana-ngombe ya Bete-avene.+
Bantu na yo ta dila yo,
Banganga-nzambi ya nzambi na yo ya nzenza yina waka kiese sambu na yo mpi sambu na nkembo na yo ta dila yo mpi,
Sambu yo ta kwenda na insi ya nkaka ntama ti bo.
6 Bo ta nata yo na Asiria sambu na kupesa yo dikabu na ntotila ya nene.+
Bo ta pesa Efrayimi nsoni,
Mpi Izraele ta wa nsoni sambu na ndongisila yina yandi landaka.+
7 Samaria ti ntotila na yandi, bo ta fwa bo kibeni,*+
Bonso ka-lutangu ya bo me zenga, yina kele na zulu ya bamasa.
8 Bo ta fwa kimakulu+ bisika ya kunanguka ya Bete-avene,+ disumu ya Izraele.+
Bansende mpi banti ya bansende ta mena na zulu ya bamesa-kimenga na bo.+
Bantu ta tubila bangumba ya nene nde, ‘Beno fika beto!’
Mpi bangumba ya fioti nde, ‘Beno bwila beto!’+
9 Katuka na bilumbu ya Gibea, nge salaka disumu,+ O Izraele.
Kuna bo landaka kusala disumu.
Bitumba fwaka* ve bantu* ya kukonda lunungu na Gibea.
10 Mono ta pesa bo mpi ndola ntangu mono ta zola.
Mpi bantu ta vukana sambu na kunwanisa bo,
Ntangu bo ta kangisa bo* ti bifu na bo yonso zole.
11 Efrayimi vandaka mwana-ngombe ya nkento ya bo me longaka, yina vandaka kuzola kututa bambuma sambu na kukatula yo bampusu,
Yo yina mono bikisaka nkingu na yandi ya kitoko.
Ntangu yai, mono ta sala nde muntu mosi kunata Efrayimi+ na mpunda.*
Yuda ta bundula ntoto; Yakobi ta bendila yandi kima ya bo ke bundudilaka ntoto.
12 Beno kuna nkeni na lunungu sambu na beno mosi mpi beno buka zola ya kwikama.
Beno bundula ntoto ya mbote sambu na beno mosi+
Awa ntangu kele ntete ya kusosa Yehowa,+
Tii kuna yandi ta kwisa mpi ta longa beno na lunungu.+
13 Kansi beno me bundula mambu ya mbi,
Beno me buka mambu ya kukonda lunungu,+
Mpi beno me dia mbuma ya luvunu;
Sambu beno me tula ntima na nzila na beno mosi,
Na basoda na beno ya mingi.
14 Mavwanga ta basikila bantu na nge,
Mpi bo ta bebisa bambanza na nge yonso ya ngolo,+
Mutindu Shalmani bebisaka nzo ya Arbele,
Na kilumbu ya bitumba ntangu bo zengaka bamama bitini-bitini ti bana na bo.
15 Yai mambu yina bo ta sala nge, O Betele,+ sambu na mambu na nge ya mbi kibeni.
Na suka-suka, bo ta fwa kibeni* ntotila ya Izraele.”+
11 “Ntangu Izraele vandaka mwana, mono vandaka kuzola yandi,+
Mpi mono bingaka mwana na mono sambu yandi basika na Ezipte.+
3 Kansi mono muntu longaka Efrayimi kutambula,+ mono vandaka kubaka bo na maboko na mono;+
Mpi bo ndimaka ve nde mono belulaka bo.
4 Mono landaka kubenda bo ti bansinga ya bantu,* ti bansinga ya zola;+
Mono vandaka bonso muntu yina ke katula vangu na bankingu na bo,
Mpi mono natilaka konso muntu madia na mawete yonso.
5 Bo ta vutuka ve na insi ya Ezipte, kansi Asiria ta vanda ntotila na bo,+
Sambu bo buyaka kuvutukila mono.+
6 Mbele ya bitumba ta baluka-baluka sambu na kunwanisa bambanza na yandi+
Yo ta zenga banti na yandi ya kukangila bakielo mpi ta dia bo sambu na balukanu na bo.+
7 Bantu na mono kele ti lukanu ya kuvanda ve ya kwikama na ntwala na mono.+
Ata bo ke binga bo na zulu,* muntu mosi ve ke telama.
8 Inki mutindu mono lenda yambula nge, O Efrayimi?+
Inki mutindu mono lenda pesa nge na maboko ya bantu ya nkaka, O Izraele?
Inki mutindu mono lenda sadila nge mambu bonso Adma?
Inki mutindu mono lenda sala nge mutindu mono salaka Seboyimi?+
9 Mono ta monisa ve makasi na mono ya ngolo.
Mono ta fwa diaka ve Efrayimi,+
Sambu mono kele Nzambi kansi mono kele ve muntu,
Santu yina kele na kati na beno;
Mpi mono ta kwisila beno ve na makasi.
10 Bo ta tambula na nima ya Yehowa, mpi yandi ta ngana bonso ntambu;+
Ntangu yandi ta ngana, bana na yandi ta katuka na westi+ mpi ta kwisa ti matekita.
11 Bo ta tekita bonso ndeke, ntangu bo ke basika na Ezipte,
Bonso pizio ntangu bo ke basika na insi ya Asiria;+
Mpi mono ta tula bo na banzo na bo,” Yehowa muntu me tuba.+
12 “Efrayimi me ziunga mono ti luvunu,
Mpi nzo ya Izraele me ziunga mono ti kukusa.+
12 “Efrayimi ke dia mupepe.
Yandi ke landa mupepe ya esti kilumbu ya mvimba.
Yandi ke sala nde luvunu mpi mubulu kukuma mingi.
Bo ke sala kuwakana ti Asiria+ mpi ke nata mafuta na Ezipte.+
2 Yehowa kele ti diambu ti Yuda;+
Yandi ta sambisa Yakobi na kutadila banzila na yandi,
Mpi yandi ta futa yandi na kutadila bisalu na yandi.+
3 Na divumu, yandi simbaka mpangi na yandi na dikulu,*+
Mpi ti ngolo na yandi, yandi nwanaka ti Nzambi.+
4 Yandi landaka kunwana ti wanzio mpi nungaka.
Yandi dilaka mpi bondilaka sambu yandi monisila yandi ntima ya mbote.”+
6 “Yo yina, vutukila Nzambi na nge,+
Tanina zola ya kwikama mpi lunungu,+
Mpi tudila Nzambi na nge kivuvu ntangu yonso.
Mpi na kisalu na mono yonso ya ngolo, bo ta mona ve ata kima mosi ya mbi to disumu.’
9 Kansi mono kele Yehowa Nzambi na nge katuka* na insi ya Ezipte.+
Mono ta sala nde nge zinga diaka na batenta
Bonso na bilumbu ya ntangu yina bo me tulaka.*
10 Mono tubilaka bambikudi,+
Mono kumisaka bambona-meso na bo mingi,
Mpi mono tubaka bingana na nzila ya bambikudi.
11 Luvunu*+ mpi kukonda kieleka kele na Gileadi.
Bo me tambika bangombe ya babakala na Gilgale,+
Mpi bamesa-kimenga na bo kele bonso bita ya matadi na banzila ya mikala ya kilanga.+
12 Yakobi tinaka na teritware* ya Arami;*+
Izraele+ salaka kisalu kuna sambu na nkento,+
Mpi yandi kebaka mameme sambu na nkento.+
13 Yehowa basisaka Izraele na Ezipte na nzila ya mbikudi mosi,+
Mpi yandi taninaka yandi na nzila ya mbikudi mosi.+
14 Efrayimi me vweza Nzambi mingi kibeni;+
Mfuka na yandi ya menga kele kaka na zulu na yandi;
Mfumu na yandi ta pesa yandi ndola sambu na nsoni yina yandi pesaka yandi.”+
13 “Ntangu Efrayimi tubaka, bantu tekitaka;
Yandi vandaka ti lukumu na Izraele.+
Kansi yandi salaka mbi na yina me tala Baale+ mpi yandi fwaka.
2 Ntangu yai bo ke kumisa masumu na bo mingi
Mpi bo ke sala biteki ya bibende* ti arza na bo;+
Bo ke sala biteki na mayele yonso; biteki yina yonso kele kisalu ya bantu yina ke salaka bisalu ya maboko.
Bo ke tubila yo nde, ‘Bika bantu yina ke pesa kimenga, kupesa mwana-ngombe beze.’+
3 Yo yina bo ta kuma bonso matuti ya suka,
Bonso malulu yina ke walukaka na suka-suka,
Bonso bampusu yina mupepe ya ngolo ke nataka katuka na kisika ya bo ke tutaka bambuma sambu na kukatula yo bampusu,
Mpi bonso midinga yina ke basikaka na ditobo ya ludi ya nzo.
4 Kansi mono kele Yehowa Nzambi na nge katuka* na insi ya Ezipte;+
Nge zabaka ve Nzambi ya nkaka katula kaka mono,
Mpi katula mono ngulusi ya nkaka kele ve.+
5 Mono zabaka nge na ntoto-makanga,+ na ntoto yina mvula ke nokaka ve.
6 Bo fulukaka sambu na bima ya bilanga na bo,+
Bo fulukaka mpi ntima na bo kumaka lulendo.
Yo yina bo vilaka mono.+
7 Mono ta kuma bonso mwana-ntambu sambu na bo,+
Bonso nkoyi yina me bumbana na lweka ya nzila.
8 Mono ta kwisila bo bonso urse yina me vidisa bana na yo,
Mpi mono ta pasula bantulu* na bo.
Mono ta dia bo bonso ntambu;
Mbisi ya mfinda ta zenga bo bitini-bitini.
9 Yo ta fwa nge, O Izraele,
Sambu nge pesaka mono mukongo, nge pesaka nsadisi na nge mukongo.
10 Ebuna ntotila na nge kele na wapi, sambu yandi gulusa nge na bambanza na nge yonso,+
Mpi bamfumu* na nge, yina nge tubaka sambu na bo nde,
‘Pesa mono ntotila mpi bamfumu’?+
12 Bo me ziunga* kifu ya Efrayimi;
Bo me bumba disumu na yandi.
13 Misongo ta simba yandi.
Kansi yandi kele mwana mosi ya zoba;
Yandi ke basika ve kana ntangu ya kubutuka me lunga.
O Lufwa, wapi bantunga na nge?+
O Maziamu, wapi ngolo na nge ya kufwa bantu?+
Mono ta wa mawa ve.
15 Ata yandi buta bintuntu na kati ya balukengi,
Mupepe mosi ya esti ta kwisa, mupepe ya Yehowa,
Yo ta katuka na ntoto ya zelo na zelo mpi ta kwisa, sambu na kuyumisa dibulu na yandi ya masa mpi kukawusa nto na yandi ya masa.
Yandi ta botula bima na yandi yonso ya ntalu yina kele na bimvwama na yandi.+
16 Bo ta mona nde Samaria salaka mbi,+ sambu yandi me kolama na Nzambi na yandi.+
Bo ta bwa na mbele ya bitumba,+
Bo ta zenga bana na bo bitini-bitini,
Mpi bo ta pasula mavumu ya bankento na bo yina kele na mavumu.”
14 “O Izraele, vutukila Yehowa Nzambi na nge,+
Nge me bula sakuba sambu na kifu na nge.
2 Beno vutukila Yehowa ti bangogo yai,
Beno tubila yandi nde, ‘Lolula kifu na beto+ mpi ndima mambu ya mbote,
Mpi beto ta pesa nge lukumu ti bikobo na beto+ mutindu beto zolaka kupesa nge bana-bangombe ya babakala.*
3 Asiria ta gulusa beto ve.+
Beto ta tambula ve na bampunda,+
Mpi beto ta tuba diaka ve na kisalu ya maboko na beto nde, “O Nzambi na beto!”
Sambu bo ke wila mwana ya me konda tata mawa na nsadisa na nge.’+
4 Mono ta belula kikalulu na bo ya kukonda kwikama.+
5 Mono ta kuma bonso malulu sambu na Izraele;
Yandi ta basisa bintuntu bonso lisi
Mpi yandi ta kulumusa misisa na yandi bonso banti ya Libani.
6 Balutangu na yandi ya ndendi ta yalumuka,
Lukumu na yandi ta vanda bonso ya nti ya olive,
Mpi nsudi na yandi bonso ya nti ya Libani.
7 Bo ta zinga diaka na nsi ya kivudi na yandi.
Bo ta buta bankeni mpi ta basisa bintuntu bonso vinu.+
Lukumu na yandi ta vanda bonso vinu ya Libani.
8 Efrayimi ta tuba nde, ‘Mono ta sala diaka nki ti biteki?’+
Mono ta pesa mvutu mpi ta kengila yandi.+
Mono ta vanda bonso nti ya yenevriye yina ke yela mbote.
Bo ta mona mbuma na nge na mono.”
9 Nani kele mayele? Bika yandi bakisa mambu yai.
Nani kele ngangu? Bika yandi zaba yo.
Sambu banzila ya Yehowa kele ya kusungama,+
Mpi bantu ya lunungu ta tambula na banzila yina;
Kansi bantu ya mbi ta bula sakuba na banzila yina.
Zina ya Oshaya na bunkufi, yina ke tendula “Muntu Yina Yah Gulusaka; Yah Me Gulusa.”
To “mansoni; kisaka-saka.”
To “mansoni; kisaka-saka.”
To “mansoni; kisaka-saka.”
Yo ke tendula “Nzambi Ta Kuna Nkeni.”
To “Ntoto ya Kukonda Ngumba.”
Yo ke tendula “Yina Bo Me Wila Ve Mawa.”
Yo ke tendula “Bantu na Mono Ve.”
Na kisina, “ya bana.”
Tala noti na Oze 1:9.
Tala noti na Oze 1:6.
To “mansoni; kisaka-saka.”
To “mansoni; kisaka-saka.”
To “me kudipesa na mansoni (na kisaka-saka).”
To “Ntoto ya Kukonda Ngumba.”
To “Baale na Mono.”
To “ta bika nde bo zinga.”
Yo ke tendula “Nzambi Ta Kuna Nkeni.”
Tala noti na Oze 1:6.
Tala noti na Oze 1:9.
Disongidila, yina bo vandaka kusadila na lusambu ya luvunu.
Homere mosi kele balitre 220. Tala Bangindu ya Ngika B14.
To “kudipesa ve na mansoni (na kisaka-saka).”
To “mono ta vukisa ve nitu ti nge.”
Na kisina, “bilumbu.”
To “banzambi ya dibuta; biteki.”
To “ta fwa mama na nge.”
To “ta fwa bantu na mono.”
To “malongi.”
To mbala ya nkaka, “Bo me soba nkembo na mono na nsoni.”
To “ke tombula mioyo na bo na.” Tala Bantendula ya Bangogo, “Moyo.”
To “ta sala mansoni mingi kibeni; ta sala kindumba.”
To “Mansoni; Kisaka-saka.”
Na kisina, “Ke katulaka ntima.”
To “nti ya nganga-ngombo.”
To “mansoni; kisaka-saka.”
To “mansoni; kisaka-saka.”
Nti mosi yina ke butaka bintuntu ya mpembe ya nsudi ya kitoko.
To “mansoni; kisaka-saka.”
To “mansoni; kisaka-saka.”
To “mansoni; kisaka-saka.”
Na kisina, “na kisika mosi ya nene?”
To “malafu na bo ya bo me sala ti ble.”
To “kusala mansoni mingi kibeni; kudipesa na kindumba.”
Na kisina, “bitaninu.”
To “ta komba yandi.”
Na kisina, “bantu yina me yambula nzila.”
To “me kudikotisa mingi.”
To “mono ta pesa ndola na.”
To “me sala mansoni; me sala kindumba.”
To “mansoni; kisaka-saka.”
Na kisina, “na luse na yandi.”
To mbala ya nkaka, “Bo ta dia bo na ngonda mosi.”
To “bilanga.”
To “mwana-ntambu yina kele ti mika mingi na nkingu.”
Na kisina, “ta sosa luse na mono.”
To “na mawa.”
To mbala ya nkaka, “Sambu bantima na bo kele bonso fulu ntangu bo ke pusana ti luvunu na bo.”
Na kisina, “bazuzi.”
Na kisina, “ntima.”
Disongidila, na mutindu ya lusambu yina kele ve ya kunanguka.
To “ta kuka ve kukuma bunkete?”
To “mbuma yina bo me katula ntete ve.”
To “malongi.”
To mbala ya nkaka, “Bo ta vutuka.”
To “mansoni; kisaka-saka.”
To “sambu na moyo na bo mosi.”
To “na nkinsi na beno yina bo me tulaka.”
To “na nzambi ya nsoni.”
To “ya kukawuka.”
To mbala ya nkaka, “ya kuyalumuka.”
To “butesi; sukadi.”
Na kisina, “bo ta kumisa bo pima.”
Na kisina, “kangaka.”
Na kisina, “bana.”
Disongidila, ntangu bo ta nata ndola na bo bonso vangu.
To “kutula Efrayimi mukaba.”
Na kisina, “bo ta kumisa pima.”
Disongidila, bambikudi mpi bantu ya nkaka yina Nzambi vandaka kutinda sambu na kulonga Izraele.
To “bansinga ya ntima ya mbote,” bonso bansinga ya kibuti.
Disongidila, na lusambu ya kunanguka.
Na kisina, “mawa na mono me kuma ngolo.”
Na kisina, “ke zieta-zieta.”
Na kisina, “kisingini.”
Na kisina, “kele zina na yandi ya kuyibuka.”
To “muntu ya ke tekaka bima.”
To “yantika.”
To mbala ya nkaka, “ya nkinsi.”
To “Mambu ya bampeve ya mbi; Mambu yina ke yitukisa.”
Na kisina, “nseke.”
To “Siria.”
To “biteki ya bibende ya bo me lamba na tiya.”
To “yantika.”
Na kisina, “lupangu ya ntima.”
Na kisina, “bazuzi.”
To “me tanina.”
To “Sheole,” disongidila, maziamu ya bantu yonso. Tala Bantendula ya Bangogo.
Na kisina, “ta pesa nge bana-bangombe ya babakala ya bikobo na beto.”